Davydh Untys avel Myghtern

1Ha'n Arloedh a leveris dhe Samuel, ‘Pygemmys prys y fydhydh ow kyni rag Sowl? My re'n skonyas a vones myghtern war Ysrael. Lanw dha gorn gans oyl, ha ke, my a'th tannvon dhe Yesse an Bethlehemyas, rag my re brovias ragov ow honan myghtern yn mysk y vebyon.’ 2Ha Samuel a leveris, ‘Fatell allav mos? Mar klewva Sowl anodho, ev a'm ladhsa.’ Ha'n Arloedh a leveris, ‘Kemmer lejek genes, ha lavar, “My re dheuva dhe sakrifia dhe'n Arloedh.” 3Ha galw Yesse dhe'n sakrifis, ha my a dhiskwa dhis an pyth dhe wul; ha ty a wra untya ragov ev neb a dhiskwedhav dhis.’ 4Ha Samuel a wrug an pyth a erghis an Arloedh dhodho, ha dos dhe Bethlehem. Ha henavogyon an dre a grenas orth y dhevedhyans, ha leverel, ‘Osta devedhys yn kres?’ 5Hag yn-medh ev, ‘Yn kres; my re dheuth dhe sakrifia dhe'n Arloedh; omsakrewgh ha dewgh genev dhe'n sakrifis.’ Hag ev a sakras Yesse ha'y vebyon ha'ga gelwel dhe'n sakrifis.

6Pan dheuthons, ev a vires war Eliab, ha tybi, ‘Yn sur yma untys an Arloedh lemmyn a-dherag an Arloedh.’ 7Mes yn-medh an Arloedh dhe Samuel, ‘Na vir war naneyl y semlans na hirder y gorf, drefenn my dh'y skonya; rag ny wra an Arloedh gweles kepar dell wel mab-den; rag mab-den a vir war an semlans, mes an Arloedh a vir war an golonn.’ 8Ena Yesse a elwis Abinadab dhodho, ha gul dhodho tremena a-dherag Samuel. Hag yn-medh ev, ‘Ny dhewisas an Arloedh hemma.’ 9Ena Yesse a wrug Shamma dhe dremena. Hag yn-medh ev, ‘Ny dhewisas an Arloedh hemma.’ 10Yesse a wrug seyth a'y vebyon dhe dremena a-dherag Samuel, ha Samuel a leveris dhe Yesse, ‘Ny dhewisas an Arloedh an re ma.’ 11Samuel a leveris dhe Yesse, ‘Usi oll dha vebyon omma?’ Hag ev a worthybis, ‘Yma gesys saw an yowynka, mes yma ev ow kwitha an deves.’ Ha Samuel a leveris dhe Yesse, ‘Dannvon ha'y gyrghes; rag ny esedhyn erna dheffo omma.’ 12Ev a dhannvonas ha'y dhri a-ji. Lemmyn ev o rudhik, gans dewlagas teg, ha semlans da. An Arloedh a leveris, ‘Sav ha gwra y untya; rag hemm yw ev.’ 13Ena Samuel a gemmeras korn an oyl, ha'y untya yn mysk y vreder; ha spyrys an Arloedh a dheuth war Davydh, a-dhiworth an jydh na alena rag. Ena Samuel a sevis ha mones dhe Rama.

Davydh a Sen an Sowtri rag Sowl

14Mes spyrys an Arloedh a dhibarthas a-dhiworth Sowl, ha tebel spyrys a-dhiworth an Arloedh a'n tormentya. 15Ha gwesyon Sowl a leveris dhodho, ‘Otta lemmyn, yma tebel spyrys a-dhiworth Duw orth dha tormentya. 16Gas agan Arloedh lemmyn dhe erghi dha wesyon usi a-dheragos, dhe hwilas nebonan a woer seni an sowtri; ha pan usi an tebel spyrys a-dhiworth Duw warnas, ev a wra y seni, ha da vydh dhis.’ 17Ha Sowl a leveris dh'y wesyon, ‘Proviewgh dhymm lemmyn gour neb a woer seni yn ta, ha drewgh e dhymm.’ 18Ena onan a'n wesyon a worthybis, ‘My re welas mab a Yesse an Bethlehemyas neb a woer seni, ha gour kolonnek, kasor, fur yn kows, ha gour a semlans da; hag yma an Arloedh ganso.’ 19Ytho Sowl a dhannvonas kannasow dhe Yesse, ha leverel, ‘Dannvon dhymm dha vab Davydh, usi gans an deves.’ 20Ha Yesse a gemmeras asen beghys gans bara, ha kroghen a win, ha mynn, ha'ga dannvon der y vab Davydh dhe Sowl. 21Ha Davydh a dheuth dhe Sowl, ha sevel a-dheragdho. Sowl a'n kara yn feur, hag ev a dheuth ha bos deger y arvow. 22Ha Sowl a dhannvonas dhe Yesse ow leverel, ‘Gas Davydh dhe wortos y'm servis, rag ev re gavas favour y'm golok.’ 23Ha peskweyth may to an tebel spyrys a-dhiworth Duw war Sowl, Davydh a gemmeri an sowtri ha'y seni gans y dhorn, hag yndellma Sowl a gevi difres, hag o gwell, ha'n tebel spyrys a dhiberthi anodho.