Aleksander ha'y Vebyon

1Wosa Aleksander mab Felip an Makedonek, neb a dheuth a bow Kittim, dhe weskel Darius myghtern Persia ha Media, ev a'n siwyas avel myghtern. Ev re dhothya ha bos myghtern pow Grek seulabrys. 2Ev a omladhas yn lies kas, fetha lies dinas, ha ladha myghternedh an norvys. 3Ev a dravalyas bys pennow an norvys, ha kemmeres preydh dhiworth lies kenedhel. Pan eth an norvys ha bos kosel a­-ragdho, ughelhes o ha goethus o y golonn. 4Ev a guntellas lu fest krev ha reynya war diryow, kenedhlow ha pennsevigyon, hag i a ros trubyt dhodho.

5Wosa hemma gyllys klav o hag ev a wodhva y vos ow merwel. 6Ytho ev a elwis y soedhogyon an moyha enorys, re biens megys ganso a'y yowynkneth, ha ranna y wlaskor yntredha, hag ev hwath yn few. 7Ha wosa Aleksander dhe reynya dewdhek blydhen, ev a verwis.

8Ena y soedhogyon a dhallathas reynya, peub yn y dyller y honan. 9I oll a omwiskas gans diadem wosa y vernans, hag yndella y hwrug aga mebyon war aga lergh lies blydhen, hag i a lieshas drogow war an norvys.

Antioghus Epifanes ha Yedhewon Dhilagha

10Anedha y teuth gwreydhenn beghus, Antioghus Epifanes,1:10 Antioghus IV Epifanes 175–163 kyns Krist. mab myghtern Antioghus; ev re bia goestel yn Rom. Ev a dhallathas reynya y'n kans, seytegves blydhen warn ugens a wlaskor an Grekys.1:10 175 kyns Krist.

11Y'n dydhyow na tus dhilagha a omdhiskwedhas yn Ysrael ha toella lies, ow leverel, ‘Deun ha gwren kevambos gans an Jentilys yn agan kyrghynn, rag a-ban dhiberthsyn dhiworta, deuva lies terroes warnan.’ 12Plegadow o an gusul ma gansa, 13ha re a'n dus eth dhe'n myghtern, neb a ros kummyas dhedha may holyons ordenansow an Jentilys. 14Ytho i a dhrehevis gymnasium yn Yerusalem herwydh usadow an Jentilys, 15ha kudha merkyow aga throdreghyans ha gasa an kevambos sans. I a junyas gans an Jentilys hag a omwerthas dhe wul droktra.

Antioghus yn Ejyp

16Pan welas Antioghus y wlaskor dhe vos fastys, ev a erviras dhe dhos ha bos myghtern Ejyp rag may halla reynya war an dhiw wlaskor. 17Ytho ev a omsettyas orth Ejyp gans lu krev, gans charettow, ha gans olifanses ha marghoglu ha gans lu lestri bras. 18Ev a werryas orth Ptolemeus myghtern Ejyp yn kas, ha Ptolemeus a dreylyas ha fia dhe'n fo a-ragdho, ha lies a veu goliys hag a goedhas. 19Hag i a gemmeras an sitys kerys yn pow Ejyp, hag ev a ravnas pow Ejyp.

Antioghus a Gemmer Tresor an Tempel

20Wosa gweskel Ejyp, Antioghus a dhehwelis y'n tressa ha seyth-ugensves blydhen.1:20 169 kyns Krist. Ev eth yn-bann erbynn Ysrael hag a dheuth dhe Yerusalem gans lu krev. 21Ev a entras gans balghder dhe'n sentri ha kemmeres an alter a owr, an kantoler, hag oll y dhaffar. 22Ev a gemmeras ynwedh an voes rag bara an wolok, an hanafow rag an offrynnow diwes, an bollow, an ynkyslestri a owr, an kroglenn, ha'n kurunyow, hag ev a bilyas dhe-ves oll an afinans a owr yn tal an tempel. 23Ev a gemmeras an arghans ha'n owr ha'n lestri kostek; ev a gemmeras ynwedh an tresoryow kudhys a drovyas. 24Orth aga hemmeres ev eth dh'y wlaskor y honan.

Ev a wrug lies ladhva,

hag a gewsis gans balghder bras.

25Yth esa kynvann meur yn Ysrael yn oll aga thylleryow,

26Rewloryon ha henavogyon a hanasas,

maghtethyon ha gwer yowynk eth ha bos gwann,

ha tekter an benynes a veu chanjys.

27Pub gour pries a gemmeras an drem yn-bann;

hi neb a esedhas yn hy chambour a gynis.

28An tir a grenas rag y drigoryon,

hag oll chi Yakob a veu gwiskys yn meth.

