Sakrifis Anlaghel Sowl

1Sowl o deg bloedh warn ugens13:1 deg bloedh warn ugens: ow siwya niver byghan a dhornskrifow an Septuagint. An niver deg warn ugens yw pur ansertan. Ebrow Sowl o unn bloedh. Dell hevel, neppyth re goedhas mes a'n tekst ebrow. Y'n brassa rann a dhornskrifow an Septuagint, an wers ma yw gesys yn-mes. pan dhallathas reynya; hag ev a reynyas dewgens blydhen ha diw13:1 ev a reynyas dewgens blydhen ha diw: Ebrow ev a reynyas diw vlydhen. An niver dewgens re beu proviys war sel Oberow an Abesteli 13:21. Mes mars yw an tekst ebrow ewn an styr a yll bos Sowl dhe reynya diw vlydhen kyns dalleth krevhe an lu (13:2-4). war Ysrael.

2Sowl a dhewisas ragdho y honan tri mil dhen a Ysrael; yth esa dew vil gans Sowl yn Mikmash hag yn menydh Bethel, hag yth esa mil gans Yonathan yn Gibea a Benyamin; hag ev a dhannvonas remenant an bobel dhe-ves dh'aga thyldow. 3Yonathan a fethas savla-gwithysi an Filistysi esa yn Geba, ha'n Filistysi a glewas anodho. Ha Sowl a hwythas an hirgorn der oll an tir, ow leverel, ‘Gwres an Filistysi klewes!’ 4Pan glewas oll Ysrael Sowl dhe fetha savla-gwithysi an Filistysi, hag ynwedh Ysrael dhe dhos ha bos kasadow dhe'n Filistysi, an bobel a veu gelwys yn-mes dhe junya gans Sowl yn Gilgal.

5An Filistysi a omguntellas war-barth dhe vatalyas orth Ysrael, tri mil jarett, ha hwegh mil varghek, ha pobel kepar ha'n tewes usi war an morrep yn niver; hag i a dheuth yn-bann ha kampya yn Mikmash, a'n est dhe Beth-aven. 6Pan welas gwer Ysrael aga bos yn ahwer (rag an lu o gweskys kales), ena an bobel a omgudhas aga honan yn kavow hag yn tell hag yn karregi hag yn bedhow hag yn dowrarghow. 7Re a'n Ebrowyon a dreusis an Yordan dhe bow Gad ha Gilead. Yth esa Sowl hwath yn Gilgal, hag oll an bobel a'n holyas ow krena.

8Ev a wortas seyth dydh, herwydh an termyn re bia apoyntys gans Samuel; mes ny dheuth Samuel dhe Gilgal; ha'n bobel a dhallathas skattra dhiworth Sowl. 9Sowl a leveris, ‘Drewgh an offrynn leskys omma dhymm, hag offrynnow kres.’ Hag ev a offrynnas an offrynn leskys. 10Kettell worfennsa offrynna an offrynn leskys, Samuel a dheuth; ha Sowl eth yn-mes dhe vetya ganso ha'y salusi. 11Samuel a leveris, ‘Pandr'a wruss'ta?’ Ha Sowl a worthybis, ‘My a welas bos an bobel skattrys a-les ahanav, ha na dheuthys a-ji dhe'n dydhyow apoyntys, ha'n Filistysi dhe omguntell war-barth yn Mikmash, 12my a leveris, “Lemmyn an Filistysi a dheu yn-nans warnav yn Gilgal, ha ny bysis favour an Arloedh”; ytho konstrynys veuv dhe offrynna an offrynn leskys.’ 13Samuel a leveris dhe Sowl, ‘Ty re wrug yn foll; ny withsys arghadow an Arloedh dha Dhuw, a erghis dhis. An Arloedh a wrussa fastya dha wlaskor war Ysrael bynitha, 14mes lemmyn ny wra dha wlaskor durya; an Arloedh re hwilas ragdho gour war-lergh y golonn y honan, ha'n Arloedh re'n apoyntyas dhe vos rewler war y bobel, drefenn na withsys an pyth a erghis an Arloedh dhis.’

Darbarow dhe Vatel

15Ena Samuel eth yn-bann a-dhiworth Gilgal dhe Gibea a Benyamin. Ha Sowl a niveras an bobel esa ena ganso, a-dro dhe hwegh kans gour. 16Sowl, ha Yonathan y vab, ha'n bobel esa ena gansa a drigas yn Gibea a Benyamin; mes an Filistysi a gampyas yn Mikmash. 17Bagasow a ravnoryon a dheuth yn-mes a gamp an Filistysi yn tri bagas. Unn bagas a dreylyas trohag Ofra, dhe bow Shual, 18bagas arall a dreylyas troha Beth-horon, ha bagas arall a dreylyas troha'n menydh a vir war-woeles war nans Seboim troha'n gwylvos.

19Lemmyn nyns esa gov dhe vos kevys dre oll pow Ysrael; rag an Filistysi a leveris, ‘Rag na wrello an Ebrowyon kledhedhyow po guwow ragdha aga honan’. 20Ytho oll mebyon Ysrael eth yn-nans dhe'n Filistysi, dhe lymma pub gour y sogh, ha'y golter, ha'y voel, ha'y bigell. 21Ha'n kost o diw rann a shekel13:21 diw rann a shekel: Ebrow pim. rag an soghyow ha rag an koltrow, hag unn rann a shekel rag lymma an fergh ha'n boelyow ha rag settya an brosow. 22Ytho yn dydh an vatel, nag esa na kledha na guw kevys yn dorn denvyth a'n bobel esa gans Sowl ha Yonathan; mes yth ens i kevys gans Sowl ha'y vab Yonathan.

Yonathan a Sowdhan ha Fetha an Filistysi

23Ytho an Filistysi eth yn-mes dhe volgh Mikmash.