Davydh ha Goliath

1Lemmyn an Filistysi a guntellas aga luyow war-barth dhe vatalyas; i a veu omguntellys war-barth yn Soko, a bew Yuda, hag i a gampyas yntra Soko hag Azeka, yn Efes-dammim. 2Sowl ha gwer Ysrael a omguntellas, ha kampya ryb nans Ela, hag araya aga honan rag kas erbynn an Filistysi. 3An Filistysi a sevis war venydh a'n eyl tu, hag Ysrael a sevis war venydh a'n tu arall, hag yth esa nans yntredha. 4Hag y teuth yn-mes a gamp an Filistysi kampyer, ha'y hanow Goliath a Gath, neb o hwegh kevelin ha dornva yn ughelder. 5Yth esa basnett a vrons war y benn, hag ev o ervys gans kaspows; ha poes an bows o pymp mil shekel a vrons. 6Yth esa dhodho arvow a vrons war y dhiwarr ha guw a vrons ynter y dhiwskoedh. 7Sheft y wuw o kepar ha gwelenn gwiader, ha poes penn y wuw o hwegh kans shekel a horn; ha'y skoeswas eth a-dheragdho. 8Ev a sevis ha garma dhe luyow Ysrael, ha leverel dhedha, ‘Prag y teuvewgh yn-mes dhe araya agas honan rag kas? A nyns ov vy Filistyas, hag a nyns owgh hwi gwesyon Sowl? Dewisewgh gour ragowgh agas honan, ha gesewgh ev dhe dhos yn-nans dhymm. 9Mar kyll ev omladh genes, ha'm ladha, ena ni a vydh agas kethwesyon; mes mar kwarthevyav er y bynn ha'y ladha, ena hwi a vydh agan kethwesyon ha hwi a'gan serv.’ 10Hag yn-medh an Filistyas, ‘Hedhyw my a dhefi luyow Ysrael; rewgh dhymm gour, may hyllyn omladh war-barth.’ 11Pan leveris Sowl hag oll Ysrael geryow an Filistyas ma, sowdhenys ha dyegrys ens.

12Lemmyn Davydh o mab an Efrathyas a Bethlehem yn Yuda, ha'y hanow Yesse, hag yth esa dhodho eth mab. Yn dydhyow Sowl an gour o seulabrys koth, gyllys y'n blydhynyow. 13An tri hottha mebyon a Yesse eth ha holya Sowl dhe'n vatel; henwyn y dri mab neb eth dhe'n vatel o Eliab an kynsa-genys, ha'n nessa dhodho Abinadab, ha'n tressa Shamma. 14Davydh o an yowynka; ha'n tri hottha a holyas Sowl, 15mes Davydh a wre mos ha dehweles a Sowl dhe vaga deves y das yn Bethlehem. 16Rag dew-ugens dydh an Filistyas a dho yn-rag ha sevel a-dheragdha myttin ha gorthugher.

17Lemmyn Yesse a leveris dh'y vab Davydh, ‘Kemmer rag dha vreder efa a'n ys rostys ma, ha'n deg torth-vara ma, ha poen dhe'n gamp dhe'th vreder; 18ha kemmer an deg rann ma a geus dhe bennhembrenkyas aga mil. Ha gwel fatell yw gans dha vreder, ha dri neb tokyn anedha.’

19Lemmyn yth esa Sowl, hag i, hag oll gwer Ysrael, yn nans Ela, ow patalyas orth an Filistysi. 20Davydh a sevis myttin a-varr, ha gasa an deves gans gwithyas, ha kemmeres an sosten, ha mos kepar dell wrussa Yesse erghi dhodho. Ev a dheuth dhe'n kamp yn kettermyn dell esa an lu ow mos yn-rag dhe'n vatel, ow karma rag an vatel. 21Ysrael ha'n Filistysi a arayas aga honan rag kas, lu a-dal lu. 22Davydh a asas y daklow yn dorn gwithyas an fardellow, ha poenya a-ji dhe'n lu ha salusi y vreder. 23Pan esa ev ow kewsel gansa, an kampyer, an Filistyas a Gath, Goliath y hanow, a dheuth yn-bann mes a linenn vatel an Filistysi, ha kewsel an keth geryow ha kyns. Ha Davydh a'n glewas.

