Dineythyans Samuel

1Yth esa neb unn gour, a Ramathaym-sofim, a venydh Efraym, ha'y hanow Elkana mab Yeroham mab Elihu mab Tohu mab Suf, Efrathyas. 2Hag yth esa dhodho diw wreg, hanow an eyl Hanna, ha hanow hy ben Peninna. Yth esa dhe Peninna fleghes, mes nyns esa fleghes dhe Hanna.

3Ha'n gour ma a wre mos yn-bann mes a'y sita blydhen wosa blydhen dhe wordhya ha sakrifia dhe Arloedh an luyow yn Shilo, le mayth esa an dhew vab a Eli, Hofni ha Finehas, oferysi an Arloedh. 4Y'n jydh mayth offrynna Elkana, ev a ri rannow dhe Peninna y wreg ha dhe oll hy mebyon ha'y vyrgh; 5mes dhe Hanna ev a ri rann dhewblek, rag ev a gara Hanna, kyn hwrussa an Arloedh degea hy thorr. 6Ha'n nessa wreg a's grevyas yn feur, dh'y serri, drefenn an Arloedh dhe dhegea hy thorr. 7Ev a wre mos yndella blydhen wosa blydhen; peskweyth may hwre hi mos yn-bann dhe chi an Arloedh, hi a's grevya. Rakhenna Hanna a oela, ha ny dhybri. 8Hy gour Elkana a leveris dhedhi, ‘Prag yth oelydh? Ha prag na dhybrydh? Ha prag yth yw dha golonn trist? A nyns ov vy moy dhis ages deg mab?’

9Ytho Hanna a sevis yn-bann wosa i dhe dhybri hag eva yn Shilo. Hag yth esa Eli an oferyas owth esedha war an gador ryb post-daras tempel an Arloedh. 10Ha hi o grevys yn town hag a bysis war an Arloedh, hag oela yn hwerow. 11Ha hi a ambosas ambos ha leverel, ‘A Arloedh an luyow, mar mirydh dhe wir war alar dha vaghteth, ha perthi kov ahanav, ha ny ankevydh dha vaghteth, mes ri dhe'th vaghteth mab, ena my a'n re dhe'n Arloedh oll dydhyow y vewnans, ha ny wra altenn vyth tochya y benn.’

12Yth esa hi prest ow pysi a-dherag an Arloedh, hag Eli a verkyas hy ganow. 13Yth esa Hanna ow kewsel yn hy holonn; nyns esa saw hy diwweus ow kwaya, mes nyns o hy lev klewys; rakhenna Eli a dhybis hi dhe vos medhow. 14Ytho Eli a leveris dhedhi, ‘Pes termyn y fydhydh medhow? Gorr dhe-ves dha win a-dhiworthis.’ 15Mes Hanna a worthybis ha leverel, ‘Nansi, ow arloedh, benyn gans spyrys ahwerek ov; ny evis vy na gwin na korev, mes my re beu ow tiveri ow enev yn-mes a-dherag an Arloedh. 16Na gemmer dha vaghteth rag myrgh Belial, rag my re beu ow leverel yn-mes a'm preder meur ha'm poenvos oll an termyn ma.’ 17Ena Eli a worthybis ha leverel, ‘Ke yn kres; ha re wrontyo Duw Ysrael dhis dha bysadow a wovynnsys orto.’ 18Ha hi a leveris, ‘Gwres dha vaghteth kavoes gras y'th wolok.’ Ena an venyn eth war hy fordh ha dybri, ha nyns o hy fas trist na fella.

19Myttin a-varr i a sevis ha gordhya a-dherag an Arloedh, hag ena i a dhehwelis dh'aga chi dhe Rama. Hag Elkana a aswonnis y wreg, ha'n Arloedh a borthas kov anedhi. 20Y'n termyn gwiw, Hanna a omdhuk ha dineythi mab, ha hi a'n henwis Samuel, rag hi a leveris, ‘My re'n govynnas orth an Arloedh.’

21An gour Elkana hag oll y vayni eth yn-bann dhe offrynna dhe'n Arloedh an sakrifis blydhenyek, ha dhe gewera y ambos. 22Mes nyns eth Hanna yn-bann, rag hi a leveris dh'y gour, ‘Ny wrav vy mos yn-bann erna vo an maw didhenys, hag ena my a'n dre, may hyll ev omdhiskwedhes a-dherag an Arloedh, ha triga ena bys vykken.’ 23Hag Elkana hy gour a leveris dhedhi, ‘Gwra an pyth a hevel da dhis, gorta bys pan y'n didhensys; re gollanwo an Arloedh y er.’ Ytho an venyn a drigas ha meythrin hy mab bys pan y'n didhensa. 24Ha wosa hi dh'y dhidhena, hi a'n kemmeras yn-bann gensi, gans lodhen tri bloedh,1:24 lodhen tri bloedh: Ow siwya an Septuagint ha'n Syriek. Ebrow gans tri lodhen. hag unn efa a vleus, ha seth a win. Hi a'n dros dhe ji an Arloedh yn Shilo; ha'n maw o yowynk. 25I a ladhas an lodhen, ha dri an maw dhe Eli. 26Hag yn-medh hi, ‘Ow arloedh, kepar dell vewydh, ow arloedh, yth ov vy an venyn esa sevys rybos omma, ow pysi war an Arloedh. 27Rag an maw ma y pysis; ha'n Arloedh re wrontyas dhymm ow fysadow a wovynnis orto. 28Rakhenna my re'n prestas dhe'n Arloedh, hedre vewo, ev a vydh prestys dhe'n Arloedh.’ Hag i a wordhyas an Arloedh ena.