Keffrysyansow gans Rom ha Sparta

1Ytho pan wodhya Yonathan an termyn dhe vos da ragdho, ev a dhewisas gwer ha'ga dannvon dhe Rom dhe fastya ha nowydhhe an kowethyans gansa. 2Ynwedh ev a dhannvonas lytherow gans an keth negys dhe'n Spartanys ha dhe dylleryow erell. 3Ytho i eth dhe Rom hag a entras yn chi an senedh ha leverel, ‘Yonathan an arghoferyas ha'n genedhel Yedhowek re'gan dannvonas dhe nowydhhe an kowethyans ha'n keffrysyans avel kyns.’ 4Ha'n Romanyon a ros lytherow dhedha dhe'n dus yn pub le, orth aga fysi dh'aga dannvon yn saw war aga hyns dhe bow Yuda.

5Hemm yw dasskrif an lyther a skrifas Yonathan dhe'n Spartanys: 6‘Yonathan an arghoferyas, senedh an genedhel, an oferysi, ha'n re erell a bobel an Yedhewon dh'aga breder an Spartanys, salusyans. 7Seulabrys y'n termyn tremenys lyther a veu dannvenys dhe Onias an arghoferyas dhiworth Arias, hag o myghtern yn agas mysk, ow leverel hwi dhe vos agan breder, par dell dhiskwa an dasskrif usi a-woeles. 8Onias a wolkommas an gannas gans enor, hag a dhegemmeras an lyther, esa ynno derivas kler a geffrysyans hag a gowethyans. 9Ytho kyn na'gan beus edhomm a'n traow ma, pan y'gan beus avel kennerth an lyvrow sans usi yn agan diwleuv, 10ni re omgemmeras may tannvennyn rag nowydhhe agan brederedh ha kowethyans, ma na ven ni gyllys estrenyon dhywgh, rag termyn hir re dremenas a-ban dhannvensowgh agas lyther dhyn. 11Rakhenna ni a berth kov ahanowgh pup-prys, keffrys yn agan goelyow hag yn dydhyow gwiw erell, ow perthi kov ahanowgh y'n sakrifisow a offrynnyn hag yn agan pysadow, dell yw gwiw hag ewn perthi kov a vrederedh. 12Ha ni a lowenha yn agas glori. 13Mes ni agan honan, lies galar ha lies bresel re'gan kylghyas; an vyghternedh yn agan kyrghynn re vatalyas orthyn. 14Ny vynnsyn agas trobla, na'gan keffrysysi ha kowetha erell gans an breselyow ma, 15rag ni a'gan beus an gweres a dheu a Nev rag agan gweres; ha ni re beu delivrys a'gan eskerens ha'gan eskerens a veu iselhes. 16Ytho ni re dhewisas Numenius mab Antioghus hag Antipater mab Yason, ha ni re's dannvonas dhe Rom rag nowydhhe agan kynsa kowethyans ha keffrysyans gansa. 17Ni re's erghis mos dhywgh hwi ynwedh ha'gas salusi ha ri dhywgh an lyther ahanan a-dro dhe nowydhheans agan brederedh. 18Ha lemmyn ni a'gas pys dannvon dhyn gorthyp dhe hemma.’

19Hemm yw dasskrif a'n lyther a dhannvonsons dhe Onias. 20‘Arius, myghtern Sparta, dhe Onias an arghoferyas, salusyans. 21Kevys re beu yn skrif a-dro dhe'n Spartanys ha'n Yedhewon i dhe vos breder, hag i dhe vos a deylu Abraham. 22Ha hemma godhvedhys genen lemmyn, skrifewgh dhyn ni a'gas pys, a-dro dh'agas sewena. 23Dh'agan parth ni, ni a skrif dhywgh agas chatel ha'gas pythow dhe vos dhyn, ha'gan re ni dhe vos dhywgh. Ytho ni a ergh dh'agan kannasow derivas dhywgh yndella.’

