Ptolemi a Enter Syria

1Myghtern Ejyp a guntellas lu bras, diniver avel tewes an morrep, ha lies gorhel; hag ev a assayas kavoes maystri war ruvaneth Aleksander dre doell ha'y heworra dh'y ruvaneth y honan. 2Ev eth yn-mes dhe Syria gans geryow a gres, ha tus an sitys a igoras aga yetow dhodho hag i eth dhe vetya ganso, rag Aleksander an myghtern re's arghsa ma's mettyens ganso, rag yth o Ptolemi hwegron Aleksander. 3Pan entras Ptolemi an sitys, ev a settyas bagas a soudoryon yn pub sita.

4Pan nesas ev dhe Azotus i a dhiskwedhas dhodho tempel Dagon kowlleskys, hag Azotus ha'y mestrevow diswrys, ha'n korfow skoellys a-les, ha korfow goleskys leskys gans Yonathan y'n vresel, rag i re's gorrsa yn bernyow ryb y hyns. 5I a dherivas dhe'n myghtern ynwedh an pyth re wrussa Yonathan, rag tewlel an blam warnodho, mes an myghtern a dewi. 6Yonathan a vetyas gans an myghtern yn Yoppa gans meuredh, hag i a salusis an eyl y gila hag a spenas an nos ena. 7Ha Yonathan eth gans an myghtern bys y'n avon henwys Elewtherus; ena ev a dhehwelis dhe Yerusalem.

8Myghtern Ptolemi a gavas maystri war sitys an morrep bys yn Selewkia ryb an mor, hag ev a besyas tewlel drogow erbynn Aleksander. 9Ev a dhannvonas kannasow dhe Demetrius an myghtern, ow leverel, ‘Deus, gwren kevambos an eyl gans y gila, hag y rov dhis yn demmedhyans ow myrgh hag a veu gwreg Aleksander, ha ty a reyn war ruvaneth dha das. 10Rag lemmyn edrek a'm beus a ri ow myrgh, rag ev re hwilas ow ladha.’ 11Ev a gablas Aleksander yndella, drefenn ev dhe hwansa war-lergh y ruvaneth. 12Ytho ev a gemmeras y vyrgh anodho ha'y ri dhe Demetrius. Estrenhes o ev dhiworth Aleksander, ha'ga eskarogeth o apert.

13Ena Ptolemi a entras Antiogh hag ev a worras diw gurun war y benn, kurunyow Ejyp hag Asia. 14Yth esa Aleksander an myghtern yn Kilikia y'n termyn na, drefenn bos tus an ranndir na ow rebellya. 15Aleksander a glewas hemma hag ev a dheuth er y bynn yn batel. Ptolemi a ledyas y lu yn-mes ha'y vetya gans leuv krev ha'y fesya 16Aleksander a fias dhe Arabia rag kavoes difresyans, ha Ptolemi a dryghis. 17Ha Zabdiel an Arab a dhibennas Aleksander hag a dhannvonas an penn dhe Ptolemi. 18Mes myghtern Ptolemi a verwis tri dydh a-wosa, ha'n gasoryon yn y dhinasow a veu ledhys gans tus an dinasow. 19Ytho yth eth Demetrius ha bos myghtern y'n kans, seyth ha tri-ugensves blydhen.11:19 145 kyns Krist.

Yonathan a Wayn Favour Demetrius

20Y'n dydhyow na Yonathan a ledyas tus Yudi yn-mes rag omsettya orth an tour yn Yerusalem, hag ev a dhrehevis lies jynn-esedhva er hy fynn 21Mes tus dhilagha a gasa aga henedhel eth dhe'n myghtern ha derivas dhodho Yonathan dhe omsettya a-dro dhe'n tour. 22Pan glewas hemma ev a sorras ha kettell y'n klewas yth eth yn-mes hag y teuth dhe Ptolemais; hag ev a skrifas dhe Yonathan na pessya owth omsettya, mes ma'n mettya rag omgusulyans yn Ptolemais skonna galla.

