Ow Pugelya Flokk Duw

1Ytho, my a bys an re yw henavogyon yn agas mysk, ha my henavek ynwedh genowgh, ha test godhevyansow Krist, ha kevrenner y'n splannder a vydh diskwedhys, 2bugelyewgh flokk Duw usi yn agas mysk, ow korweles heb konstryna mes bolonjedhek, war-lergh bodh Duw5:2 war-lergh bodh Duw: Nyns usi an geryow ma yn re a'n dornskrifow. ; heb hwansa gwayn plos, mes yn tiwysyk; 3heb lordya war an re a withowgh, mes yn ensamplys dhe'n flokk, 4ha pan omdhiskwa an penn-bugel, hwi a wra degemmeres an gurun a splannder na wedher. 5Y'n keth vaner, hwi, a dus yowynk, bedhewgh gostydh dhe'n henavogyon, ha pubonan gwiskewgh uvelder an eyl dh'y gila, rag

‘Duw a sett orth tus woethus,

mes dhe dus uvel, y re ev gras.’

6Omuvelhewgh ytho yn-dann leuv alloesek Duw, rag ma'gas ughelhaho y'n termyn gwiw, 7ow tewlel oll agas fienasow warnodho, rag hwi yw bern dhodho ev. 8Bedhewgh sad, bedhewgh hewoel. Agas eskar an jowl, kepar ha lew owth usa, a gerdh a-dro, ow hwilas nebonan dhe dhevorya. 9Sevewgh orto, fyrv y'n fydh, ow kodhvos an keth godhevyans dhe hwarvos dh'agas breder usi y'n bys. 10Lemmyn, Duw pub ras, neb a'gas gelwis dh'y splannder heb diwedh yn Krist Yesu, wosa hwi dhe wodhevel pols, a wra y honan agas gul perfydh, fastya, krevhe ha selya. 11Dhodho ev an galloes5:11 an galloes: War-lergh re a'n dornskrifow an gordhyans ha'n galloes. trank heb worfenn. Amen.

Dynnargh Diwettha

12Dre Silvanus, broder lel, my a dyb, re skrifis vy dhywgh war nebes lavarow, ow keski ha dustunia bos hemma gwir ras Duw; sevewgh fyrv ynno. 13An eglos yn Babylon, dewisys war-barth genowgh hwi, ha Mark ow mab a'gas dynnergh. 14Salusewgh an eyl y gila gans bay kerensa.

Kres dhywgh hwi oll usi yn Krist.5:14 yn Krist: War-lergh re a'n dornskrifow yn Krist Yesu. Amen