Eskerdh Bagghides hag Alkimus

1Y'n kans unnek ha dew-ugensves blydhen7:1 161 kyns Krist. Demetrius mab Selewkus eth yn-mes dhiworth Rom, ha goelya gans nebes gwer dhe sita ryb an mor hag ena ev a dhallathas reynya. 2Ha pan esa owth entra dhe balys ryel y dasow, an lu a dhalghennas Antioghus ha Lysias dh'aga dri dhodho. 3Mes pan veu an gweythres aswonnys dhodho yn-medh ev, ‘Na gesewgh my dhe weles aga fasow!’ 4Ytho an lu a's ladhas, ha Demetrius a esedhas war dron y wlaskor.

5Ena y teuth dhodho oll an wer dhilagha ha didhuw a Ysrael; ledys vons gans Alkimus, a'n jevo hwans dhe vos ha bos arghoferyas. 6I a dhug dhe'n myghtern an kuhudhans ma: ‘Yudas ha'y vreder re ladhas oll a'gas kowetha, ha re'gan herdhyas yn-mes a'gan tir. 7Ytho dannvon gour may trestydh ynno; es ev ha gweles oll an diswrians a dhros Yudas warnan ha war dir an myghtern, ha gwres ev aga hessydhya i hag oll an re a's gweres’

8Yndella an myghtern a dhewisas Bagghides, onan a gowetha an myghtern, governour an ranndir Dres-an-Avon, gour meur y'n wlaskor, ha lel dhe'n myghtern. 9Ev a'n dannvonas, ha ganso an Alkimus, didhuw dell o, neb a'n gwrug arghoferyas; hag ev a worhemmynnis dhodho may tallfa dial war an Ysraelysi. 10Ytho i a geskerdhas dhe-ves hag a dheuth gans lu bras dhe bow Yuda; hag ev a dhannvonas kannasow dhe Yudas ha'y vreder gans geryow kres, yn fals. 11Mes ny goelsons orth aga geryow, rag i a welas i dhe dhos gans lu bras.

12Ena bagas a skribys a omdhiskwedhas a-rag Alkimus ha Bagghides rag pysi ma's teffa gwirvreus. 13An Hasideanys o an kynsa yn mysk an Ysraelysi ow pysi kres dhiworta, 14rag i a leveris, ‘Oferyas a linyeth Aron re dheuva gans an lu, ha ny wra dregynn dhyn.’ 15Hag Alkimus a gewsis geryow kres dhedha hag ev a dos dhedha an ti ma, ‘Ny hwilyn drog dhywgh hwi na dh'agas gowetha.’ 16Yndella i a drestyas ynno, mes ev a dhalghennas tri-ugens anedha hag a's ladhas a-ji dhe unn jydh, herwydh an ger a veu skrifys,

17‘Kig ha goes agas syns

i a skoellyas oll a-dro dhe Yerusalem,

ha nyns esa nagonan dh'aga ynkleudhyas.’

18Ena own hag euth anedha a goedhas war oll an bobel, rag y lavarsons, ‘Nyns eus na gwiryonedh na gwirvreus ynna, rag i re naghas an akord ha'n ti a dosons.’

19Ena Bagghides eth dhiworth Yerusalem hag a gampyas yn Beth-zayth. Ev a dhannvonas ha settya dalghenn yn lies a'n wer re gilfias dhodho, ha re a'n bobel, ha'ga ladha hag a's tewlis yn puth bras. 20Ev a settyas Alkimus war an tir ha gasa ganso soudoryon rag y weres; ena Bagghides a dhehwelis dhe'n myghtern.

21Alkimus a strivyas mayth ella ha bos an arghoferyas, 22hag oll re esa ow trobla aga fobel a junyas ganso. I a's tevo maystri war bow Yuda hag a wrug damaj meur yn Ysrael. 23Yudas a welas oll an drog re wrussa Alkimus ha'n re esa ganso yn mysk an Ysraelysi, moy o ages dell wrussa an Jentilys. 24Ytho ev eth der oll rannow Yudi a-derdro, ha tyli dial war an dus re gilfias, ha'ga lettya nag ellens y'n mes bys y'n pow. 25Pan welas Alkimus bos Yudas ha'n re esa ganso gyllys ha bos krev, ha pan wodhya na ylli ev sevel er aga fynn, ev a dhehwelis dhe'n myghtern hag a dhug kuhudhans a dhrog daklow er aga fynn.