23Pan glewas Yonathan hemma ev a erghis pesya an omsettyans; hag ev a dhewisas re a henavogyon Ysrael ha re a'n oferysi. Owth omworra yn peryll, 24ev eth dhe'n myghtern yn Ptolemais, ow kemmeres arghans hag owr ha dillas ha lies ro arall. Hag ev a gavas y favour. 25Kyn pesyas nebes tus dhilagha a'n genedhel gul krodhvol warnodho, 26an myghtern a dhyghtyas ganso par dell re dhyghtsa ganso y ragresegydhyon; ev a'n ughelhas a-rag oll y gowetha. 27Ev a'n fastyas avel arghoferyas hag yn kemmys enor ha dell y'n jevia kyns, ha'n gwrug may fe aswonnys avel onan a'y gowetha. 28Ena Yonathan a bysis an myghtern may hwrella Yudi keffrys ha'n tri ranndir a Samaria rydh a'n trubyt, hag ev a ambosas dhodho tri hans talent. 29An myghtern a assentyas, hag a skrifas lyther dhe Yonathan a-dro dhe oll an traow ma dell siw:

30‘Myghtern Demetrius dhe Yonathan y vroder ha dhe genedhel an Yedhewon, salusyans. 31Henn yw dasskrif a'n lyther a skrifsyn y'th kever dhe Lasthenes agan kar, ha ni re'n skrifas dhiso ynwedh, rag may hylli godhvos an pyth usi ynno. 32“Myghtern Demetrius dhe Lasthenes y das, salusyans. 33Dhe genedhel an Yedhewon, yw agan kowetha hag a gollenow aga deverow dhyn, dhedha ni re erviras may hwryllyn da, drefenn an bolonjedh da re dhiskwedhons dhyn. 34Ni re fastyas dhedha pow Yudi ha'n tri ranndir Afairema ha Lydda ha Rathamin, yw treusworrys lemmyn dhe Yudi dhiworth Samaria, war-barth gans oll an tiryow kevogas, rag les oll an re a sakrifis yn Yerusalem, yn le an tollow ryel a gavas an myghtern anedha pub blydhen, a drevas an tir hag a froeth an gwydh. 35Hag alemma rag an talasow erell a dal bos res dhyn a'n degedhow, ha'n tollow a dal bos res dhyn, ha'n pyttow-hoelan, ha tollow an gurun a dal bos res dhyn – ni a's rydhha dhiworth oll an re ma. 36Ha ny vydh travyth a'n re ma defendys a'n termyn ma bys vykken. 37Ytho lemmyn gwayt may hwrylli dasskrif a hemma, ha bedhes res dhe Yonathan ha bedhes gorrys yn tyller hewel war an menydh sans.” ’

Bras Tryfo

38Pan welas Demetrius an myghtern bos an tir kosel a-ragdho ha nag esa enebieth orto, ev a wordhellos oll y soudoryon, pubonan dh'y dyller y honan, marnas an soudoryon estren re gavsa dhiworth ynysow an Jentilys. Ytho oll an soudoryon re servsa y dasow a'n kasas. 39Neb unn Tryfo re bia skoedhyer Aleksander kyns; ev a wodhya bos oll an gasoryon ow krodhvolas war Demetrius. Rag hemma ev eth dhe Imalkue an Arab, esa ow maga Antioghus, mab yowynk Aleksander, 40hag ev a ynnias warnodho yn fen may taskorra Antioghus dhodho rag mayth ella ha bos myghtern yn le y das. Dres henna ev a dherivas dhe Imalkue an pyth re wrussa Demetrius hag a-dro dhe'n kas a's tevo soudoryon Demetrius orto; hag ev a besyas ena lies dydh.

41Lemmyn Yonathan a dhannvonas dhe Demetrius an myghtern may kemmerra yn-mes soudoryon an tour dhiworth Yerusalem, ha soudoryon y'n dinasow krev, rag i dhe besya batalyas orth Ysrael. 42Ytho Demetrius a dhannvonas an messaj ma dhe Yonathan, ‘Ny vydh an traow ma yn unnsel a wrav ragos ha'th kenedhel, mes y rov enor meur warnas ha'th kenedhel, mar kavav an termyn gwiw. 43Ytho da a wredh mar tannvenydh gwer a'm gweres, rag oll ow soudoryon re rebellyas.’ 44Ytho Yonathan a dhannvonas dhodho tri mil wour krev dhodho dhe Antiogh, ha pan dheuthons dhe'n myghtern, an myghtern a lowenhas a'ga devedhyans.

45Ena tus an sita a omguntellas yn kres an sita, bys y'n niver a hwegh ugens mil, ha hwans a's tevo a ladha an myghtern. 46Mes an myghtern a fias y'n palys. Ena tus an sita a gemmeras stretys meur an sita hag a dhallathas omladh. 47Ytho an myghtern a elwis an Yedhewon dh'y weres, hag i oll a dheuth dhodho hag ena i a omlesas der an sita; hag i a ladhas y'n jydh na a-dro dhe gans mil. 48I a worras tan y'n sita ha sesya preydh meur y'n jydh na, hag i a sawyas an myghtern. 49Pan welas tus an sita an Yedhewon dhe gavoes maystri war an sita par dell vynnens, aga hardhder a fyllis hag i a grias dhe'n myghtern ow pysi, 50‘Gront dhyn kres, ha gwra mayth hettho an Yedhewon aga omsettyans er agan pynn hag erbynn agan sita.’ 51Hag i a dewlis aga arvow dhe'n leur hag a wrug kres. Ytho an Yedhewon a waynyas glori yn golok an myghtern hag oll an bobel yn y ruvaneth hag i a dhehwelis dhe Yerusalem gans meur a breydh.

