Tryghow Yudas

1Ena Yudas y vab, henwys Makkabeus, a sevis yn-bann yn y le. 2Oll y vreder hag oll re junsa gans y das a'n gweresas; yn lowenek yth esens ow patalyas a-barth Ysrael.

3Ev a gressyas glori y bobel.

Avel kowr ev a wiskas y lurik;

ev a omwrogysas gans arvwisk a vresel hag a vatalyas,

ow kwitha an kamp gans y gledha.

4Avel lew o yn y weythresow,

avel lewik owth usa war-lergh preydh.

5Ev a helghyas an dus dhilagha;

ev a loskas an re esa ow trobla y bobel.

6Tus dhilagha a gildennas rag own anodho;

oll oberoryon anlaghedh o konfondys;

ha delivrans a sewenis yn y leuv.

7Ev a hwerowhas lies myghtern,

mes ev a lowenhas Yakob gans y weythresow,

ha'y govadh yw benniges bys vykken.

8Ev a dremenas dre sitys Yuda;

ev a dhistruis an re dhidhuw yn-mes a'n tir;

ev a dreylyas sorr dhiworth Ysrael.

9Gerys-da o bys yn pennow an norvys;

ev a guntellas war-barth an re esa ow merwel.

10Apollonius a guntellas war-barth Jentilys ha lu bras a Samaria rag omladh erbynn Ysrael. 11Pan wodhya Yudas anodho, ev eth yn-mes dh'y vetya, hag ev a'n gweskis ha'y ladha. Lies a veu goliys hag a goedhas, ha'n re erell a fias dhe'n fo. 12Ena i a synsis aga freydhyow, ha Yudas a gemmeras kledha Apollonius, hag yth esa owth olahd ganso dre remenant y vewnans.

13Pan glewas Seron, kaslewydh lu Syria Yudas dhe guntelles routh vras, bagas a dus lel hag a wortas ganso ha mos dhe vatalyas, 14ev a leveris, ‘My a wra may fiv gerys-da, ha kavoes enor y'n wlaskor. My a vatal erbynn Yudas ha'y gowetha, hag a skornyas gorhemmynn an myghtern.’ 15Ena ev a dhallathas kaskyrgh, ha lu krev a dus dhidhuw eth yn-bann ganso rag y weres, rag tyli dial war an Ysraelysi.

16Pan dheuth nes dhe volgh Beth-horon, Yudas eth yn-mes dhe vetya orto gans bagas byghan. 17Mes pan welsons an lu ow tos rag metya orta, yn-medhons dhe Yudas, ‘Fatell yllyn ni, nebes dell on, batalyas orth routh mar veur ha krev? Ha skwith glan yth on, rag ny dhyb'syn travyth hedhyw.’ 18Yudas a worthybis, ‘Lies a yll bos kyrghynnys yn es gans nebes, rag yn golok Nev nyns eus dyffrans yntra sawya gans lies po gans nebes. 19Ny dheu trygh yn batel dre vraster an lu, mes nerth a dheu dhiworth Nev. 20I a dheu er agan pynn yn goeth meur hag yn anlaghedh rag agan distrui ni ha'gan gwragedh ha'gan fleghes, ha rag agan ravna, 21mes yth eson owth omladh a-barth agan bewnans ha'gan laghys. 22Ev y honan a's skwatt a-ragon, ha hwi, na berthewgh own anedha.’

23Kettell worfennas kewsel, ev a lemmis warnedha distowgh, ha Seron ha'y lu a veu skwattys a-ragdho. 24I a's chasyas war-nans yn bolgh Beth-horon bys y'n plen; eth kans anedha a goedhas, ha'n re erell a fias dhe bow an Filistysi. 25Ena tus a dhallathas perthi own a Yudas ha'y vreder, hag euth a goedhas war an Jentilys yn aga hyrghynn. 26Y er-da a dheuth dhe dhiwskovarn an myghtern, hag yth esa an Jentilys ow kewsel a vatelyow Yudas.

Towl Antioghus

27Pan glewas myghtern Antioghus an derivadow ma, fest serrys o; hag ev a dhannvonas ha kuntelles oll nerthow y wlaskor, lu fest krev. 28Ev a igoras y arghow ha ri gobrow unn vlydhen dh'y soudoryon hag erghi dhedha bos parys rag pub edhomm. 29Ena ev a welas bos gorfennys an arghans yn y dresorva, ha tollow an tir dhe vos byghan drefenn an strifow ha'n droglamm dres ganso war an tir dre dhefendya an laghys re bia a-dhia'n dydhyow a-varra. 30Prederus o na'n jeffo kemmys arghasow kepar ha dell y'n jevo kyns rag y gostow ha rag an rohow a ri yn hel moy es an vyghternedh kyns. 31Pur benndegys o; hag ev a erviras mos dhe Persia ha kemmeres trubyt an ranndiryow na ha kuntelles arghasow pals.

