1Unn jydh Yonathan mab Sowl a leveris dhe'n gour yowynk esa ow toen y arvow, ‘Deus, ha treusyn dhe savla-goelyadoryon an Filistysi usi a'n tu arall.’ Mes ny'n derivas orth y das. 2Yth esa Sowl yn oryon pell Gibea yn-dann reunavalwydhenn usi yn Migron; ha'n bobel esa ganso o a-dro dhe hwegh kans gour, 3war-barth gans Ahiya mab Ahitub, broder Ikabod, mab Finehas mab Eli, oferyas an Arloedh yn Shilo, ow toen an Efod. Ha ny wodhya an bobel bos Yonathan gyllys. 4Ynter an bolghow, may hwilas Yonathan treusi dhe savla-goelyadoryon an Filistysi dredha, yth esa karrek lymm a'n eyl tu, ha karrek lymm a'n tu arall; hanow an eyl o Boses, ha hanow an arall Sene. 5An eyl kleger a sevis troha'n kledh a-dal Mikmash, ha'n arall troha'n dyghow a-dal Geba.

6Yonathan a leveris dhe'n gour yowynk deger y arvow, ‘Deus, ha treusyn dhe savla-goelyadoryon an re antrodreghys; martesen y hwarvo an Arloedh dhe oberi ragon; rag nyns eus travyth a yll lettya an Arloedh rag ri trygh gans lies po gans nebes.’ 7Ha deger y arvow a leveris dhodho, ‘Gwra oll eus y'th kolonn, treyl; ottavy, yth esov vy genes, kepar dell yw dha golonn, yndella yw ow holonn vy.’14:7 kepar dell yw dha golonn, yndella yw ow holonn vy: ow siwya an Septuagint. Ebrow kepar ha'th kolonn. 8Ena Yonathan a leveris, ‘Lemmyn ni a dreus dhe'n dus na ha ni a dhiskwa agan honan dhedha. 9Mar leverons dhyn, “Gortewgh erna dhyffyn dhywgh”, ena ni a sev yn agan le, ha ny wren ni mos yn-bann dhedha. 10Mes mar leverons yndella, “Dewgh yn-bann dhyn”, ena ni a wra mos yn-bann; rag an Arloedh re's delivras yn agan leuv, ha hemma a vydh tokyn dhyn.’ 11Ha'n dhew anedha a dhiskwedhas aga honan dhe savla-goelyadoryon an Filistysi; ha'n Filistysi a leveris, ‘Ottomma Ebrowyon ow tos yn-mes a'n tell mayth omgudhsons ynna.’ 12Ha gwer an savla-goelyadoryon a elwis dhe Yonathan ha deger y arvow, ow leverel, ‘Dewgh yn-bann dhyn, ha ni a dhiskwedh neppyth dhywgh.’ Yonathan a leveris dhe dheger y arvow, ‘Deus yn-bann war ow lergh; rag an Arloedh re's delivras yn leuv Ysrael.’ 13Ha Yonathan a yskynnas yn-bann war y dhiwdhorn ha war y dhewdroes, gans deger y arvow owth holya war y lergh. Ha'n Filistysi a goedhas a-dherag Yonathan, ha deger y arvow, ow tos war y lergh, a's ladhas. 14Hag y'n kynsa ladhva Yonathan ha deger y arvow a ladhas ogas dhe ugens gour a-ji dhe spas a-dro dhe hanter fynngel y hys yn erow a dir. 15Yth esa kren y'n lu, y'n gwel, hag yn mysk oll an bobel; an savla-goelyadoryon, bagas an ravnoryon a grenas ynwedh, ha'n dor a grysyas; hag y teuth ha bos skruth pur vras.

