Bagghides a Dhehwel dhe Yudi

1Demetrius, pan glewas Nikanor ha'y lu dhe goedha yn batel, a dhannvonas Bagghides hag Alkimus yn pow Yuda an nessa prys, ha gansa askell dhyghow an lu. 2I a gerdhas war an fordh a led dhe Gilgal hag i a gampyas erbynn Mesoloth yn Arbela, hag i a's kemmeras ha ladha tus pals 3Y'n kynsa mis y'n kans ha dew ha dew-ugensves blydhen9:3 160 kyns Krist. i a gampyas erbynn Yerusalem; 4hag alena i a geskerdhas dhe Berea gans ugens mil a'n droeslu ha dew vil a'n marghoglu.

5Lemmyn yth esa Yudas ow kampya yn Elasa, ha ganso yth esa tri mil wour dewisys. 6Pan welsons myns bras an lu, own meur a's tevo, ha lies anedha a slynkyas dhe-ves a'n kamp, bys pan nag esa gesys moy es eth kans gour.

7Pan welas Yudas y lu dhe slynkya dhe-ves, hag yth esa an vatel orth y waska, ev a veu brewys yn spyrys, rag ny'n jevo spas rag ma's kuntella. 8Gyllys digolonnek o, mes y leveris dhe'n remenant, ‘Sevyn ha deun erbynn agan eskerens. Martesen y hyllyn batalyas orta.’ 9I a assayas y gusulya na'n gwrella, ow leverel, ‘Nyns on ni abel; sawyn agan bewnans agan honan lemmyn, ha dehwelyn a-wosa gans agan breder ha batalyas orta; re nebes yth on.’ 10Mes Yudas a leveris, ‘Pell re bo dhiworthyn gul yndella, ow fia anedha. Mars yw devedhys agan termyn, merwyn brav a-barth agan breder heb gasa acheson vytholl may fo kuhudhans erbynn agan enor.’

Diwettha Batel Yudas

11Ena lu Bagghides a geskerdhas a'n kamp hag a sevis yn aray erbynn an eskar. An marghoglu a veu rynnys yntra dew bara, ha'n dowlbrennyoryon ha'n sethoryon eth a-rag an lu, par dell wrug oll an benngasoryon. 12Yth esa Bagghides war an askell dhyghow. Gans an marghoglu war an dhew denewen, an troeslu eth yn-rag ha'n hirgern ow seni; ha'n dus esa gans Yudas a sonas aga hirgern ynwedh. 13An dor a grysyas gans tros an luyow, ha'n vatel a gonneri a vyttin bys gorthugher.

14Yudas a welas bos Bagghides ha nerth y lu a'n tu dyghow; ena oll an dus kolonnek eth ganso, 15hag i a vrewis an askell dhyghow, hag ev a's chasyas bys venydh Azotus. 16Pan welas an re esa war an askell gledh bos an askell dhyghow brewys, i a dreylyas hag a holyas yn ogas war-lergh Yudas ha'n re ganso. 17An vatel o gyllys tynn, ha lies a'n eyl tu ha'y gila a veu goliys hag a goedhas. 18Yudas ynwedh a goedhas, ha'n remenant a fias dhe'n fo.

19Ena Yonathan ha Simon a gemmeras Yudas aga broder ha'y ynkleudhyas yn bedh aga thasow yn Modein, 20hag i a oelas ragdho. Hag oll Ysrael a gynyas meur ragdho, orth y alari lies dydh, hag i a leveris,

21‘Ass yw koedhys an galloesek,

selwador Ysrael!’

22Gweythresow erell Yudas ha'y vreselyow ha'n oberow brav a wrug ev, ha'y vrastereth, ny vons skrifys, mes pur lies ens.

Yonathan a Hol Yudas

23Wosa mernans Yudas an re dhilagha a dheuth yn-mes yn pub rann a Ysrael, hag oll an oberoryon a gammhynseth a sevis yn-bann. 24Y'n dydhyow na divoetter pur vras a hwarva, ha pobel an vro a gilfias dhe'n eskerens. 25Bagghides a dhewisas an re dhidhuw hag a's gwrug rewloryon war an pow. 26I a hwilas ha helghya kowetha Yudas, ha'ga dri dhe Bagghides hag ev a dylis dial warnedha, hag a wrug ges anedha. 27Ena yth esa ahwer meur yn Ysrael, a'n sort na via godhvedhys a-dhia'n termyn mayth astelas an brofoesi omdhiskwedhes yn aga mysk.

