Pysadow Hanna

1Ena Hanna a bysis ha leverel,

‘Ow holonn a lowenha y'n Arloedh;

ow horn yw ughelhes y'n Arloedh.

Ow ganow yw moghhes dres ow eskerens,

drefenn my dhe lowenhe y'th selwyans.

2‘Nyns eus Sans kepar ha'n Arloedh,

nyns eus nagonan marnas ty;

nyns eus karrek kepar ha'gan Duw.

3Na gewsewgh prest namoy mar brout,

na wres balghder dos a-dhiworth agas ganow;

rag an Arloedh yw Duw a skians,

ha ganso gwriansow yw poesys.

4Gwaregow gwer alloesek yw terrys,

ha'n re a drebuch yw grogysys gans nerth.

5An re leun re werthas aga lavur rag bara,

mes an re nownek ny's teves nown namoy.

An anvap re dhineythis seyth,

mes hi neb a's teves lies flogh a wedher.

6An Arloedh a ladh ha bewhe;

ev a dhre dhe ifarn ha drehevel yn-bann.

7An Arloedh a wra boghosek ha gul rych;

ev a iselha, hag ev a ughelha.

8Ev a dhrehav an den gwann yn-mes a'n doust;

ev a dhrehav an boghosek yn-mes a'n lusuek,

dh'aga settya gans pennsevigyon,

ha gul dhedha erita tron a enor.

Rag yma selyow an norvys dhe'n Arloedh,

hag ev re settyas an norvys warnedha.

9‘Ev a with treys y dus lel,

mes an debeles a vydh tawesek yn tewlder;

rag dre alloes ny wra denvyth gwarthevya.

10Eskerens an Arloedh a vydh brewys;

ev a darenn er aga fynn a-dhiworth nev.

An Arloedh a vreus pennow an nor;

ev a re galloes dh'y vyghtern,

hag ughelhe korn y untys.’

Tebel Vebyon Eli

11Ena Elkana eth dhe Rama dh'y ji, hag yth esa an maw ow servya a-dherag an Arloedh y'n lok Eli.

12Lemmyn mebyon Eli o mebyon Belial; ny aswonnens an Arloedh. 13Us an oferysi gans an bobel o, pan offrynna neb gour sakrifis, gwas an oferyas a dho yn kettermyn dell esa an kig ow pryjyon, gans kigver a dri dans yn y dhorn, 14hag ev a'n pokya y'n pott, po y'n kowdarn, po y'n pott, ha pup-tra a wre an kigver y dhri yn-bann an oferyas a gemmeri ragdho y honan. Yndella i a wre yn Shilo dhe oll tus Ysrael hag a dho di. 15Ynwedh, kyns i dhe leski an blonek, gwas an oferyas a dho ha leverel dhe'n gour esa ow sakrifia, ‘Ro dhymm kig rag an oferyas dh'y rostya; rag ny vynn ev kavoes kig bryjys a-dhiworthis, mes kriv.’ 16Ha mar leveri an gour dhodho, ‘Gas i dhe leski an blonek kynsa, hag ena kemmer kekemmys a vynnydh’, ev a worthybi, ‘Nansi, mes ro e dhymm lemmyn, poken my a'n kemmer gans fors.’ 17Yndella peghosow an wer yowynk o pur vras yn golok an Arloedh; rag an wer a dhyghtya gans bismer offrynn an Arloedh.

An Flogh Samuel yn Shilo

18Mes yth esa Samuel ow servya a-dherag an Arloedh, maw dell o, grogysys gans efod a lien. 19Y vamm a wre ragdho goen byghan ha'y dri dhodho pub blydhen, pan e hi yn-bann gans hy gour dhe offrynna an sakrifis blydhenyek. 20Ena Eli a benniga Elkana ha'y wreg, ha leverel, ‘Re rollo an Arloedh dhis fleghes dre an venyn ma yn le an brestenn a wrug hi dhe'n Arloedh’; hag ena i a dhehweli dhe dre.

21Ha'n Arloedh a visityas Hanna; hi a omdhuk ha dineythi tri mab ha diw vyrgh. Ha'n maw Samuel a devis yn lok an Arloedh.

Profoesans Erbynn Chi Eli

22Lemmyn pur goth o Eli. Ev a glewas pup-tra mayth esa y vab orth y wul dhe Ysrael oll, ha fatell wrowedhens gans an benynes neb a servya orth daras tylda an kuntelles. 23Hag ev a leveris dhedha, ‘Prag y hwrewgh hwi traow a'n par na? Rag my a glew a-dro dh'agas drogoberow a-dhiworth oll an dus ma. 24Nansi, ow mebyon; rag nyns yw derivas da a glewav ow lesa yn mysk pobel an Arloedh. 25Mar pegh unn gour erbynn gour arall, Duw a vreus yntredha; mes mar pegh gour erbynn an Arloedh, piw a vydh an pledyas ragdho?’ Mes ny woslowsons orth lev aga thas; drefenn bos bodh an Arloedh aga ladha.

26Ha'n maw Samuel a besyas tevi yn ughelder hag yn favour gans an Arloedh hag ynwedh gans tus.

27Lemmyn gour Duw a dheuth dhe Eli ha leverel dhodho, ‘Yndellma y lever an Arloedh, “A ny dhiskwedhis vy ow honan yn kler dhe ji dha das pan esens yn Ejyp yn chi Faro? 28My a'n dewisas mes a oll loethow Ysrael dhe vos ow oferyas, dhe vones yn-bann dhe'm alter, dhe leski ynkys, dhe wiska efod a-dheragov; ha my a ros dhe ji dha das oll an offrynnow gwrys gans tan gans tus Ysrael. 29Prag y potyowgh orth ow sakrifis hag orth ow offrynn re worhemmynnis vy dhywgh rag ow thrigva, hag enora dha vebyon moy agesov, ow tewhe agas honan war an gwella rannow a bub offrynn a'm pobel Ysrael?” 30Rakhenna an Arloedh, Duw Ysrael a dhiskler: “My a leveris yn hwir dha ji ha chi dha das dhe gerdhes a-dheragov bys vykken”; mes lemmyn an Arloedh a dhiskler: “Pell bedhes dhiworthiv; rag an re neb a'm enor my a enor, ha'n re neb a'm dispres a vydh dyghtys gans bismer. 31Otta, yma dydhyow ow tos may troghav dhe-ves dha nerth ha nerth chi dha das, rag ny vydh den koth y'th chi. 32Hag ena ty a wel ahwer y'm trigva. Spit dhe oll an sewenyans a dheu dhe Ysrael, ny vydh nevra den koth y'th chi bys vykken. 33Ha'n gour ahanas na droghav dhe-ves a-dhiworth ow alter my a spar, dhe wul dhe'th tewlagas fyllel, ha grevya dha golonn; hag oll an re yw genys dhe'th teylu a verow avel gwer yn flour aga gourses. 34Hemma a vydh tokyn dhis, an pyth a dheu war dha dhew vab, Hofni ha Finehas: aga dew a verow war an keth jydh. 35Ha my a dhrehav ragov ow honan oferyas lel, neb a wra war-lergh an pyth usi y'm kolonn ha'm brys. My a dhrehav ragdho chi sur, hag ev a gerdh a-dherag ow untys bys vykken. 36Ena peub yw gesys y'th chi a dheu ha plegya dhe'n dor a-ragdho rag tamm a arghans ha torth-vara, ha leverel, Gorr vy, my a'th pys, yn neb soedh oferyasek, rag may hallav dybri tamm a vara.” ’