An Vatel yn Emmaus

1Gorgias a ledyas pymp mil wour ha mil varghek dhewisys, ha'n lu ma eth yn-mes y'n nos 2dhe goedha war gamp an Yedhewon ha'ga gweskel distowgh. Gwer dhiworth an tour o y gevarwoedhoryon. 3Mes Yudas a glewas anodho, hag ev ha'y gasoryon eth yn-mes rag gweskel lu an myghtern yn Emmaus, 4ha'n soudoryon hwath yn-mes a'n gamp. 5Gorgias a entras a-ji dhe gamp Yudas y'n nos, mes ny gavas nagonan ena, ytho ev a's hwilas y'n breow, rag y leveris, ‘Yma an re ma ow fia dhiworthyn.’

6Orth tardh an jydh Yudas a omdhiskwedhas y'n plen gans tri mil wour, mes ny's tevo arvwisk na kledhedhyow dell y's tevo hwans anedha. 7I a welas kamp an Jentilys, krev ha kerys, gans marghoglu yn kylgh a-dro dhedhi; ha'n wer ma o dyskys yn bresel. 8Mes Yudas a leveris dhe'n wer esa ganso, ‘Na berthewgh own a'ga myns, ha na skruthewgh pan omsettyons. 9Perthewgh kov fatell veu agan tasow sawys y'n Mor Rudh, pan y's helghyas Faro ha'y lu. 10Ha lemmyn kriyn dhe Nev rag may hwodhvyn mara'gan faver ha perthi kov a'y gevambos gans agan tasow ha brewi an lu ma a-ragon hedhyw. 11Ena an Jentilys oll a wodhvydh bos onan hag a dhaspren ha sawya Ysrael.’

12An estrenyon a dhrehevis aga dewlagas war-vann hag a's gwelas dell esons ow tos er aga fynn. 13Ytho i eth yn-mes a'n kamp dhe vatalyas. Ena an gasoryon gans Yudas a sonas aga hirgern, 14hag entra y'n gas gansa. An Jentilys a veu brewys hag a fias dhe'n plen, 15hag oll an re esa a-dhelergh a goedhas der an kledha. I a's chasyas bys yn Gazara, ha bys yn plenys Idumea, hag Azotus ha Yamnia; hag a-dro dhe dri mil anedha a goedhas. 16Ena Yudas ha'y gasoryon a dhehwelis dhiworth aga chasya. 17Ena y leveris dhe'n bobel, ‘Na vedhewgh kraf war-lergh preydh, rag yma batel a-ragon; 18yma Gorgias ha'y lu ogas dhyn y'n breow. Mes sevewgh lemmyn orth agan eskerens hag omledhewgh orta; hag a-wosa synsewgh an preydh yn kolonnek.’

19Pan esa Yudas hwath ow tiwedha y areth, bagas a omdhiskwedhas ow tos yn-mes a'n breow rag aspia. 20I a welas aga lu dhe vos fesys, ha'n Yedhewon dhe vos ow leski an kamp, rag an mog a veu gwelys a dhiskwedhas an pyth re hwarvia. 21Pan aswonnsons hemma, fest ownek ens, ha pan welsons ynwedh lu Yudas yn aray y'n plen rag batalyas, 22i oll a fias dhe'n fo yn tir an Filistysi. 23Ena Yudas a dhehwelis rag ravna an kamp, hag i a gemmeras meur a owr hag a arghans, hag a gweth liwek yn glas hag yn purpur morek ha rychys meur 24Pan esens ow tehweles i a gana hymnys, ha benniga Nev, ‘Rag ev yw da, rag y dregeredh a dhur bys vykken.’ 25Yndella Ysrael a'n jevo delivrans meur y'n jydh na.

Kynsa Kaskyrgh Lysias

26Re a'n estrenyon a dhienkas eth ha derivas dhe Lysias oll re hwarva. 27Pan y'n klewas penndegys o ha digennerthys, rag ny hwarvia dhe Ysrael par dell dowlsa, na nyns o gyllys traow dell re worhemmynnsa an myghtern dhodho.

28Y'n nessa blydhen ev a guntellas tri-ugens mil a wer dhewisys a'n troeslu, ha pymp mil a'n marghoglu rag aga fetha. 29I a dheuth bys yn Idumea ha kampya yn Beth-sur, ha Yudas a's dyerbynnas gans deg mil wour.

