Breselyow gans Poblow Erell

1Pan glewas an Jentilys oll a-derdro, an alter dhe vos drehevys ha'n sentri dhe vos sakrys par dell vedha kyns, fest serrys vons, 2hag i a erviras diswul agh Yakob esa trigys yn aga mysk. Ytho i a dhallathas ladha ha distrui yn mysk an bobel. 3Mes Yudas a werryas orth mebyon Esaw yn Idumea, yn Akrabattene, drefenn i dhe gontrewaytya Ysrael. Ev a's gweskis gans strekys poes ha'ga uvelhe ha'ga ravna. 4Ev a borthas kov ynwedh a sherewneth mebyon Bean, neb o antell ha maglenn dhe'n bobel, orth aga hontrewaytya war an fordhow meur. 5Deges vons ganso yn aga thouryow, hag ev a gampyas er aga fynn; ev a dos aga leun dhistrui, hag ev a loskas gans tan aga thouryow hag oll an re esa ynna. 6Ena ev a dreusis rag omsettya erbynn an Ammonysi, le may kavas bagas krev, ha tus pals ha Timothi aga ledyer. 7Ev a vatalyas fest yn fenowgh orta ha brewys ens a-ragdho; hag ev a's gweskis dhe'n dor. 8Ev a gemmeras ynwedh Yazer ha'y threvow; ena ev a dhehwelis dhe Yudi.

Delivrans Yedhewon Galile

9An Jentilys yn Gilead a omguntellas erbynn an Ysraelysi esa yn aga thir, rag aga distrui. Mes i a fias dhe dhinas Dathema, 10hag a dhannvonas dhe Yudas ha'y vreder lyther, ow leverel, ‘An Jentilys usi yn agan kyrghynn re omguntellas er agan pynn rag agan distrui. 11Ymons owth ombareusi may teffons ha kemmeres an dinas may fisyn dhodho hag yma Timothi ow ledya aga lu. 12Ytho dewgh dh'agan delivra dhiworth aga diwleuv, rag lies ahanan re goedhas, 13ha'gan breder oll hag a veu yn ranndir Tobias re beu ledhys; an eskerens re gemmeras aga gwragedh ha'ga fleghes ha'ga gwara, hag i re dhistruis a-dro dhe vil wour ena.’

14Yth esens ow lenna an lyther pan dheuth kannasow erell dhiworth Galile, skwardys aga dillas, a dheuth dhiworth Galile, hag i a dherivas dell siw: 15‘Tus dhiworth Ptolemais, Tyr, Sidon hag oll Galile an Jentilys re omguntellas rag agan kowlladha’ 16Pan glewas Yudas ha'n bobel an geryow ma, kuntelles bras a veu gelwys war-barth may fe ervirys pandr'a wrens a-barth aga breder esa yn ahwer ha hag yn-dann omsettyans gans eskerens. 17Yudas a leveris dhe Simon y vroder, ‘Dewis gwer ragos ha ke ha delirv dha vreder yn Galile; my ha'm broder Yonathan a dhe Gilead.’ 18Mes ev a asas Yosep mab Zekaria, hag Azaria, ledyer an bobel, gans remenant a'n lu yn Yudi rag hy gwitha, 19hag y ros dhedha an gorhemmynn ma, ‘Kemmerewgh charj war an bobel ma, mes na vatelewgh gans an Jentilys bys pan dhehwellyn.’ 20Tri mil wour a veu rynnys dhe Simon mayth ellen dhe Alile, hag eth mil wour dhe Yudas rag Gilead.

21Ytho Simon eth dhe Alile, hag ev a vatalyas lieskweyth erbynn an Jentilys, ha'n Jentilys a veu brewys a-ragdho. 22Ev a's helghyas bys yet Ptolemais, ha kemmys ha tri mil wour a'n Jentilys a goedhas, hag ev a gemmeras aga preydh. 23Ena ev a gemmeras Yedhewon Galile hag Arbatta, gans aga gwragedh ha'ga fleghes, hag oll a bewens, hag y's ledyas dhe Yudi gans lowender meur.