Sita Davydh Kerys gans Antioghus

29Diw vlydhen a-wosa an myghtern a dhannvonas dhe sitys Yuda kuntellor a drubyt, hag ev a dheuth dhe Yerusalem gans lu bras. 30Ev a gewsis dhedha geryow kres yn fals, hag i a grysis dhodho, mes distowgh ev a goedhas war an sita, ha'y gweskel yn kwyls ha distrui meur a bobel yn Ysrael. 31Ev a ravnas an sita ha'y leski gans tan, hag a dorras dhe'n dor hy chiow ha'y fosow yn hy hyrghynn. 32I a gemmeras an benynes ha'n fleghes yn kethneth, ha sesya an chatel. 33Ena i a geras sita Davydh gans fos veur ha krev ha touryow krev, hag hi eth ha bos aga dinas. 34I a worras ena genedhel beghus, ha gwer dhilagha. An re ma a omgrevhas ynna; 35i a greunis arvow ha boes, hag ow kuntelles preydhyow Yerusalem i a's gwithas ena hag i a dheuth ha bos antell veur.

36Rag an tour eth ha bos kontrewaytyans erbynn an sentri,

drog eskar dhe Ysrael heb lett.

37Dhe bub tu a'n sentri i a skoellyas goes gwiryon,

hag i a dhefolas an sentri.

38Rag own anedha trigoryon Yerusalem a fias dhe'n fo;

hi eth ha bos trigva estrenyon;

hi eth ha bos estrenes dh'y agh,

ha'y fleghes a's forsakyas.

39Hy sentri eth ha bos mar ynyal avel difeyth;

hy goelyow a veu treylys dhe gyni,

hy sabotys dhe vewl,

hy enor dhe vismer.

40Hy disenor a veu lieshes yn kemusur gans hy glori kyns;

hy goeth a veu treylys dhe gyni.

Sakrifisow Difennys y'n Tempel

41Ena an myghtern a skrifas dh'y wlaskor oll may fe peub oll unn bobel, 42ha may forsakya pub huni y usadow teythyek. Oll an kenedhlow a assentyas dhe worhemmynn an myghtern, 43ha lies yn Ysrael a dhegemmeras y gryjyans; i a sakrifias dhe idolys hag a dhisakras an sabot. 44An myghtern a dhannvonas lytherow yn leuv kannasow dhe Yerusalem ha dhe sitys Yuda; ev a erghis dhedha holya usadow o estren dhe'n tir 45ha difenna offrynnow leskys ha sakrifisow hag offrynnow diwes a-ji dhe'n sentri ha disakra sabotys ha goelyow, 46ha defolya an sentri ha'n oferysi, 47drehevel alteryow ha sentris rag idolyow, ha sakrifia mogh hag enyvales avlan erell, 48ha gasa aga mebyon antrodreghys. Res o dhedha omwul kasadow dre bup-tra avlan hag ansans, 49rag mayth ankoffens an lagha ha chanjya oll an ordenansow. 50Hag yn-medh ev, ‘Neb na vo gostydh dhe worhemmynn an myghtern a verow.’

51Yn geryow a'n par ma ev a skrifas dh'y wlaskor oll. Hag ev a ordenas hwithroryon war oll an bobel hag erghi dhe sitys Yuda sakrifia, sita ha sita. 52Lies a'n bobel, peub re asas an lagha, a junyas gansa, hag i a wrug droktra y'n tir; 53i a wrug dhe Ysrael omgudha yn pub skovva a's tevo.

54Yn pymthegves dydh a Kislev, y'n pymp ha dew-ugensves blydhen,1:54 167 kyns Krist. i a dhrehevis pyth kasadow an difeythter war an alter a offrynnow leskys. Ynwedh i a dhrehevis alteryow yn sitys Yuda a-derdro, 55hag a loskas ynkys orth darasow an chiow hag y'n stretys. 56I a dorras dhe demmyn lyvrow an lagha a gavsons ha'ga leski gans tan. 57Le mayth o kevys lyver an lagha gans nebonan, po mars o nebonan lel dhe'n lagha, gorhemmynn an myghtern a'n dampnyas dhe'n mernans. 58I a wre freudh erbynn Ysrael, erbynn an re kevys mis wosa mis y'n sitys. 59Hag y'n pympes dydh warn ugens a'n mis i a sakrifia war an alter esa war alter an offrynn leskys. 60Herwydh an gorhemmynn i a ladhas an benynes re wrussa may fedha aga fleghes trodreghys, 61ha'ga theylu ha'n re re a's trodroghsons; hag i a grogas an fleghigyow yn kyrghynn konna aga mamm.

62Mes lies yn Ysrael a omgrevhas hag yth ens ervirys yn aga holonn na dhybrens boes avlan. 63I a dhewisas merwel rag na vons defolys gans boes ha disakra an kevambos sans; hag i a verwis. 64Ha sorr pur vras a dheuth war Ysrael.