30Pan welas bos an lu krev, ev a bysis ow leverel, ‘Benniges osta, A Selwador Ysrael, neb a skwattyas omsettyans an kasor nerthek dre leuv dha was Davydh, hag a ros lu an Filistysi yn diwdhorn Yonathan mab Sowl, hag yn diwdhorn deger y arvow. 31Ytho dege an lu ma a-ji dre leuv dha bobel Ysrael, ha bedhens methek a'ga hasoryon ha'ga marghoglu 32Gwra aga lenwel a gilgieth, gwra dhe volder aga nerth teudhi; krenens yn aga diswrians. 33Gwra aga gweskel dhe'n dor gans kledha an re a'th kar; ha re'th wormelens oll hag a aswonn dha hanow gans hymnys.’

34Ena an dhew du a omsettyas, ha pymp mil wour a lu Lysias a goedhas; i a goedhas hag i owth omladh. 35Pan welas Lysias fethans y gasoryon ha kolonnekter lu Yudas, ha fatell ens parys po dhe vewa po dhe verwel, ev eth dhe Antiogh hag arveth soudoryon arvethesik rag omsettya yn Yudi arta gans lu hwath brassa.

Glanheans ha Sakrans an Tempel

36Ena Yudas ha'y vreder a leveris, ‘Otta! skwattys yw agan eskerens; deun yn-bann dhe lanhe an sentri ha'y sakra.’ 37Ytho an lu kowal a omguntellas ha mos yn-bann dhe venydh Sion. 38I a welas an sentri ynyal, an alter defolys, ha'n yetow leskys. Y'n klosyow i a welas plansow tevys kepar hag yn prysk, po kepar ha war onan a'n menydhyow. I a welas ynwedh chambouryow an oferysi diswrys. 39Ena i a y skwardyas aga dillas ha kyni gans drem meur, hag i a skattras lusu warnedha aga honan. 40I a goedhas gans aga fas war an dor. I a sonas an tokyn war an hirgern, hag a grias dhe Nev.

41Ena Yudas a erghis dhe wer omladh erbynn an re y'n tour bys pan ve an sentri glanhes. 42Ev a dhewisas oferysi dhinamm, lel dhe'n lagha, 43hag i a lanhas an sentri hag a worras dhe-ves an meyn defolys bys yn tyller avlan. 44I a omgusulyas pandr'a dhe wul gans alter an offrynnow leskys, re beu defolys, 45hag i a dybis may fedha an gwella towl hy distrui, ma na dhrolla mewl warnedha, rag an Jentilys re'n defolsa. Ytho i a dennas an alter dhe'n dor, 46ha gorra an meyn dhe denewen yn tyller gwiw war vre an tempel bys pan dheffa profoes dhe ervira a-dro dhedha 47Ena i a gemmeras meyn anhakkys, war-lergh an lagha, ha drehevel alter nowydh haval dhe'n kynsa. 48Ynwedh i a dhrehevis an sentri arta ha pervedh an tempel, hag i a sakras an klosyow. 49I a wrug lestri sans nowydh, hag a dhug an kantoler, an alter a ynkys ha'n voes y'n tempel. 50Ena i a loskas ynkys war an alter, hag enowi an lugern war an kantoler, dhe ri golow y'n tempel. 51I a worras an bara war an voes ha kregi an kroglennow yn-bann. Yndella i a worfennas oll an ober a omgemmersens.

52Myttin a-varr y'n pympes dydh warn ugens a'n nawves mis, yw an mis Kislev, y'n kans, ethves blydhen ha dew-ugens,4:52 164 kyns Krist. 53i a sevis hag offrynna sakrifis herwydh an lagha, war an alter nowydh a wrussens. 54Poran yn pennbloedh an jydh ma'n defolsa an Jentilys, y feu sakrys gans kanow ha telynnow ha sowtris ha symbalys. 55Oll an bobel a goedhas war aga fas ha gordhya ha benniga Nev, neb re wrug dhedha seweni. 56I a woelyas sakrans an alter eth dydh hag offrynna offrynnow leskys gans lowender; i a offrynnas offrynn kres ha grasyans. 57I a afinas tal an tempel gans kurunyow owrek ha boklers byghan; i a dhaswrug an yetow ha'n chambouryow rag an oferysi, hag i a wrug darasow ragdha. 58Yth esa lowender meur yn mysk an bobel, ha gorrys dhe-ves o mewl an Jentilys.

59Ena Yudas ha'y vreder ha'n kuntelles oll a Ysrael a erviras may hwoeller dydhyow sakrans an alter yn pub blydhen, dhe'n keth seson na, gans lowender ha joy, eth dydh, ow talleth a-dhia'n pympes dydh warn ugens a'n mis Kislev.

60Y'n termyn na i a geras menydh Sion gans fosow ughel ha touryow krev a-derdro rag na dheffa an Jentilys ha'ga threttya dhe'n dor dell wrussens kyns. 61Hag ev a worras soudoryon ena rag hy gwitha. Ynwedh ev a geras Beth-sur, rag hy gwitha, ma's teffa an bobel dinas a-dal Idumea.