28Ena oll kowetha Yudas a omguntellas ha leverel dhe Yonathan, 29‘A-dhia vernans dha vroder Yudas ny veu nagonan a'y bar rag mos erbynn agan eskerens ha Bagghides, ha rag dyghtya gans an re agan kenedhel a'gan kas. 30Ytho lemmyn ni re'th tewisas dhe gavoes y tyller avel agan rewler ha ledyer, rag batalyas ragon ni.’ 31Ha Yonathan a assentyas dhe vos ledyer hag ev a gavas tyller Yudas y vroder.

Kaskyrghow Yonathan

32Pan wodhva Bagghides bos henna an kas, ev a hwilas y ladha. 33Mes Yonathan ha Simon, y vroder, hag oll esa gansa a glewas yn y gever, hag y fisons dhe wylvos Tekoa ha kampya orth dowr poll Asfar. 34Bagghides a dhiskudhas hemma y'n sabot, hag ev hag oll y lu a dreusis an Yordan.

35Ha Yonathan a dhannvonas y vroder avel ledyer an routh hag y pysis tus Nabatea, an re o y gowetha, may rollens kummyas dhe witha gansa an myns bras a fardellow o dhedha. 36Mes an Yambrysi a dheuth yn-mes a Medeba hag a gibyas Yowann ha pup-tra esa ganso hag omdenna gansa.

37Wosa an traow ma i a dherivas dhe Yonathan ha dhe Simon y vroder, ‘Yma an Yambrysi ow solempnya demmedhyans bras, hag yth esons ow tri an venyn bries, myrgh onan a'n ugheloryon veur a Kanan, dhiworth Nadabath gans hembrenkysi pals.’ 38Ow perthi kov a woes Yowann aga broder, i eth yn-bann hag omgudha yn-dann gudhans an menydh. 39I a dhrehevis aga dewlagas ha mires, ha gweles keskerdh tervansus gans meur a fardellow, ha'n gour pries a dheuth yn-mes gans y gowetha ha'y vreder rag metya orta gans tabouryow ha menestrouthi ha gans arvow pals. 40Ena i a boenyas warnedha dhiworth an kontrewaytyans ha dalleth aga ladha. Lies a veu goliys hag a goedhas, ha'n remenant a fias dhe'n menydh; hag i a gemmeras aga gwara oll. 41Yndellma an demmedhyans a veu treylys dhe alar, ha son an menestrouthi dhe gynvann. 42Ha pan dalviens dial yn tien a woes aga broder, i a dhehwelis dhe geunegi an Yordan.

43Pan glewas Bagghides a henna, ev a dheuth gans bagas bras krev yn dydh an sabot dhe lannow an Yordan. 44Ha Yonathan a leveris dhe'n re esa ganso, ‘Sevyn lemmyn hag omledhyn rag agan bewnans, rag y'n jydh hedhyw nyns yw traow dell vedhens de ha dygynsete. 45Rag otta! yma an vatel a-ragon, hag a-dryv dhyn yma dowr an Yordan, gans keunegi ha prysk dhe'n dhew denewen; nyns eus tyller dhe dreylya. 46Germewgh lemmyn dhe Nev may fowgh delivrys dhiworth diwla agan eskerens.’ 47Ytho an vatel a dhallathas ha Yonathan a ystynnas y leuv dhe weskel Bagghides, mes ev a dhienkas dhiworto ha mos dhe'n delergh 48Ena Yonathan ha'n re esa ganso a lammas y'n Yordan ha neuvya dhe'n lann arall, ha ny dreusis an eskerens an Yordan war aga lergh. 49Hag a-dro dhe vil a wer Bagghides a goedhas an jydh na.

Bagghides a Dhrehav Kerweythyow

50Ena Bagghides a dhehwelis dhe Yerusalem hag a dhrehevis sitys kerys yn Yudi: an kerweythyow yn Yeriko, Emmaus, Beth-horon, Bethel, Timnath-farathon, ha Tefon, gans fosow ughel ha yetow ha barrys. 51Ev a worras ynwedh kasoryon ynna rag arvedh Ysrael.

