Gwragedh ha Gwer

1Y'n keth vaner, a wragedh, bedhewgh gostydh dh'agas gwer; ena, kyn fo re anedha nag yw gostydh dhe'n ger, i a yll bos gwaynys heb ger dre bewedh aga gwragedh, 2hag i ow kweles agas bewedh glan hag ownek. 3Na vedhes agas afinans war-tu a-ves, ow pletha an vlew na gorra tegennow owr a-dro dhywgh na gwiska dillas splann, 4mes bedhes gnas3:4 gnas: Greka den. kudhys an golonn, gans afinans na yll pedri a spyrys kosel ha klor, yw meur y bris a-dherag Duw. 5Rag yndella, seulabrys, an benynes sans, neb a's tevo govenek yn Duw, a wrug omafina, gostydh dh'aga gwer aga honan, 6kepar dell obayas Sara dhe Abraham orth y gelwel ‘Arloedh.’ Hwi yw hy fleghes pan wrewgh da, ha pan na berthowgh own a euth vytholl. 7Y'n keth vaner an wer, gwrewgh kesvewa gansa yn konvedhes, ow tiskwedhes enor dhe'n wreg avel dhe'n gwanna lester, kepar ha dhe heryon genowgh ynwedh a'n ras a vewnans, ma na vo lettys agas pysadow.

Godhevyans a-barth Ewnder

8Wor'tiwedh, bedhewgh hwi oll a'n keth brys, ow keskodhevel, ow kara an vreder, truedhek, uvel,3:8 uvel: War-lergh re a'n dornskrifow kuv. 9heb attyli drog rag drog na despit rag despit, mes yn le henna bennath, rag dhe henna y fewgh hwi gelwys, may hwrellewgh erita bennath.

10‘Neb a vynn kara bewnans

ha gweles dydhyow da,

fronnes ev y daves a dhrog

ha'y dhiwweus a gewsel toell.

11Treylyes ev dhiworth drog ha gul dader,

hwiles ev kres ha'y siwya;

12rag bos dewlagas an Arloedh war an re wiryon,

hag igor yw y dhiwskovarn dh'aga fysadow,

mes fas an Arloedh yw settys erbynn an re a wra drog.’

13Ha piw a wra agas aperya mars ewgh ha bos diwysyk rag dader? 14Mes mar kodhevowgh ynwedh rag ewnder, gwynn agas bys. Na berthewgh own rag euth anedha, ha na vedhewgh troblys, 15mes sanshewgh an Arloedh Krist3:15 an Arloedh Krist: War-lergh re a'n dornskrifow an Arloedh Duw. yn agas kolonn. Bedhewgh parys pup-prys dhe wul defens dhe bub den a wovynn orthowgh a-dro dhe'n govenek usi ynnowgh, 16mes gans klorder hag own, ow kwitha kowses da, may fons i shamys neb a gabel agas bewedh da yn Krist, pan gewsons er agas pynn. 17Rag gwell yw godhevel ow kul dader, mar mynn bodh Duw, ages gul drog. 18Rag Krist a wodhevis3:18 a wodhevis: War-lergh re a'n dornskrifow, a verwis. unnweyth rag peghosow, den gwiryon rag tus kammhynsek, ma'gas3:18 ma'gas: War-lergh re a'n dornskrifow, ma'gan. drollo dhe Dhuw, ledhys y'n kig mes bewhes y'n spyrys; 19hag ynno ev eth dhe bregoth dhe'n spyrysyon yn prison 20a veu diwostydh kyns, pan esa hirwodhevyans Duw ow kortos yn dydhyow Noy, ha'n gorhel ow pos pareusys, may feu sawys niver byghan, henn yw eth enev, dre dhowr. 21Hemm yw tokyn a'gan saw lemmyn, henn yw besydhyans. Nyns yw gorra dhe-ves mostedhes an kig mes gorthyp kowses da dhe Dhuw dre dhasserghyans Yesu Krist, 22usi a dhyghow dhe Dhuw, gyllys yn nev, gans eledh ha potestatys ha nerthow gwrys gostydh dhodho ev.