Yudas ha Yonathan yn Gilead

24Yudas Makkabeus ha Yonathan y vroder a dreusis an Yordan ha kerdhes tri dydh y'n gwylvos. 25I a dhyerbynnas tus a Nabatea neb a's metyas yn kres, hag i a dherivas dhedha oll re hwarva dh'aga breder yn Gilead. 26‘Lies anedha re beu deges yn Bosra ha Bezer, yn Alema ha Kaspo, Maked ha Karnaym’ – oll an sitys ma o kerys ha bras – 27‘ha re anedha re beu deges a-bervedh yn sitys erell a Gilead; yma an estren owth ombareusi mayth omsettyo war an dinasow a-vorow ha sesya ha distrui oll an dus ma a-ji dhe unn jydh.’

28Yudas ha'y lu a dreylyas war-dhelergh fest yn skav war fordh an gwylvos dhe Bosra; ev a gemmeras an sita hag a ladhas pub gorreydh gans min an kledha; ena ev a synsis oll aga freydh ha'y leski hi gans tan. 29Ev eth alena yn nos, hag yth ethons yn-rag bys dinas Dathema. 30Myttin a-varr, i viras yn-bann, hag otta tus dhiniver ow toen skeulyow ha jynnow-esedhva rag kemmeres an dinas, hag omsettya erbynn an dus ynni. 31Pan welas Yudas an gas dhe vos dallethys ha kri an sita dhe sevel dhe nev gans hirgern ha garmow ughel, 32yn-medh ev dhe wer an lu, ‘Omledhewgh y'n jydh ma a-barth agas breder.’ 33Ena av a dheuth a-dryv dhedha yn teyr bagas, hag i a hwythas aga hirgern ha kria yn ughel yn pysadow. 34Pan aswonnis lu Timothi y vos Makkabeus, i a fias dhe'n fo a-ragdho, hag ev a's gweskis gans strekys poes. Kemmys hag eth mil anedha a goedhas an jydh na.

35Alena ev a dreylyas a-denewen dhe Maafa5:35 Maafa: Po war-lergh dornskrifow erell Masfa po Alema. hag ev a omladhas er hy fynn ha'y hemmeres; ev a ladhas pub gorreydh ynni, hag ev a gemmeres hy freydh, ha'y leski gans tan. 36Alena ev a geskerdhas yn-rag ha kemmeres Kasfo, Maked ha Bosor, ha'n sitys erell a Gilead.

37Wosa an traow ma Timothi a guntellas lu arall hag a gampyas a-dal Rafon, a'n tu arall dhe'n keynres. 38Yudas a dhannvonas tus rag aspia an kamp, hag i a dherivas dhodho, ‘Oll an Jentilys yn agan kyrghynn re omguntellas dhodho; ost pur vras yw. 39Ynwedh i re wobrenas Arabyon rag aga gweres, hag ymons ow kampya a'n tu arall dhe'n keynres, parys dhe dhos ha dhe vatalyas orthis.’ Ytho Yudas eth dh'aga dyerbynna.

40Pan esa Yudas ha'y lu ow tos nes dhe'n keynres a dhowr, Timothi a leveris dhe soedhogyon y lu, ‘Mar treus ev dhyn yn kynsa, ny yllyn sevel orto, rag ev yn sur a wra agan fetha. 41Mes mar omdhiskwedh ownek ha kampya a'n tu arall dhe'n avon, ni a dreus dhodho ha'y fetha.’ 42Pan dheuth Yudas nes dhe'n keynres a dhowr, ev a settyas soedhogyon an lu ryb an keynres hag a worhemmynnis dhedha, ‘Gwaytyewgh na gampyo denvyth, mes gwrewgh dhedha oll entra dhe'n gas.’ 43Ena ev a dreusis orto yn kynsa, ha'n lu dien a'n holyas; an Jentilys a dorras aga aray a-ragdho; hag i oll a dewlis aga arvow dhe-ves hag a fias dhe'n sentri yn Karnaym. 44Ev a gemmeras an sita hag a loskas an sentri gans tan war-barth gans peub esa a-bervedh ynna. Yndella Karnaym a veu fethys; ny's tevo sevel a-rag Yudas na fella.