52Ev a geras ynwedh an sita Beth-sur, ha Gazara, ha'n tour, hag ynna ev a worras kasoryon ha gwithvaow a voes. 53Hag ev a gemmeras mebyon ledyoryon an pow avel goestlow hag a's gorras yn-dann with y'n tour yn Yerusalem. 54Y'n kans ha trydhek ha dew-ugensves blydhen,9:54 159 kyns Krist. y'n nessa mis, Alkimus a worhemmynnis may fe fos klos a-bervedh an sentri terrys dhe'n dor. Yndella ev a dorras dhe'n leur ober an brofoesi. 55Mes ny wrug marnas dalleth hy therri dhe'n dor, rag y'n prys na Alkimus a veu gweskys, ha'y ober a veu lettys, rag tegys veu y anow ha palsyes veu bys na ylli na fella leverel ger na gorhemmynn a-dro dhe'n chi. 56Hag Alkimus a verwis y'n termyn na yn payn meur. 57Pan wodhva Bagghides bos Alkimus marow ev a dhehwelis dhe'n myghtern ha pow Yuda a's tevo powes diw vlydhen.

Diwedh an Vresel

58Ena oll an re dhilagha a wrug towl hag a leveris, ‘Otta! Yma Yonathan ha'y dus ow pewa yn kosel hag yn fydhyans. Ytho dren ni Bagghides arta, hag ev a's dalghenn oll anedha a-ji dhe unn nos.’ 59Hag yth ethons hag omgusulya ganso. 60Ev a dhallathas dos gans lu krev, hag a dhannvonas lytherow yn-dann gel dhe oll y geffrysysi yn Yudi, orth aga gorhemmynn may talghennens Yonathan ha'n re ganso, mes ny allsons y wul drefenn aga thowl a deuth ha bos godhvedhys. 61Hag gwer Yonathan9:61 gwer Yonathan: Greka i. a dhalghennas a-dro dhe hanter kans gour a'n pow o ledyoryon y'n trayturi, hag i a's ladhas.

62Ena Yonathan ha'n re ganso, ha Simon, a omdennas dhe Beth-basi y'n gwylvos; ev a dhastrehevis an rannow anedhi re bia terrys yn-nans, hag i a's keras. 63Pan glewas Bagghides hemma, ev a guntellas oll y lu hag a dhannvonas gorhemmynnow dhe dus Yudi. 64Ena ev a dheuth ha kampya erbynn Beth-basi; ev a vatalyas orti lies dydh hag ev a wrug lies jynn-esedhva.

65Mes Yonathan a asas Simon y vroder y'n sita, hag ev eth yn-mes dhe'n pow, gans niver byghan a wer. 66Ev a elwis war9:66 elwis war: Amendys. Greka weskis. Omdomera ha'y vreder ha mebyon Fasiron yn aga thyldow dh'y junya. 67Ena ev a dhallathas gweskel hag yth eth y'n vatel gans y gasoryon; ha Simon ha'n re ganso eth yn-mes a'n sita hag a worras tan y'n jynnow-esedhva. 68I a vatalyas orth Bagghides, hag ev a veu brewys gansa. I a'n gwaskas yn fen, rag y dowl ha'y eskerdh re bia euver. 69Ytho sorr meur a'n jevo orth an wer dhilagha re'n kusulsa may teffa y'n vro, hag ev a ladhas lies anedha. Ena ev a erviras mos dh'y bow y honan.

70Pan glewas Yonathan hemma, ev a dhannvonas kannasow dhe Bagghides9:70 dhe Bagghides: Greka dhodho. rag gul kres ganso ha dhe gavoes delivrans an gethyon. 71Ev a assentyas hag a wrug par dell leveris; hag ev a dos dhe Yonathan na hwilla y aperya hedre vewa. 72Ev a dhaskorras dhodho an gethyon re gemmersa kyns a bow Yuda; ena ev a dreylyas hag eth dh'y bow y honan, ha ny dheuth na fella yn aga thir. 73Yndella an kledha a hedhis dhiworth Ysrael. Yonathan a drigas yn Mikmash. Hag ev a dhallathas breusi an bobel, hag ev a dhistruis an re dhidhuw yn-mes a Ysrael.