24Oll gwer Ysrael, pan welsons an gour, a fias anodho, ha perthi own bras. 25Ha gwer Ysrael a leveris, ‘A welsowgh an gour ma neb a dheuth yn-bann? Yn sur ev re dheuth yn-bann dhe dhefia Ysrael. An myghtern a wra rych an gour neb a'n ladh, ha ri dhodho y vyrgh ha gul y deylu rydh a doll yn Ysrael.’ 26Davydh a leveris dhe'n wer esa sevys rybdho, ‘Pandr'a vydh gwrys rag an gour neb a ladh an Filistyas ma, ha kemmeres dhe-ves an meth dhiworth Ysrael? Rag piw yw an Filistyas antrodreghys ma may hyll ev defia luyow an Duw bew?’ 27An bobel a worthybis dhodho war-lergh an vaner ma, ow leverel, ‘Yndella y fydh gwrys rag an gour neb a'n ladh.’

28Eliab y gottha broder a'n klewas pan gewsis ev dhe'n wer; ha sorr Eliab a dhewis erbynn Davydh, hag ev a leveris, ‘Prag y teuthys yn-nans omma? Piw ganso y hwruss'ta gasa an deves boghes na y'n gwylvos? My a woer dha valghder ha sherewynsi dha golonn; rag ty re dheuva yn-nans rag may halles gweles an vatel.’ 29Hag yn-medh Davydh, ‘Pandr'a wrug vy lemmyn? A nyns eus gwir dhe gewsel?’ 30Hag ev a dreylyas dhe-ves anodho war-tu gour arall, ha kewsel war-lergh an keth vaner; ha'n bobel a'n worthybis arta war-lergh an vaner kyns.

31Pan veu klewys an geryow a gewsis Davydh, i a's dasleveris a-dherag Sowl; hag ev a dhannvonas war y lergh. 32Davydh a leveris dhe Sowl, ‘Na wres kolonn denvyth fyllel a'y wovis ev; dha was a wra mos hag omladh gans an Filistyas ma.’ 33Ha Sowl a leveris dhe Davydh, ‘Ny yllydh mones erbynn an Filistyas ma dhe omladh ganso; rag ty yw marnas maw, hag ev re beu kasor a-dhia y yowynkneth.’ 34Mes Davydh a leveris dhe Sowl, ‘Dha was a witha deves rag y das, ha peskweyth may teu lew po ors, ha kemmeres oen mes a'n flokk, 35my eth yn-mes ha'y siwya, ha'y weskel dhe'n leur, ha delivra an oen mes a'y anow; ha mar treylya er ow fynn, my a'n dalghennsa gans y varv, ha'y weskel dhe'n leur, ha'y ladha. 36Dha was re ladhas lewyon hag orses; ha'n Filistyas antrodreghys ma a vydh kepar hag onan anedha, a-ban wrug ev defia luyow an Duw bew.’ 37Yn-medh Davydh, ‘An Arloedh neb a'm delivras dhiworth paw an lew ha dhiworth paw an ors, ev a'm delirv dhiworth dorn an Filistyas ma.’ Ha Sowl a leveris dhe Davydh, ‘Ke, ha re bo an Arloedh genes.’

38Sowl a gwethas Davydh gans y arvow; ev a worras basnett a vrons war y benn ha'y gwetha gans kaspows. 39Davydh a wrogysas y gledha war y arvow, hag yn euver ev a assayas kerdhes, rag nyns o ev usys dhedha. Ha Davydh a leveris dhe Sowl, ‘Ny allav kerdhes gansa; rag nyns ov usys dhedha.’ Ytho Davydh a's removas anodho. 40Ena ev a gemmeras y lorgh yn y dhorn, ha dewis ragdho pymp bilienn mes a'n gover, ha'ga gorra yn y sagh bugel deves, y'n skryp, hag yth esa y dowlbrenn yn y dhorn, hag ev a dheuth nes dhe'n Filistyas.

