Ambos Yonathan Gans Davydh

1Pan worfennsa Davydh kewsel dhe Sowl, enev Yonathan a veu kelmys orth enev Davydh, ha Yonathan a'n kara avel y enev y honan. 2Sowl a'n kemmeras an jydh na ha ny'n gasa dhe dhehweles namoy dhe ji y das. 3Ena Yonathan a wrug ambos gans Davydh, drefenn ev dh'y gara avel y enev y honan. 4Ha Yonathan a removas an goen esa warnodho, ha'y ri dhe Davydh, ha'y arvow, ha'y gledha hag ynwedh y warak ha'y wrogys. 5Davydh eth yn-mes hag yn pub le ma'n dannvonas Sowl, ev a sewenis; rakhemma, Sowl a'n settyas war an lu. Ha hemm o da yn golok an bobel oll, hag ynwedh yn golok gwesyon Sowl.

6Pan esens ow tos tre, y'n termyn may tehwelis Davydh dhiworth ladhva an Filistyas, an benynes eth yn-mes a oll sitys Ysrael, ow kana hag ow tonsya, dhe dhyerbynna myghtern Sowl, gans tabourigow, gans kanow a lowena, ha gans daffar menestrouthi. 7Ha'n benynes a ganas an eyl dh'y ben hag i ow lowenhe,

‘Sowl re ladhas y vilyow,

ha Davydh y dhegow a vilyow.’

8Sowl o pur serrys, rag an lavar ma a'n displesyas. Ev a leveris, ‘I re askrifas dhe Davydh degow a vilyow, ha dhymmo vy i re askrifas milyow; pandr'a yll ev kavoes moy saw an vyghterneth?’ 9Ha Sowl a viri orth Davydh gans gogrys a-dhia'n jydh na hag yn-rag.

Sowl a Assay Ladha Davydh.

10An nessa dydh tebel spyrys dhiworth Duw a fyskas war Sowl, hag ev a vuskegis a-ji dh'y ji, ha Davydh ow telynnya kepar dell wre orth prysyow erell. Hag yth esa guw yn dorn Sowl; 11ha Sowl a dewlis an guw, ow prederi, ‘My a genter Davydh orth an paros gensi.’ Mes Davydh a skapyas diwweyth.

12Sowl a borthas own a Davydh, drefenn bos an Arloedh ganso, mes gyllys dhiworth Sowl. 13Rakhenna Sowl a'n removas a'y lok, ha'y wul pennhembrenkyas war vil; hag yth esa ev ow mos yn-mes ha dehweles a-dherag an bobel. 14Yth esa sewena dhe Davydh yn oll y oberow; rag yth esa an Arloedh ganso. 15Pan welas Sowl bos dhodho sewena veur, ev a borthas own anodho. 16Mes oll Ysrael ha Yuda a gara Davydh, drefenn ev dhe vos yn-mes ha dos a-ji a-ragdha.

Davydh a Dhemmedh Mikal

17Ena Sowl a leveris dhe Davydh, ‘Otta ow hottha myrgh Merab, my a vynn hy ri dhis avel gwreg; mes bydh kolonnek ragov, ha batal batelyow an Arloedh.’ Rag Sowl a dybis, ‘Ny vynnav sevel ow leuv er y bynn, mes bedhes leuv an Filistysi warnodho.’ 18Yn-medh Davydh dhe Sowl, ‘Piw ov vy, ha pyth yw ow theylu,18:18 theylu: Amendys. Ebrow bewnans. ha pyth yw kordh ow thas yn Ysrael, may fiv deuv dhe'n myghtern?’ 19Mes pan dheuth an termyn dhe ri Merab myrgh Sowl dhe Davydh, hi a veu res dhe Adriel an Meholathyas avel gwreg.

20Mes myrgh Sowl Mikal a gara Davydh. Ha'n bobel a'n derivas dhe Sowl ha hemm o da yn y dhewlagas. 21Ha Sowl a dybis, ‘My a vynn hy ri dhodho rag may hyll hi dos ha bos antell ragdho, ha may hyll bos leuv an Filistysi warnodho.’ Rakhenna Sowl a leveris dhe Davydh unnweyth arta, ‘Ty a vydh ow deuv an jydh ma.’ 22Ha Sowl a erghis dh'y wesyon, ha leverel, ‘Kewsewgh gans Davydh yn privedh ha leverel, “Otta, an myghtern a'n jeves delit ynnos, hag oll y wesyon a'th kar; lemmyn rakhenna, bydh deuv an myghtern.” ’ 23Ytho gwesyon Sowl a dherivas an geryow dhe Davydh yn privedh. Ha Davydh a leveris, ‘A hevel dhywgh tra vyghan dhe vos deuv an myghtern, a-ban ov gour boghosek ha heb ger-da?’ 24Ha gwesyon Sowl a dherivas dhodho, ‘Hemm yw an pyth a leveris Davydh.’ 25Ena Sowl a leveris, ‘Yndella y leverewgh dhe Davydh, “Ny vynn an myghtern ro demmedhyans vyth marnas kans kudhgenn a'n Filistysi, dhe dyli dial war eskerens an myghtern.” ’ Mes towl Sowl o gul Davydh dhe goedha dre leuv an Filistysi. 26Ha pan dherivas y wesyon an geryow ma dhe Davydh, fest da o gans Davydh bos deuv an myghtern. Kyns an termyn dhe dremena, 27Davydh a sevis ha mos, gans y wer, ha ladha kans Filistyas; ha Davydh a dhros aga hudhgenn, hag ev a's ros yn niver leun dhe'n myghtern, may hylli dos ha bos deuv an myghtern. Ha Sowl a ros dhodho Mikal y vyrgh avel gwreg. 28Mes pan welas Sowl ha konvedhes bos an Arloedh gans Davydh, ha'y vyrgh Mikal dh'y gara, 29Sowl a borthas own meurra a Davydh. Yndella Sowl a dheuth ha bos eskar Davydh a-dhia'n jydh na hag yn-rag.

30Ena pennhembrenkysi an Filistysi a dheuth yn-mes dhe vatalyas; ha peskweyth may hwrens i dos yn-mes, Davydh a seweni moy ages oll gwesyon Sowl, may teuth ha bos y ger-da pur vras.