An Dehwelyans dhe Yerusalem

45Ena Yudas a guntellas oll an Ysraelysi esa yn Gilead, an re vyghan ha'n re vras, gans aga gwragedh ha'ga fleghes ha'ga daffar, bagas pur vras, rag mayth ellens dhe bow Yuda. 46I a dheuth dhe Efron, sita fest bras ha krev war an fordh, ha ny allsons mos a-dro dhedhi naneyl a-dhyghow nag a-gledh; res o dhedha mos dredhi. 47Mes tus an sita a's lettyas na entrons hag a stoppyas an yetow gans meyn.

48Yudas a dhannvonas dhedha gans geryow kres, ‘Gesewgh ni dhe dremena der agas tir ha dhe hedhes dh'agan tir ni. Ny wra nagonan drog dhywgh; lemen ni a dremen war droes.’ Mes i a naghas igeri dhodho. 49Ena Yudas a worhemmynnis may fo gwarnyans dhe'n lu may kampya peub y'n tyller mayth esa. 50Ytho gwer an lu a gampyas, hag ev a werryas erbynn an sita der oll an jydh ha der oll an nos, ha'n sita a veu delivrys yn y dhiwleuv. 51Ev a dhistruis pub gorreydh gans min an kledha, ha diwreydhya an sita ha kemmeres preydh anedhi. Ena ev a dremenas der an sita war gorfow an re ledhys.

52I a dreusis an Yordan dhe'n plen bras a-dal Beth-shan, 53ha Yudas a besyas ow kennertha an dreynyoryon hag ow kolonna an dus der oll an fordh bys pan hedhas dhe bow Yuda. 54Ytho i eth yn-bann dhe venydh Sion gans lowender ha joy, hag i a offrynnas offrynnow leskys, rag i dhe dhehweles yn saw; ny goedhsa onan vytholl anedha.

Yosep hag Azaria Fethys

55Ytho pan esa Yudas ha Yonathan yn Gilead, ha Simon y vroder yn Galile a-rag Ptolemais, 56Yosep mab Zakaria, hag Azaria, routers an lu, a glewas a'ga gweythresow hardh hag a'n vresel vrav re werrsens. 57Ytho y lavarsons, ‘Gwren ni hanow ragon ni agan honan ynwedh; deun ha gwerrya erbynn an Jentilys yn agan kyrghynn.’ 58Ytho i a dhellos gorhemmynnow dhe wer an lu esa gansa, hag i a geskerdhas erbynn Yamnia. 59Gorgias ha'y wer a dheuth yn-mes rag gwerrya er aga fynn yn kas. 60Ena Yosep hag Azaria a veu fesys hag a veu chasys bys oryon Yudi; kemmys ha dhew vil a bobel Ysrael a goedhas y'n jydh na. 61Yndella an bobel a borthas fethans meur, rag, ow tybi may hwrellens gweythres brav, ny woslowsons orth Yudas ha'y vreder. 62Mes nyns ens rann a deylu an keth wer na, dredha may feu res delivrans dhe Ysrael.

63An gour Yudas ha'y vreder a veu enorys yn fen yn oll Ysrael hag yn mysk oll an Jentilys, plepynag mayth o klewys aga hanow. 64Tus a omguntellas dhedha hag a's gormolas.

Sewena yn Hebron ha Filistia

65Ena Yudas ha'y vreder eth yn-mes hag a omladhas erbynn mebyon Esaw y'n tir a'n dhyghowbarth. Ev a weskis Hebron ha'y threvow hag a dennas dhe'n dor hy herweythyow hag a loskas hy thouryow a-derdro. 66Ena ev a geskerdhas dhe-ves rag mos yn pow an Filistysi, hag a dremenas dre Marisa. 67Y'n jydh na re a'n oferysi hag a's teves hwans dhe wul gweythres brav, a goedhas yn bresel, rag yth ethons dhe'n vatel yn anfur. 68Mes Yudas a dreylyas a-denewen dhe Azotus yn pow an Filistysi; ev a dennas dhe'n dor aga alteryow ha leski gans tan an imajys gravys a'ga duwow; ev a byllas an sitys hag ena ev a dhehwelis dhe bow Yuda.