Rennysi Dha a Ras Duw

1Ytho, a-ban wrug Krist godhevel4:1 godhevel: War-lergh re a'n dornskrifow godhevel ragon. y'n kig, omarvewgh hwi ynwedh gans an keth brys, rag neb re wodhevis y'n kig re asas peghadow, 2ytho ny vew namoy yn hwansow mab-den dres an termyn yw gesys y'n kig, mes orth bodh Duw. 3Rag lowr yw an termyn usi tremenys dhe wul war-lergh towl an Jentilys ow pesya yn leshyans, drokhwansow, medhwenep, kevewiow gwyls, eva re ha gordhyans idolys yw erbynn lagha. 4Marth a's teves na resowgh hwi gansa i dhe'n keth liv a wrians direwl, hag i a'gas kabel; 5mes i a re akont dhe neb yw parys dhe vreusi an re vew ha'n re varow. 6Rakhenna y feu an aweyl pregewthys hwath dhe'n re varow, may fewens yn spyrys war-lergh Duw, kyn fens i breusys avel mab-den y'n kig war-lergh mab-den.

7Gorfenn pup-tra re dheuth nes; ytho bedhewgh doeth ha sad orth pysadow. 8Kyns oll, kevewgh kerensa yntredhowgh heb hedhi4:8 heb hedhi: Po yn tiwysyk., rag kerensa a gudh peghosow pals. 9Bedhewgh hel dhe westoryon, an eyl dh'y gila, heb krodhvol. 10Dell dhegemmeras pubonan ahanowgh ro, gwrewgh devnydh anodho an eyl rag y gila kepar ha rennysi dha a'n gras divers a Dhuw. 11Den mar kews, kewses ev lavarow Duw; den mar konis, gonedhes gans nerth yw res gans Duw, may fo Duw gordhys yn pup-tra dre Yesu Krist, dhe neb re bo gordhyans ha nerth, trank heb worfenn. Amen.

12Karadowyon, na vedhewgh sowdhenys a'n prevyans gans tan usi genowgh rag agas previ, kepar ha pan ve neppyth ankoth ow koedha warnowgh. 13Mes, ha hwi ow kevrenna godhevyansow Krist, lowenhewgh, may lowenhahowgh ynwedh yn heudhik orth diskwedhyans y splannder. 14Mars owgh hwi despitys yn hanow Krist, gwynn agas bys rag an Spyrys a splannder hag a Dhuw a wra powes warnowgh.4:14 War-lergh re a'n dornskrifow yma keworrys omma A-barth dhedha i blasfemys yw; a-barth dhywgh hwi glorifiys yw. 15Mes na wres denvyth ahanowgh godhevel avel denledhyas, na lader, na drogoberer, na mellyer yn negys tus erell. 16Mes mar kodhev avel Kristyon, na berthes meth, mes gwres ev gordhya Duw y'n hanow ma4:16 y'n hanow ma: War-lergh re a'n dornskrifow y'n mater ma.. 17Rag devedhys yw an termyn dhe dhalleth an vreus orth teylu Duw, ha mar talleth orthyn ni, pandr'a vydh gorfenn an re nag yw gostydh dhe aweyl Duw? 18Ha mar skantlowr yw selwys an den gwiryon, ple hwra an den didhuw ha'n peghador omdhiskwedhes? 19Ytho, an re a wodhev war-lergh bodh Duw, gwrens i kemmynna aga enev dhe Greador lel, ow kul dader.