1Yowann eth yn-bann a Gazara, hag ev a dherivas dh'y das Simon an pyth re wrug Kendebeus. 2Simon a elwis y dhew vab kottha Yudas ha Yowann, hag a leveris dhedha: ‘Ow breder ha my ha chi ow thas re vatalyas breselyow Ysrael a-dhia'gan yowynkneth bys y'n jydh hedhyw, ha traow re sewenis yn agan diwleuv, ow sawya Ysrael lieskweyth. 3Mes lemmyn gyllys koth ov, mes hwi dre versi Nev yw tevys dhe oes. Kemmerewgh ow le ha le ow broder, ha kewgh yn-mes hag omledhewgh a-barth agan kenedhel, ha bedhes an gweres hag a dheu a Nev genowgh.’

4Ytho Yowann a dhewisas yn-mes a'n pow ugens mil gasor ha marghoglu, hag i a geskerdhas erbynn Kendebeus. I a spenas an nos yn Modein. 5Myttin a-varr i a sevis hag a geskerdhas bys y'n plen, le mayth esa lu bras ow tos er aga fynn, troeslu ha marghoglu; hag yth esa keynres yntredha. 6Ena ev ha'y lu a sevis yn aray er aga fynn. Ev a welas bos dhe'n soudoryon own a dreusi an keynres, ytho ev a dreusis yn kynsa, ha pan wrug an wer y weles, i a dreusis war y lergh. 7Ena ev a rannas an lu hag a worras an marghoglu yn kres an troeslu, rag marghoglu an eskerens o pur lies. 8I a sonas an hirgern, ha Kendebeus ha'y lu a veu fesys; lies anedha a goedhas goliys ha'n remenant a fias bys y'n dinas. 9Y'n termyn na Yudas broder Yowann a veu goliys, mes Yowann a's helghyas bys pan dheuth Kendebeus dhe Kedron, re bia drehevys ganso. 10I a fias ynwedh y'n touryow esa yn prasow Azotus, ha Yowann a's loskas gans tan, hag a-dro dhe dhew vil anedha a goedhas. Ena ev a dhehwelis dhe Yudi yn saw.

Moldrans Simon ha'y Vebyon

11Lemmyn Ptolemi mab Abubus re bia apoyntys governour war blen Yeriko; ev a'n jevo gwithva vras a arghans hag a owr, 12rag ev o deuv an arghoferyas. 13Y golonn a veu ughelhes; ev a vynnas kavoes maystri war an pow, hag y hwrug towlow traytus erbynn Simon ha'y vebyon, rag ma's tiswrella. 14Lemmyn yth esa Simon ow kul tro hwithrans a drevow an pow hag ow tyghtya aga edhommow, hag yth eth yn-nans dhe Yeriko gans y vebyon Mattathias ha Yudas, y'n kans seytek ha tri-ugensves blydhen,16:14 134 kyns Krist. y'n unnegves mis, hemm yw an mis Shebat. 15Mab Abubus a's degemmeras yn fals y'n dinas byghan yw gelwys Dok, re dhrehevis ev; ev a ros dhedha gwledh vras, hag a gudhas gwer ena. 16Pan o Simon ha'y vebyon medhow, Ptolemi ha'y dus a sevis ha kemmeres aga arvow; i a stevyas war Simon yn hel an wledh ha'y ladha war-barth gans y dhew vab ha re a'y wesyon. 17Ytho ev a wrug ober a drayturi meur hag a attylis drog rag da.

Yowann a Hol Simon

18Ena Ptolemi a skrifas derivas a-dro dhe'n traow ma ha'y dhannvon dhe'n myghtern, orth y bysi may tannvonna kasoryon dhodho rag y weres, ha may taskorra dhodho an pow ha'n sitys. 19Ev a dhannvonas kasoryon erell dhe Gazara rag diswul Yowann; ev a dhannvonas lytherow dhe'n gaptenyon, owth ynnia warnedha junya ganso, rag may rolla dhedha arghans hag owr ha rohow. 20Hag ev a dhannvonas erell rag kemmeres Yerusalem ha menydh an tempel. 21Mes nebonan a boenyas kyns ha derivas dhe Yowann yn Gazara y das ha'y vreder dhe verwel, hag ‘Ev re dhannvonas tus dhe'th ladha jy ynwedh’. 22Pan glewas hemma fest dyegrys o; ev a settyas dalghenn y'n wer re dhothya rag y dhiswul, ha'ga ladha; rag ev a wodhya i dhe hwilas y dhiswul. 23Remenant gweythresow Yowann, y vreselyow ha'n oberow brav a wrug ev, ha drehevyans an fos a wrug ev, ha'y wriansow, 24skrifys yns yn kovadhow y arghoferyaseth, a-dhia'n termyn may feu gyllys arghoferyas wosa y das.