52Ytho Demetrius a esedhas war dron y ruvaneth, ha'n tir o kosel a-ragdho. 53Mes Demetrius a naghas y ambos a-dro dhe oll re lavarsa; ev eth ha bos estren dhe Yonathan ha ny attylis an favours re beu gwrys ragdho mes ev a'n gwaskas fest yn tynn.

Tryfo a Syns an Maystri

54Wosa hemma Tryfo a dhehwelis, ha ganso an maw yowynk, Antioghus, neb a dhallathas reynya hag a omwiskas an gurun. 55Oll an soudoryon hag a wrug Demetrius aga tewlel dhe-ves a omguntellas a-dro dhodho hag i a vatalyas orth Demetrius, hag ev a fias dhe'n fo hag ev a veu fethys. 56Tyfo a gachyas an olifanses ha kavoes maystri war Antiogh. 57Ena an Antioghus yowynk a skrifas dhe Yonathan ow leverel, ‘My a'th fast avel arghoferyas ha'th settya war an peswar ranndir, hag y'th hwrav onan a gowetha an myghtern.’ 58Hag ev a dhannvonas dhodho lestri a owr ha daffar moes, ha grontya dhodho an gwir dhe eva a hanafow a owr ha dhe omwiska yn purpur ha dhe wiska bokyl a owr. 59Ev a apoyntyas Simon y vroder governour dhiworth Skeul Tyr bys yn oryon Ejyp.

Kaskyrghow Yonathan ha Simon

60Ena Yonathan eth yn-rag hag a vyajyas dres an avon hag yn mysk an sitys, hag oll lu Syria a omguntellas dhodho avel keffrysysi. Pan dheuth dhe Askalon, tus an sita a'n degemmeras gans enor meur. 61Alena ev a dhibarthas dhe Gaza mes tus an sita a'n degeas yn-mes. Ytho ev a omsettyas a-dro dhedhi ha leski hy mestrevow gans tan, ha'ga ravna. 62Ena pobel Gaza a bledyas gans Yonathan hag ev a ros dhedha ambosow a gres, ha kemmeres mebyon aga rewloryon avel goestlow ha'ga dannvon dhe Yerusalem. Hag ev a dremenas der an pow bys Damaskus.

63Yonathan a glewas soedhogyon Demetrius dhe dhos dhe Kadesh yn Galile gans lu bras ow mynnes y remova a'y soedh. 64Ev eth rag metya gansa, mes ev a asas y vroder Simon yn Yudi. 65Simon a gampyas a-rag Beth-sur hag a omsettyas er hy fynn lies dydh ha'y stroetha. 66Ena i a'n pysis may hwrontyo ambosow a gres, hag ev a'n gwrug. Ev a's removas alena, hag a gemmeras an sita hag a settyas bagas a soudoryon warnedhi.

67Yonathan ha'y lu a gampyas ryb dowrow Gennesaret. Myttin a-varr i a geskerdhas dhe blen Hasor, 68hag otta, lu an estrenyon a'n metyas y'n plen; i re settyas kontrewaytyans er y bynn y'n menydhyow, mes i aga honan a'n metyas fas orth fas. 69Ena an dus esa y'n kontrewaytyans a dheuth a'ga thylleryow hag a junyas y'n vatel. 70Oll an dus esa gans Yonathan a fias dhe'n fo; nyns esa nebonan vytholl gesys marnas Mattathias mab Absalom ha Yudas mab Kalfi, ledyoryon soudoryon an lu. 71Yonathan a skwardyas y dhillas ha gorra doust war y benn, hag a bysis. 72Ena ev a dreylyas arta dhedha rag batalyas hag a's fethas, hag i a fias dhe'n fo. 73Pan welas hemma y soudoryon esa ow fia, i a dhehwelis dhodho ha junya ganso ow helghya bys Kadesh, bys kamp an eskar, hag ena i a gampyas. 74A-dro dhe dri mil wour a'n Jentilys a goedhas y'n jydh na. Ha Yonathan a dhehwelis dhe Yerusalem.