An Men Bew ha'n Genedhel Sans

1Ytho, gorrewgh dhe-ves pub drog ha pub toell ha falsuri hag avi ha pub kabel. 2Kepar ha fleghes nowydh genys, hwansewgh leth spyrysel pur may teffowgh dhe selwyans2:2 War-lergh re a'n dornskrifow nyns usi omma dhe selwyans. dredho, 3mar kwrussowgh tastya bos an Arloedh kuv.

4Dewgh dhodho, men bew skonys gans mab-den mes dewisys gans Duw ha drudh. 5Ha hwi ynwedh, kepar ha meyn bew, omdhrehevewgh hwi dhe vos chi spyrysel, oferyaseth sans, dhe offrynna sakrifisow spyrysel kemmeradow dhe Dhuw dre Yesu Krist. 6Rag skrifys yw y'n Skryptor,

‘Otta, my a worr yn Sion men,

pennmen dewisys, drudh,

ha neb a grys ynno ny'n jevydh meth.’

7Ytho an enor ma yw dhywgh hwi neb a grys; mes dhe'n re na grys,

‘An men a skonyas an weythoryon

res eth ha bos penn an korn’,

8ha,

‘Men a wra dhe dhen trebuchya,

ha karrek a offens.’

I a goedh rag nyns yns i gostydh dhe'n ger. Henna a veu aga thenkys.

9Mes hwi yw agh dhewisys, oferyaseth ryel, kenedhel sans, pobel arbennik dhodho, may hyllowgh deklarya an gwriansow marthys a neb a'gas gelwys yn-mes a dewlder a-bervedh yn y wolow marthys.

10Ny vewgh hwi pobel seulabrys,

mes lemmyn pobel Duw owgh hwi.

Ny dhegemmersowgh piteth,

mes lemmyn piteth re dhegemmersowgh.

Bewewgh avel Servysi Duw

11Karadowyon, my a'gas pys avel alyons ha divresow mayth omwithewgh rag hwansow an kig a wra gwerrya erbynn an enev. 12Bedhes da agas bewedh yn mysk an Jentilys; ena kyn kewsons er agas pynn avel drogoberoryon, y hyllons gordhya Duw yn dydh y dhevedhyans,2:12 dhevedhyans: Greka yn dydh (an) visitasyon. pan welons agas gwriansow da.

13Bedhewgh gostydh a-barth an Arloedh dhe bub awtorita fondys gans mab-den, po dhe vyghtern avel penn-router 14po dhe rewloryon yw dannvenys ganso dhe gessydhya drogoberoryon, mes dhe wormel masoberoryon. 15Rag yndella yw bodh Duw, may hyllowgh hwi, ow kul da, konkludya fowt skians tus wokki. 16Bedhewgh rydh mes heb gul devnydh a rydhses avel klok droktra, mes kepar ha gwesyon Duw. 17Gwrewgh enora pub den oll, kara an brederedh, Duw, enora an emperour.

Ensampel a Wodhevyans Krist

18Kethwesyon, bedhewgh gostydh yn pub own dh'agas mestrysi, dhe'n re da ha meur aga godhevyans, mes dhe'n re dhignas ynwedh. 19Rag hemm yw grassyes: den dhe berthi galarow ha godhevyans gans kamm, yn omwodhvos a Dhuw. 20Rag pandr'a dal mar perthowgh pan owgh hwi gweskys wosa gul kamm? Mes mar kwrewgh yn ta ha perthi godhevyans, gras gans Duw yw hemma. 21Rag dhe hemma y fewgh hwi gelwys, rag Krist ynwedh a wodhevis ragowgh hwi2:21 ragowgh hwi: War-lergh re a'n dornskrifow ragon ni. dhe wir, ow kasa dhywgh ensampel, may siwyewgh olow y dreys.

22‘Ny wrug peghadow,

ha ny veu toell kevys war y anow.’

23Pan veu drokhenwys, ny dhrokhenwis yn attal. Pan wodhevis, ny vraggyas, mes yth omgommyttyas dhe neb a vreus yn hwiryon. 24Ev y honan a borthas agan peghosow y'n prenn, may hwryllyn ni, marow dhe beghosow, bewa dhe ewnder. Gans y woliow sawys vewgh hwi. 25Rag yth esewgh ow mos yn sowdhan kepar ha deves,2:25 Rag yth esewgh ow mos yn sowdhan kepar ha deves: War-lergh re a'n dornskrifow Rag yth ewgh hwi kepar ha deves gyllys yn sowdhan. mes lemmyn treylys owgh hwi dhe'n bugel ha'n epskop2:25 epskop: Po gwithyas. a'gas enev.