Kaskyrghow Erell Yonathan ha Simon

24Yonathan a glewas kaslewydhyon Demetrius dhe dhehweles gans lu brassa ages kyns, rag batalyas orto. 25Ytho ev a geskerdhas dhiworth Yerusalem hag a's metyas yn bro Hamath, rag na rolla dhedha chons vytholl dredho mayth omsettya yn y vro y honan. 26Ev a dhannvonas aspioryon dh'aga hamp, hag i a dhehwelis hag a dherivas dhodho an eskerens dhe vos arayys rag may hallens koedha war an Yedhewon y'n nos. 27Ytho pan sedhas an howl, Yonathan a worhemmynnis dh'y dus bos hewoel ha may kaffens aga arvow rybdha, rag may fens parys der an nos rag batel; hag ev a worras savleow-goelyadoryon yn kyrghynn an kamp. 28Pan glewas an eskerens bos Yonathan ha'y wer parys dhe'n vatel, own a's tevo hag i a borthas euth yn aga holonn, ytho i a enowis tanyow yn aga hamp ha kildenna.12:28 ha kildenna: Nyns usi an geryow ma yn re a'n dornskrifow. 29Mes ny'n godhya Yonathan ha'y dus kyns myttin, rag i a welas an tanyow ow leski. 30Ena Yonathan a's helghyas, mes ny dremenas dresta, drefenn i dhe dreusi an avon Elewtherus. 31Ytho Yonathan a dreylyas a-denewen erbynn an Arabyon yw henwys Zabadeanys, hag ev a's gweskis ha'ga ravna. 32Ena ev a dhisevis an kamp hag yth eth dhe Damaskus, ha keskerdhes der oll an pow.

33Simon eth yn-mes ynwedh ha keskerdhes der an tir bys Askalon ha'n dinasow a-ogas. Ev a dreylyas a-denewen dhe Yoppa hag ev a's kemmeras distowgh, 34rag ev re glewsa i dhe vos parys dhe ri an dinas dhe dus Demetrius. Hag ev a worras bagas a soudoryon ena rag y witha. 35Pan dhehwelis Yonathan ev a guntellas henavogyon an bobel hag y tewlis towl gansa may trehaffens dinasow yn Yudi, 36may trehaffens fosow hwath ughella, ha may trehaffens fos ughel ynter an tour ha'n sita rag hy diberth rag ma na alla soudoryon an tour na prena na gwertha. 37Ytho i a omguntellas dhe dhastrehevel an sita; rann an fos war an keynres a'n est re goedhsa, hag ev a ewnheas an rann o henwys Kafenatha. 38Simon a dhastrehevis Adida y'n Shefela; ev a'n keras hag a worras yetow gans barrys.

Tryfo a Dhalghenn Yonathan

39Tryfo a hwilas bos myghtern Asia ha gwiska an gurun, hag ystynn y leuv erbynn Antioghus an myghtern. 40Own a'n jevo na rolla Yonathan kummyas dhodho a wul yndella, mes martesen batalyas orto, ytho ev a besyas assaya y dhalghenna ha'y ladha, hag ev a geskerdhas yn-mes ha dos dhe Beth-shan. 41Yonathan eth yn-mes rag metya orto gans dew-ugens mil gasor flour, hag y teuth dhe Beth-shan. 42Pan welas Tryfo y tothya gans lu bras, own a'n jevo a ystynn y leuv er y bynn. 43Ytho ev a'n degemmeras gans enor hag a'n kommendyas dhe oll y gowetha ha'y soudoryon may fons gostydh dhodho par dell viens dhodho y honan. 44Ena yn-medh ev dhe Yonathan, ‘Prag y skwithsys oll an bobel ma, pan nag eson ow kwerrya? 45Dannvon i dhe-ves dh'aga thre ha dewis ragos nebes tus dhe wortas genes, ha deus genev dhe Ptolemais. My a's daskorr dhis keffrys ha'n dinasow erell ha remenant an soudoryon hag oll an soedhogyon, hag my a dreyl ha mos tre. Rag hemma yw an reson ow bos omma.’

46Yonathan a drestyas ynno hag y hwrug dell leveris; ev a dhannvonas y soudoryon dhe-ves hag i a dhehwelis dhe bow Yuda. 47Ev a withas ganso y honan tri mil wour hag anedha ev a asas dew vil yn Galile ha mil eth ganso. 48Mes pan entras Yonathan yn Ptolemais, tus Ptolemais a dhegeas an yetow ha'y dhalghenna, hag oll an re re entersa ganso a ladhsons gans an kledha.

49Tryfo a dhannvonas troeslu ha marghoglu bys yn Galile hag y'n plen bras rag diswul oll tus Yonathan. 50I a gonvedhas bos Yonathan dalghennys ha gyllys dhe goll war-barth ha'y dus; mes i a gennerthas an eyl y gila, hag i a geskerdhi yn aray stroeth, parys rag batel. 51Pan wodhya an re esa orth aga siwya i dhe omladh rag aga bewnans, i a gildennas. 52Ytho i oll dheuth dhe bow Yuda yn saw, hag i a gynis a-barth Yonathan ha'y gowetha hag i a borthas own bras; hag oll Ysrael a gynis yn town. 53An Jentilys yn aga hyrghynn a hwilas aga diswul, rag yn-medhons, ‘Ny's teves naneyl ledyer na gwereser. Lemmyn ytho gwerryn orta ha defendyn pub kovadh anedha dhiworth mab-den.’