Sowl a Feth an Amalekysi mes Sparya aga Myghtern

1Samuel a leveris dhe Sowl, ‘An Arloedh a'm dannvonas dhe'th untya dhe vos myghtern war y bobel Ysrael; lemmyn rakhenna goslow orth geryow an Arloedh. 2Yndellma y lever Arloedh an luyow, “My a gessydh an Amalekysi rag an pyth a wrussons ow settya erbynn mebyon Ysrael pan dheuthons yn-bann yn-mes a Ejyp. 3Lemmyn, ke ha gwask Amalek, ha distru glan pup-tra a's teves, ha na wra aga sparya; mes ladh gour ha benyn, flogh ha fleghik, ojyon ha davas, kowrvargh hag asen.” ’

4Ytho Sowl a guntellas an bobel war-barth, ha'ga nivera yn Telaim, dew kans mil droesek, ha deg mil wour a Yuda. 5Sowl a dheuth dhe sita Amalek, ha kontrewaytya y'n nans. 6Yn-medh Sowl dhe'n Kenysi, ‘Kewgh! Gesewgh! Omdennewgh yn-mes a'n Amalekysi, po my a'gas distru gansa; rag hwi a dhiskwedhas tregeredh dhe oll mebyon Ysrael, pan dheuthons yn-bann mes a Ejyp.’ Yndella an Kenysi a omdennas dhiworth an Amalekysi. 7Sowl a weskis an Amalekysi, a-dhiworth Havila bys Shur, usi a-dal Ejyp. 8Hag ev a gemmeras Agag myghtern an Amalekysi yn few, ha distrui glan oll an bobel dre vin an kledha. 9Mes Sowl ha'n bobel a sparyas Agag, ha'n gwella a'n deves hag a'n oghen hag a'n enyvales peskys, ha'n eyn, ha pup-tra a veu da, ha ny vynnens aga distrui glan; mes pup-tra dispresys ha koeg i a dhistruis glan.

Sowl Skonys Avel Myghtern

10Ena y teuth ger an Arloedh dhe Samuel: 11‘Edrek a'm beus my dhe settya yn-bann Sowl dhe vos myghtern, rag ev re dreylyas dhe-ves dhiworthiv, ha ny gollenwis ow gorhemmynnow.’ Samuel o serrys; hag ev a grias war an Arloedh dres nos. 12Samuel a sevis myttin a-varr dhe vetya Sowl, hag y feu derivys dhe Samuel, ‘Sowl eth dhe Karmel, le may trehevis men-kov ragdho y honan, hag ev a dreylyas a-dro alena ha tremena yn-nans dhe Gilgal.’ 13Pan dheuth Samuel dhe Sowl, Sowl a leveris dhodho, ‘Bennigys re bi gans an Arloedh; my re gollenwis gorhemmynn an Arloedh.’ 14Mes Samuel a worthybis, ‘Pandr'a styr an son ma a dheves y'm diwskovarn, ha son an gwarthek esov vy ow klewes?’ 15Ha Sowl a leveris, ‘I re's dros dhiworth an Amalekysi; rag an bobel a sparyas an gwella a'n deves ha'n gwarthek, dhe sakrifia dhe'n Arloedh dha Dhuw; ha'n remenant ni re dhistruis glan.’ 16Ena Samuel a leveris dhe Sowl, ‘Taw! My a dheriv orthis an pyth a leveris an Arloedh dhymm nyhewer.’ Hag ev a worthybis, ‘Kows.’

17Yn-medh Samuel, ‘Kynth es distyr y'th lagas dha honan, a ny veus gwrys penn loethow Ysrael? An Arloedh a'th untyas myghtern war Ysrael. 18Ha'n Arloedh a'th tannvonas war an fordh, ha leverel, “Ke, distru glan an beghadoryon, an Amalekysi, batel er aga fynn erna vons diswrys.” 19Ytho prag na obaysys lev an Arloedh? Prag y koedhsys war an preydh, ha gul drog yn golok an Arloedh?’ 20Sowl a leveris dhe Samuel, ‘My re obayas lev an Arloedh, my res eth war an vyaj a wrug an Arloedh ow dannvon warnodho, ha my re dhros Agag myghtern Amalek, ha my re dhistruis glan an Amalekysi. 21Mes dhiworth an preydh an bobel a gemmeras deves ha gwarthek, an gwella a'n taklow sakrys rag distruyans, dh'aga sakrifia dhe'n Arloedh dha Dhuw yn Gilgal.’ 22Hag yn-medh Samuel,

‘A gyv an Arloedh plesour meurra yn offrynnow leskys ha sakrifisow,

ages yn obayans lev an Arloedh?

Yn sur, obaya yw gwell ages sakrifia,

ha goslowes ages blonek hordhes.

23Rag rebellyans yw avel pegh dewinieth,

ha gorthter yw kepar ha kammweyth ha gordhyans idolys.

Drefenn ty dhe skonya ger an Arloedh,

ev ynwedh re'th skonyas a vones myghtern.’

24Ha Sowl a leveris dhe Samuel, ‘My re beghas; my a gammdremenas erbynn gorhemmynn an Arloedh ha'th eryow, drefenn my dhe berthi own a'n bobel hag obaya aga lev. 25Ha lemmyn, my a'th pys, gav ow fegh, ha dehwel genev, may hallav gordhya an Arloedh.’ 26Samuel a leveris dhe Sowl, ‘Ny vynnav dehweles genes; drefenn ty dhe skonya ger an Arloedh, ha'n Arloedh re'th skonyas a vones myghtern war Ysrael.’ 27Ha pan dreylyas Samuel dhe vones dhe-ves, Sowl a settyas dalghenn yn lostenn y vantell, ha'y skwardya. 28Ha Samuel a leveris dhodho, ‘An Arloedh re skwardyas gwlaskor Ysrael dhiworthis y'n jydh hedhyw, ha'y ri dhe gentrevek ahanas, neb yw gwell agesos. 29Hag ynwedh, ny wra Splannder Ysrael naneyl toella na treylya y vrys.’ 30Ena Sowl a leveris, ‘My re beghas; hwath enor dhymm lemmyn a-dherag henavogyon ow fobel hag a-dherag Ysrael, ha dehwel genev, may hallav gordhya dha Dhuw.’ 31Yndella Samuel a dreylyas arta war-lergh Sowl; ha Sowl a wordhyas an Arloedh.

32Ena Samuel a leveris, ‘Dro Agag myghtern Amalek omma dhymm.’ Hag y teuth Agag dhodho yn kargharow.15:32 yn kargharow: Po war-lergh an Septuagint ow krena; po war-lergh Aquila ha Symmachus yn lowenek, po yn kosel. Agag a leveris, ‘Yn sur hwerowder mernans yw tremenys.’ 33Mes Samuel a leveris,

‘Kepar dell wrug dha gledha benynes dhe vos anvap,

yndella y fydh dha vamm anvap yn mysk benynes.’

Ha Samuel a hakkyas Agag dhe demmyn a-dherag an Arloedh yn Gilgal.

34Ena Samuel eth dhe Rama; ha Sowl eth yn-bann dh'y ji yn Gibea a Sowl. 35Ny dheuth Samuel namoy dhe weles Sowl bys yn dydh y vernans, mes grevya a wrug Samuel drefenn Sowl. Ha'n Arloedh a'n jevo edrek drefenn ev dhe wul Sowl myghtern war Ysrael.