41An Filistyas a dheuth yn-rag ha dos nes dhe Davydh, gans y skoeswas a-dheragdho. 42Ha pan viras a-dro ha gweles Davydh, ev a'n dispresyas, rag ev o marnas maw, rudhik ha teg y semlans. 43An Filistyas a leveris dhe Davydh, ‘Ov vy ki, may teudh dhymm gans lorghow?’ Ha'n Filistyas a vollethis Davydh dre y dhuwow. 44Hag yn-medh an Filistyas dhe Davydh, ‘Deus dhymm, ha my a re dha gig dhe ydhyn an ayr ha dhe vestes an gwel.’ 45Mes Davydh a worthybis dhe'n Filistyas, ‘Ty a dheu er ow fynn gans kledha ha gans guw ha gans skoes; mes my a dheu er dha bynn yn hanow Arloedh an luyow, Duw luyow Ysrael, neb re wruss'ta y dhefia. 46Y'n jydh hedhyw an Arloedh a wra dha dhelivra y'm leuv, ha my a'th wysk dhe'n leur ha treghi dhe-ves dha benn; ha my a re korfow marow lu an Filistysi y'n jydh hedhyw dhe ydhyn an ayr ha dhe vestes an dor, may hwodhvo oll an norvys bos Duw yn Ysrael, 47ha may hwodhvo oll an kuntelles na wra an Arloedh sawya dre gledha ha guw; rag yma an vatel dhe'n Arloedh hag ev a'th re yn agan leuv.’

48Pan dheuth an Filistyas nes dhe dhyerbynna Davydh, Davydh a boenyas yn uskis war-tu an linenn vatel dhe dhyerbynna an Filistyas. 49Ha Davydh a worras y leuv yn y sagh, ha kemmeres men yn-mes, ha'y worra yn y dowlbrenn ha'y dewlel ha gweskel an Filistyas war y dal; an men a dhewanas y dal, hag ev a goedhas ha'y fas dhe'n leur.

50Ytho Davydh a warthevyas war an Filistyas dre dowlbrenn ha dre ven, ha gweskel dhe'n leur an Filistyas ha'y ladha; mes nyns esa kledha vyth yn dorn Davydh. 51Rakhenna Davydh a boenyas ha sevel war an Filistyas; ev a dhalghennas y gledha, ha'y denna mes a'y woen, ha'y ladha; ena ev a droghas dhe-ves y benn dredho. Pan welas an Filistysi bos aga hampyer marow, i a fias.

52Ha gwer Ysrael ha Yuda a sevis ha garma ha helghya an Filistysi bys yn Gath ha yetys Ekron may koedhas an Filistysi ledhys war an fordh a-dhiworth Shaaraym bys yn Gath hag Ekron. 53An Ysraelysi a dhehwelis dhiworth helghya an Filistysi, hag i a byllas aga hamp. 54Davydh a gemmeras penn an Filistyas ha'y dhri dhe Yerusalem; mes ev a worras y arvow yn y dylda.

55Ha pan welas Sowl bos Davydh ow mos yn-rag erbynn an Filistyas, ev a leveris dhe Abner, kaslewydh an lu, ‘Abner, piw yw an gour yowynk ma mab dhodho?’ Hag yn-medh Abner, ‘Dell vew dha enev, A vyghtern, ny wonn.’ 56Ha'n myghtern a leveris, ‘Govynn piw yw an yonker mab dhodho.’ 57Pan dhehwelis Davydh dhiworth ladhva an Filistysi, Abner a'n kemmeras ha'y dri a-dherag Sowl, gans penn an Filistyas yn y leuv. 58Yn-medh Sowl dhodho, ‘Piw osta mab dhodho, ty wour yowynk?’ Ha Davydh a worthybis, ‘My yw mab dha was Yesse an Bethlehemyas.’