Kanmola a'n Romanyon

1Yudas a glewas a vri an Romanyon, i dhe vos fest krev, hag i dhe favera kemmys a wrug kevambos gansa, i dhe ambosa kowethyans dhe'n re a dheuth dhedha, 2hag i dhe vos fest krev. Tus a gewsis dhodho a'ga breselyow, hag a'ga gwrythyow yth esens orth aga gul yn mysk an Galyon ha fatell y's fethsens ha'ga gorra yn-dann drubyt, 3ha pandr'a wrussens yn pow Spayn rag may kaffens maystri war an owregi ha'n arghansegi ena, 4ha fatell gavsens maystri war oll an ranndir der aga thowlow ha perthyans, kyn fe an tyller fest pell anedha; hag ynwedh war an vyghternedh hag a dheuth er aga fynn dhiworth pennow an norvys, bys ma's brewsons ha'ga gweskel gans strokosow bras; an remenant a dela an trubyt pub blydhen.

5Felip ha Perseus myghtern Kittim,8:5 Kittim: An styr omma yw Makedonia. ha'n re erell a sevis er aga fynn, i a's brewis yn batel hag a's fethas. 6Ynwedh i a fethas Antioghus Veur, myghtern Asia, neb eth yn-mes rag batalyas orta gans kans olifans hag ugens, ha gans marghoglu ha charettow ha lu fest bras. Ev a veu brewys gansa; 7i a'n kemmeras bew hag a worhemmynnis may tallfa ev, ha'n re a vedha ow reynya war y lergh ynwedh, trubyt poes, ha may rollens goestlow ha mayth hepkorrens re a'ga gwella ranndiryow, 8bro Eynda ha Media ha Lydia. An re ma a gavsons dhiworto ha'ga ri dhe Ewmenes an myghtern. 9An Grekys a dewlis towl a dhos rag aga distrui, 10mes hemma eth ha bos godhvedhys dhedha hag i a dhannvonas pennhembrenkyas er aga fynn, ha batalyas orta. Lies anedha a veu goliys hag a goedhas, ha'n Romanyon a gemmeras aga gwragedh ha'ga fleghes avel kethyon; i a's pyllas, ha fetha aga thir, ha tenna dhe'n dor aga dinasow, hag a's gwrug kethyon bys y'n jydh ma. 11Remenant an gwlaskordhow ha'n ynysow, kemmys a savsens orta bythkweth, i a dhistruis ha kemmeres yn kethneth; 12mes gans aga howetha ha gans an re a fydhyas ynna i a withas kowethyans.

I a fethas myghternedh ogas ha pell, ha kemmys a glewas a'ga bri a borthas own anedha. 13Myns a vynnons gweres ha gul myghternedh y hwrons myghternedh, ha myns a vynnons i a worr yn-mes aga thronys; hag yndella i re dheuth ha bos pur nerthek. 14Byttegyns yn despit dhe hemma oll, ny wiskas nagonan anedha diadem nag omwiska yn purpur avel tokyn a woeth, 15mes i re dhrehevis ragdha aga honan chi senedh, ha pub dydh tri hans hag ugens a senedhoryon a omgusul prest a-dro dhe'n bobel rag aga governa yn ta. 16Pub blydhen i a drest yn unn den dh'aga rewlya ha dhe routya oll aga thir; i oll a woslow orth an unn den ma, ha nyns eus atti nag avi vytholl yn aga mysk.

Keffrysyans gans Rom

17Yndella Yudas a dhewisas Ewpolemus mab Yowann mab Akkos, ha Yason mab Eleazar, hag a's dannvonas dhe Rom rag gul kowethyans ha keffrysyans, 18ha rag omdhelivra dhiworth an yew, rag i a welas bos gwlaskor an Grekys ow kul Ysrael kethyon yn tien. 19I eth dhe Rom, vyaj pur bell, hag i eth a-ji dhe ji an senedh ha leverel, 20‘Yudas henwys Makkabeus ynwedh, ha'y vreder ha pobel an Yedhewon re'gan dannvonas dhywgh rag gul keffrysyans ha kres genowgh, rag may fen omrolys avel agas keffrysysi ha kowetha.’ 21An gusul a veu plegadow gansa; 22ha hemm yw dasskrif an lyther a skrifsons war leghennow a vrons hag a dhannvonsons dhe Yerusalem may fe gansa avel kovadh a gres ha keffrysyans.

23‘Bedhes sewena gans an Romanyon ha gans kenedhel an Yedhewon yn mor hag yn tir bys vykken, ha bedhes kledha hag eskar pell dhiworta. 24Mar teu bresel yn kynsa dhe Rom po dhe onan pynag a'ga heffrysysi yn aga mestrynses oll, 25ena kenedhel an Yedhewon a wra oberi avel aga heffrysysi a leun golonn, dell dhiskwettho an prysweyth dhedha. 26Ha dhe'n eskerens a vresel, ny rons na provia naneyl greun nag arvow, naneyl arghans na gorholyon, dell re erviras Rom, ha res vydh dhedha gwitha aga ambosow, heb degemmeres pewasow vytholl yn attal. 27Yn keth vaner, mar teu bresel yn kynsa dhe wlaskor an Yedhewon, an Romanyon a wra oberi yn lowen avel aga heffrysysi, dell dhiskwettho an prysweyth dhedha, 28Ha dhe'n eskerens ny rons na provia naneyl greun nag arvow, naneyl arghans na gorholyon, dell re erviras Rom, ha res vydh dhedha gwitha aga ambosow, heb degemmeres pewasow vytholl yn attal. 29War-lergh an ambosow ma an Romanyon a wra kevambos gans pobel an Yedhewon. 30Wosa an ambosow ma dhe vos gwrys, mar mynn an dhew vagas ervira keworra neppyth po y dhefendya dhe-ves, i a'n gwra war-lergh aga husul aga honan, ha pub keworrans po defendyans dhe-ves a vydh laghel.

31‘Hag a-dro dhe'n dhrokoleth usi myghtern Demetrius orth hy gul orta, ni re skrifas dhodho dell siw, “Prag y hwrussys jy dha yew poes war agan kowetha ha keffrysysi an Yedhewon? 32Ytho mar pysons gweres arta er dha bynn, ni a dhefend aga gwiryow hag a vatal orthis yn mor hag yn tir.” ’