16Yth esa goelyadoryon Sowl yn Gibea a Benyamin ow mires; ha'n routh ow teudhi dhe-ves omma hag ena. 17Ena Sowl a leveris dhe'n bobel esa ganso, ‘Omguntellewgh lemmyn, ha gwelyn piw yw gyllys ahanan.’ Ha pan omguntellsens war-barth, nyns esa ena Yonathan na deger y arvow. 18Ena Sowl a leveris dhe Ahiya, ‘Dro omma argh Duw.’ Rag y'n termyn na yth esa argh Duw gans mebyon Ysrael. 19Pan esa Sowl ow kewsel dhe'n oferyas, an tervans yn kamp an Filistysi a ynkressyas moy ha moy; hag yn-medh Sowl dhe'n oferyas, ‘Tenn dha leuv dhe-ves.’ 20Ena Sowl hag oll an bobel esa ganso a omguntellas hag i a dheuth dhe'n vatel; ha kledha pub gour o erbynn y gila, mayth esa deray pur vras. 21Lemmyn an Ebrowyon esa gans an Filistysi kyns an termyn na, an re neb eth yn-bann gansa a-ji dhe'n kamp, a dreylyas ha junya an Ysraelysi esa gans Sowl ha Yonathan. 22Ynwedh oll an Ysraelysi omgudhys yn bro venydhyek Efraym, pan glewsons bos an Filistysi ow fia, i ynwedh a junyas dhe'n vatel, ow helghya war aga lergh. 23Yndella an Arloedh a sawyas Ysrael an jydh na; ha'n vatel a lesas yn-mes bys yn Beth-aven.

Ti Diswar Sowl

24An Ysraelysi o grevys an jydh na, drefenn Samuel dhe worra ti war an bobel ow leverel, ‘Mollothek re bo an gour neb a dheber boes kyns gorthugher dhe dhos, kyns my dhe dyli dial war ow eskerens.’ Ytho ny dastyas denvyth a'n bobel boes vyth. 25I oll a dheuth dhe goeswik; hag yth esa mel war an dor. 26Ha pan dheuth an bobel a-bervedh y'n goeswik, yth esa an mel ow tevera yn-nans; mes ny worras denvyth y dhorn dh'y anow, rag an bobel a borthas own a'n ti. 27Mes ny glewas Yonathan y das pan jarjyas ev an bobel gans an ti; hag ev a ystynnas an lorgh esa yn y dhorn, ha troghya an bleyn yn kribenn vel, ha gorra y leuv dh'y anow; ha'y lagas a veu splannhes. 28Ena onan a'n bobel a leveris, ‘Dha das a jarjyas an bobel yn stroeth gans ti, ow leverel, “Mollothek re bo an gour neb a dheber boes y'n jydh ma.” Hag yndella an bobel yw skwith.’ 29Ena yn-medh Yonathan, ‘Ow thas re dhros anfeusi war an tir; otta, assa veu ow lagas splannhes, drefenn my dhe dastya neppyth a'n mel. 30Pygemmys gwell, mar teppra an bobel hedhyw heb lett a'n preydh kemmerys a-dhiworth aga eskerens; drefenn lemmyn nag o an ladhva yn mysk an Filistysi meur.’

31I a weskis an Filistysi an jydh na a-dhiworth Mikmash dhe Ayyalon, ha'n bobel o pur skwith; 32ha'n bobel a stevyas yn-nans ow skrija war an preydh, ha kemmeres deves hag oghen ha leughi, ha'ga ladha war an dor; ha'n bobel a's dybris gans an goes. 33Ena yth o derivys dhe Sowl, ‘Ottomma an bobel ow pegha erbynn an Arloedh dre dhybri gans an goes.’ Hag ev a leveris, ‘Hwi re dorras fydh; rolyewgh men bras omma dhymm y'n jydh ma.’ 34Ha Sowl a leveris, ‘Diberthewgh a-les yn mysk an bobel, ha leverewgh dhedha, “Drewgh omma dhymm pub gour y ojyon, po y dhavas, ha ledhewgh i y'n tyller ma, ha dybrewgh; ha ny wrewgh pegha erbynn an Arloedh dre dhybri gans an goes.” ’ Yndella oll an bobel a dhros aga oghen gansa an nos na, ha'ga ladha ena. 35Ha Sowl a dhrehevis alter dhe'n Arloedh; homm o an kynsa alter a dhrehevis ev dhe'n Arloedh.