Nikanor yn Yudi

26Ena an myghtern a dhannvonas Nikanor, onan a'y bennsevigyon enorys, neb a gasa ha hatya Ysrael, ha gorhemmynna dhodho distrui an bobel. 27Nikanor a dheuth dhe Yerusalem gans lu bras hag a dhannvonas dhe Yudas ha'y vreder an messaj ma a gres, yn fals. 28‘Bynner re bo omladh yntra my ha ty; yth av gans nebes gwer dhe'th weles, ganow orth ganow yn kres.’

29Ytho ev a dheuth dhe Yudas hag i a salusyas yn eyl y gila yn kres. Mes an eskerens o parys dhe gibya Yudas. 30Godhvedhys veu dhe Yudas y tothya Nikanor dhodho gans fals vynnas, hag own bras a berthi anodho, ha ny vynna metya orto arta. 31Pan wodhva Nikanor y dowl dhe vos diskwedhys, yth eth yn-mes rag metya erbynn Yudas yn batel ogas dhe Kafar-salama. 32A-dro dhe bymp kans gour a lu Nikanor a goedhas, ha'n remenant a fias dhe sita Davydh.

Nikanor a Wodros an Tempel

33Wosa an darvosow ma Nikanor eth yn-bann dhe venydh Sion. Re a'n oferysi a dheuth yn-mes a'n sentri, hag ynwedh nebes a henavogyon an bobel dh'y salusi yn kres ha rag diskwedhes dhodho an offrynn leskys esa ow pos offrynnys rag an myghtern, 34Mes ev a wrug ges anedha ha hwerthin orta ha'ga defola, ow postya, 35hag yn sorr ev a dos ti, ‘Marnas Yudas ha'y lu dhe vos delivrys yn ow diwleuv a-dhistowgh, my a lesk an chi ma pan dhehwelav yn kres.’ Hag yth eth yn-mes yn sorr meur. 36Ena an oferysi a entras ha sevel a-rag an alter hag a-rag an tempel hag i a oelas hag a leveris,

37‘Ty a dhewisas may fe an chi ma gelwys gans dha hanow,

ha may fe ev chi a bysi hag a aspysadow rag dha bobel.

38Tal dial war an den ma ha war y lu,

ha koedhens gans an kledha;

porth kov a'ga blasfemiow,

ha na as i dhe vewa na fella.’

Mernans Nikanor

39Ytho Nikanor eth yn-mes a Yerusalem hag a gampyas yn Beth-horon, ha lu Syria a junyas ganso. 40Yudas a gampyas yn Adasa gans tri mil wour. Ena Yudas a bysis hag a leveris, 41‘Pan gewsis kannasow an myghtern7:41 an myghtern: Henn yw Sennagherib, 2My 18:17–19:35. blasfemi, dha el eth yn-rag hag a weskis dhe'n dor kans mil ha pymp ha peswar-ugens a'y soudoryon. 42Ytho skwatt an lu ma ynwedh a-ragon y'n jydh ma, ha dyskes an re erell Nikanor dhe gewsel yn trog erbynn dha sentri, ha breus ev herwydh y dhroktra ma.’

43An luyow a vetyas yn batel yn trydhegves dydh an mis Adar. Lu Nikanor a veu skwardys hag ev y honan a veu an kynsa ow koedha y'n vatel. 44Pan welas lu Nikanor ev dhe goedha, i a dewlis aga arvow dhe'n dor ha fia. 45An Yedhewon a's chasyas bys Gazara, pellder kerdh unn jydh a Adasa, ow hwytha aga hirgern avel galow dhe vatel. 46Tus a dheuth yn-mes a oll an trevow a Yudi a-derdro, hag i a omsettyas erbynn aga thenwennow, ha'ga herdhya war-tu ha'ga holyoryon, hag i oll a goedhas gans an kledha; ny veu onan vytholl gesys. 47Ena an Yedhewon a gemmeras an arvow ha'n preydh; i a dhibennas Nikanor ha treghi an leuv dyghow dhiworto re ystynnsa mar valgh, ha'ga dri ha'ga displetya a-dal Yerusalem. 48An bobel a lowenhas gans lowender meur hag a woelyas an jydh na avel dydh a heudhder bras. 49Hag i a erviras may fe an jydh na solempnys pub blydhen y'n trydhegves dydh a Adar. 50Ytho pow Yuda a'n jevo powes nebes dydhyow.