Yonathan a Bled rag Davydh

1Sowl a gewsis orth y vab Yonathan ha gans oll y wesyon a-dro dhe ladha Davydh. Mes Yonathan mab Sowl a gemmeras delit meur yn Davydh. 2Yonathan a dherivas orth Davydh, ‘Ow thas Sowl a vynn dha ladha; rakhenna bydh war ternos vyttin; gorta yn tyller kevrinek hag omgudh. 3My a wra mos yn-mes ha sevel ryb ow thas y'n gwel mayth esos, ha my a gews gans ow thas a-dro dhis; ha'n pyth a welav my a dheriv dhis.’ 4Ha Yonathan a gewsis da a-dro dhe Davydh dhe Sowl y das, ha leverel dhodho, ‘Na wres an myghtern pegha erbynn y was Davydh, rag ny beghas er dha bynn, ha'y weythresow ragos re beu pur dha; 5rag ev a worras y vewnans yn y leuv ha ladha an Filistyas, ha'n Arloedh a dhros trygh meur rag oll Ysrael. Ty a'n gwelas ha lowenhe; prag y fynnydh pegha erbynn goes gwiryon, dhe ladha Davydh heb ken?’ 6Ha Sowl a woslowas orth lev Yonathan; ha Sowl a dos, ‘Dell vew an Arloedh, ny vydh ev gorrys dhe'n mernans.’ 7Ha Yonathan a elwis Davydh ha derivas oll an traow ma dhodho. Ha Yonathan a dhros Davydh dhe Sowl, hag yth esa ev yn y lok, kepar ha kyns.

Mikal a Weres Davydh dhe Dhiank

8Yth esa bresel arta, ha Davydh eth yn-mes dhe vatalyas orth an Filistysi. Ev a's ladhas gans ladhva veur, hag i a fias a-ragdho. 9Ena tebel spyrys dhiworth an Arloedh a dheuth war Sowl, hag ev owth esedha yn y ji gans y wuw yn y dhorn, ha Davydh ow telynnya gans y leuv. 10Sowl a assayas dhe gentra Davydh dhe'n paros der an guw; mes ev a wohelas Sowl, may hweskis ev an guw y'n fos. Davydh a fias ha diank an nos na.

11Sowl a dhannvonas kannasow dhe ji Davydh dhe aspia orto ha dh'y ladha myttinweyth. Ha Mikal gwreg Davydh a dherivas orto, ‘Mar ny sawydh dha vewnans haneth, a-vorow ty a vydh ledhys.’ 12Ytho Mikal a iselhas Davydh yn-nans der an fenester: hag ev eth ha fia ha diank. 13Mikal a gemmeras idol ha'y worra war an gweli; hi a worras kolghes a vlew gever war y benn, ha'y gwetha gans dillas. 14Pan dhannvonas Sowl kannasow dhe gemmeres Davydh, yn-medh hi, ‘Ev yw klav.’ 15Ha Sowl a dhannvonas an kannasow arta dhe weles Davydh ragdha aga honan, ow leverel, ‘Drewgh ev yn-bann dhymm y'n gweli, may hallav y ladha.’ 16Ha pan dheuth an kannasow a-ji, yth esa an idol y'n gweli, gans kolghes a vlew gever orth y benn. 17Yn-medh Sowl dhe Mikal, ‘Prag y hwruss'ta ow thoella yndellma, ha gasa ow eskar dhe vones, may tienkas?’ Ha Mikal a worthybis Sowl, ‘Ev a leveris dhymm, “Gas vy dhe vones, poken my a'th ladh.” ’

Davydh a Dheu dhe Samuel yn Rama

18Lemmyn Davydh a fias ha diank; ev a dheuth dhe Samuel yn Rama, ha derivas dhodho oll re wrussa Sowl dhodho. Ev ha Samuel eth ha triga yn Nayoth. 19Y feu derivys dhe Sowl, ‘Ottomma Davydh yn Nayoth yn Rama.’ 20Ena Sowl a dhannvonas kannasow dhe gemmeres Davydh. Pan welsons kowethas an brofoesi ow profoesa, gans Samuel ow sevel avel penn warnedha, spyrys Duw a dheuth war gannasow Sowl, hag i ynwedh a brofoesas. 21Ha pan veu hemma derivys dhe Sowl, ev a dhannvonas kannasow arta tressa gweyth, hag i ynwedh a brofoesas. 22Ena ev y honan eth dhe Rama. Ev a dheuth dhe'n puth bras usi yn Seku. Ev a wovynnas, ‘Ple'ma Samuel ha Davydh?’ Ha nebonan a worthybis ‘Ymons i yn Nayoth yn Rama.’ 23Ytho ev eth di, dhe Nayoth yn Rama; ha spyrys Duw a dheuth warnodho. Yth esa ow mos yn-rag ow brofoesa, bys pan dheuth dhe Nayoth yn Rama. 24Hag ev ynwedh a removas y dhillas, ha profoesa a-dherag Samuel yn kepar maner. Ev a wrowedhas noeth oll an jydh na hag oll an nos na. Rakhenna leverys yw, ‘Usi Sowl ynwedh yn mysk an brofoesi?’