Yonathan yn Peryll a Vernans

36Ena Sowl a leveris, ‘Deun yn-nans war-lergh an Filistysi y'n nos ha'ga fylla bys golow an myttin, ha na esewgh gour vyth anedha.’ Yn-medhons, ‘Gwra pypynag a hevel da dhis.’ Mes yn-medh an oferyas, ‘Deun nes dhe Dhuw omma.’ 37Ytho Sowl a wovynnas kusul a-dhiworth Duw, ‘A wrav vy mos yn-nans war-lergh an Filistysi? A vynn'ta aga delivra yn dorn Ysrael?’ Mes ny'n gorthybis an jydh na. 38Ha Sowl a leveris ‘Dewgh omma, oll ledyoryon an bobel; ha konvedhyn ha miryn fatell dhrehevis an pegh ma hedhyw. 39Rag dell vew an Arloedh neb a selow Ysrael, kyn fo yn Yonathan ow mab, ev a verow!’ Mes nyns esa denvyth yn mysk oll an bobel a'n gorthybis. 40Ena ev a leveris dhe oll Ysrael, ‘Hwi a vydh war an eyl tu, ha my ha Yonathan a vydh war an tu arall.’ Ha'n bobel a leveris dhe Sowl, ‘Gwra an pyth a hevel da dhis.’ 41Ena Sowl a leveris, ‘A Arloedh, Duw Ysrael, prag na wruss'ta gorthybi dhe'th was hedhyw? Mars usi an pegh ma ynnov, po yn ow mab Yonathan, A Arloedh, Duw Ysrael, ro Urim; mes mars usi an pegh ma y'th pobel Ysrael, ro Thummim.’ Ha Yonathan ha Sowl a veu diskwedhys gans an prenn, mes an bobel a skapyas.14:41 Amendys war-lergh an Septuagint ha'n Vulgat. 42Ha Sowl a leveris, ‘Tewlewgh an prennyer yntra my ha Yonathan ow mab.’ Ha Yonathan a veu kemmerys.

43Ena Sowl a leveris dhe Yonathan, ‘Lavar dhymm pandr'a wruss'ta?’ Ha Yonathan a dherivas, ha leverel, ‘My a dastyas nebes a'n mel gans bleyn an lorgh esa y'm leuv; hag, ottavy, res yw dhymm merwel.’ 44Ha Sowl a worthybis, ‘Re wrello Duw yndella dhymm ha moy ynwedh; ty a verow yn sur, Yonathan.’ 45Ena an bobel a leveris dhe Sowl, ‘A verow Yonathan, neb re wrug an delivrans meur ma yn Ysrael? Bynner re bo! Dell vew an Arloedh, ny wra blewenn vyth a'y benn koedha dhe'n leur; rag ev re oberis gans Duw hedhyw.’ Yndella an bobel a sawyas Yonathan, ha ny verwis. 46Ena Sowl eth yn-bann dhiworth helghya an Filistysi; ha'n Filistysi eth dh'aga le aga honan.

Breselyow Sowl

47Ytho Sowl a gemmeras an myghternsys war Ysrael, ha batalyas orth oll y eskerens a bub tu, erbynn Moab, hag erbynn an Ammonysi, hag erbynn Edom, hag erbynn myghternedh Soba, hag erbynn an Filistysi; ha plepynag y treylya, ev a dryghis.14:47 dryghis: Ow siwya an Septuagint, an Vulgat ha'n Syriek. 48Hag ev a wrug yn kolonnek, ha gweskel an Amalekysi, ha delivra Ysrael mes a leuv an re a's pylla.

49Lemmyn mebyon Sowl o Yonathan, hag Yshvi, ha Malkishua; ha hanow y dhiw vyrgh o an re ma; hanow an kottha o Merab, ha hanow an yowynka, Mikal. 50Hanow gwreg Sowl o Ahinoam myrgh Ahimaas. Ha hanow kaslewydh y lu o Abner, mab Ner, ewnter Sowl. 51Kish o tas Sowl; ha Ner tas Abner o mab Abiel.

52Yth esa bresel grev erbynn an Filistysi oll dydhyow Sowl; ha pan weli Sowl neb gour krev, po kasor kolonnek, ev a'n guntellas dhodho y honan.