32Ev a asas Lysias, den a vri a linyeth ryel, war negysyow an myghtern a'n avon Ewfrates bys yn oryon Ejyp; 33hag ynwedh ev a'n apoyntyas dhe witha war Antioghus y vab bys pan dhehwella. 34Hag ev a dhelivras dhodho hanter a'y lu war-barth gans an olifanses, hag a ros dhodho kevarwoedhyans a-dro dhe oll a vynna ev dhe vos gwrys, hag yn arbennik a-dro dhe drigoryon Yudi ha Yerusalem. 35Y tegoedho dhe Lysias dannvon lu er aga fynn rag aga hisya ha distrui nerth Ysrael ha remenant Yerusalem, ha dilea an kov anedha a'n tyller. 36Y tegoedho dhodho ynwedh trevesiga estrenyon yn aga ranndir oll, ha lesranna aga thir. 37Ena an myghtern a gyrghas an hanter gesys a'y gasoryon hag eth a Antiogh y bennsita y'n seythves ha seyth-ugensves blydhen.3:37 165 kyns Krist. Ev a dreusis an avon Ewfrates hag yth eth der an ughella rannvroyow.

Pareusyans rag Batel

38Lysias a dhewisas Ptolemeus mab Dorymenes, ha Nikanor ha Gorgias, tus nerthek yn mysk kowetha an myghtern, 39hag a dhannvonas gansa dew-ugens mil a'n troeslu ha seyth mil a'n marghoglu rag mones yn pow Yuda ha'y dhistrui, par dell arghsa an myghtern. 40Ytho i eth dhe-ves gans aga lu oll, ha pan ens devedhys i a gampyas yn kyrghynn Emmaus y'n plen. 41Pan glewas gwikoryon an ranndir pyth o leverys anedha, i a dhros shour a arghans hag owr, ha kargharow, hag yth ethons dhe'n gamp rag kavoes an Ysraelysi avel kethyon. Ha soudoryon dhiworth Syria ha pow an Filistysi a junyas gansa.

42Lemmyn Yudas ha'y vreder a welas drogow dhe ynkressya ha'n soudoryon dhe gampya yn aga oryon. I a wodhya ynwedh an pyth re bia gorhemmynnys gans an myghtern rag kowldhistruyans an bobel. 43Mes yn-medhons an eyl dh'y gila, ‘Ewnyn ni diswrians agan pobel, hag omladh a-barth agan pobel ha'n sentri.’ 44An gemmynieth a veu kuntellys war-barth dhe ombareusi rag batel, ha dhe bysi tregeredh ha truedh.

45Anannedhys o Yerusalem avel gwylvos;

nyns e onan vytholl a'y fleghes naneyl dhe-ves nag a-ji,

trettys yn-dann droes o an sentri,

hag yth esa mebyon an estrenyon y'n tour;

annedh o rag an Jentilys.

Joy o kemmerys dhiworth Yakob;

An bib ha'n sowtri a fyllis.

46Ytho i a omguntellas ha mos dhe Mispa, a-dal Yerusalem, drefenn bos dhe Ysrael seulabrys tyller rag pysi yn Mispa. 47I a benysas y'n jydh na, hag a wiskas saghlenn hag a skattras lusu war aga fenn, hag a skwardyas aga dillas. 48Hag i a igoras lyver an lagha rag govynn kevarwoedhyans, par dell o us an Jentilys govynn orth imajys aga duwow. 49Dres henna i a dhros dillas oferyaseth ha'n kynsa froeth ha'n degedhow, hag i a dhros an Nazirysi re worfennsa aga dydhyow; 50hag i a grias yn ughel dhe Nev ow leverel,

‘Pandr'a wren gans an re ma?

Ple hwren ni aga doen?

51Trettys yw dha sentri dhe'n dor ha disakrys,

ha'th oferysi a gyn yn uvelder

52Hag otta, an Jentilys yw omguntellys er agan pynn rag agan distrui;

ty a woer an pyth a dewlons orthyn.

53Fatell yllyn ni sevel orta,

mar ny'gan gweresydh?’

54Ena i a sonas an hirgern ha garma gans garm ughel. 55Wosa hemma Yudas a apoyntyas ledyoryon an bobel, soedhogyon war vilyow ha kansow ha hanter kansow ha degow. 56Hag y leveris dhe'n re esa ow trehevel chiow, po a veu ambosys dhe dhemmedhi, po yth esens ow plansa gwinlannow, po yth ens ownek, may tehwellens peub dh'y dre, herwydh an lagha. 57Ena an lu a gerdhas dhe-ves ha kampya a'n dhyghowbarth dhe Emmaus.

58Ena Yudas a leveris, ‘Omwrogysewgh ha bedhewgh hardh. Bedhewgh parys myttin a-varr rag batalyas orth an Jentilys re omguntellas er agan pynn rag agan distrui ni ha'gan sentri. 59Gwell yw dhyn merwel yn batel ages gweles anfeus agan kenedhel ha'gan sentri. 60Mes dell vo y vodh yn nev, yndella y hwra ev.’