Kerensa yntra Davydh ha Yonathan

1Ena Davydh a fias dhiworth Nayoth yn Rama. Ev a dheuth dherag Yonathan ha leverel, ‘Pandr'a wrug vy? Pandr'yw ow hammweyth? Ha pandr'yw ow fegh erbynn dha das mayth usi ev ow hwilas kemmeres ow bewnans?’ 2Yn-medh ev dhodho, ‘Bynner re bo! Ny verwydh. Ny wra ow thas travyth na bras na byghan saw ev dh'y dhiskwedhes dhymm; ha prag y koedh dhe'm tas kudha an dra ma ahanav? Nyns yw yndella.’ 3Mes ynwedh Davydh a dos, ‘Dha das a woer yn ta my dhe gavoes gras y'th wolok; hag ev a breder, “Na as Yonathan dhe wodhvos hemma, po ev a vydh grevys.” Mes yn gwiryonedh, dell vew an Arloedh ha dell vewydh dha honan, yma saw kamm yntredhov ha mernans.’ 4Ena yn-medh Yonathan dhe Davydh, ‘Pynag a vo dha vodh, my a'n gwra ragos.’ 5Hag yn-medh Davydh dhe Yonathan, ‘Y fydh an loer nowydh a-vorow, ha ny allav fyllel esedha gans an myghtern orth an prys-boes; mes gas vy dhe dhones, may hylliv omgudha y'n gwel bys y'n tressa gorthugher. 6Mar kovynn dha das yn ter a-dro dhymm lavar, “Davydh a wovynnas yn tiwysyk kummyas orthiv poenya dhe Bethlehem y sita; rag yma sakrifis blydhenyek ena rag oll an teylu.” 7Mar lever ev, “Da yw” y fydh yn ta gans dha was; mes mar pydh ev pur serrys, ena bydh sur bos drog ervirys ganso. 8Rakhenna dyght dha was yn hegar, rag ty re dhros dha was yn kevambos sans genes. Mes mars eus kammweyth ynnov, ladh vy dha honan; rag prag y tegoedh dhis ow dri dhe'th tas?’ 9Yn-medh Yonathan, ‘Bynner re bo! Mar kodhven bos ervirys gans ow thas drog dhe dhos warnas, ena a ny dherivsen orthis?’ 10Ena yn-medh Davydh dhe Yonathan, ‘Piw a vynn derivas orthiv mar korthyp dha das yn harow dhis?’ 11Ha Yonathan a worthybis, ‘Deus, deun yn-mes y'n gwel.’ Ytho i eth yn-mes aga dew y'n gwel.

12Yonathan a leveris dhe Davydh, ‘Re'n Arloedh, Duw Ysrael! Wosa my dhe dhiskudha brys ow thas, a-dro dhe'n termyn ma a-vorow, po an tressa dydh, ha mars yw da y vaner troha Davydh, a ny dhannvonav ytho ha'y dherivas dhis? 13Mes mar mynn ev gul drog dhis, re wrello an Arloedh yndella dhe Yonathan, ha moy ynwedh, mar ny'n deriv dhis, ha dha dhannvon dhe-ves, may hyllydh mones yn sawder. Re bo an Arloedh genes, kepar dell re beu gans ow thas. 14Ha mars ov hwath yn few, diskwa dhymm tregeredh an Arloedh; mes mar marwav, 15na drogh dhe-ves nevra dha dregeredh dhiworth ow chi, kyn hwrella an Arloedh treghi dhe-ves oll eskerens Davydh a-dhiworth enep an norvys.’ 16Yndella Yonathan a wrug kevambos gans chi Davydh, ow leverel, ‘Re hwilli an Arloedh eskerens Davydh.’ 17Yonathan a wrug dhe Davydh daswul y di, drefenn ev dh'y gara: rag ev a'n kara kepar dell gara ev y vewnans y honan.

18Ena yn-medh Yonathan dhe Davydh, ‘Y fydh an loer nowydh a-vorow; hag y fydh govynnys yn ter a-dro dhis, rag dha dyller a vydh gwag. 19Wosa tri dydh, ty a wra mos yn-nans bys y'n tyller mayth omgudhsys kyns, ha gortos ena ryb an krug a veyn. 20Ha my a denn teyr seth dhe'n tenewen, kepar ha pan dennen vy orth kostenn. 21Ena my a dhannvon an maw, ow leverel, “Ke, hwila an sethow.” Mar lavarav dhe'n maw, “Ottomma an sethow war an tenewen ma ahanas, kuntell i”, ena deus, rag dell vew an Arloedh, y fydh saw ragos ha nyns eus danjer vyth. 22Mes mar lavarav dhe'n yonker, “Ottomma an sethow dresos”, ena ke; rag an Arloedh re'th tannvonas dhe-ves. 23Hag a-dro dhe'n mater may kewssyn ty ha my, an Arloedh yw dustuni yntra ty ha my bys vykken.’

24Ytho Davydh a omgudhas y'n gwel. Ha pan dheuth an loer nowydh an myghtern a esedhas dhe dhybri. 25An myghtern a esedhas war y gador, kepar ha pup-prys, war an gador ryb an paros. Yth esa Yonathan a-dal dhodho, hag Abner a esedhas ryb tenewen Sowl; mes tyller Davydh o gwag.

26Mes ny leveris Sowl travyth an jydh na; rag ev a dybi, ‘Neppyth re hwarva dhodho; nyns yw ev glan, yn sur nyns yw ev glan.’ 27Mes y'n nessa dydh, an jydh wosa an loer nowydh, tyller Davydh o gwag. Yn-medh Sowl dh'y vab Yonathan, ‘Prag na dheuth mab Yesse dhe dhybri, naneyl de, na hedhyw?’ 28Ha Yonathan a worthybis dhe Sowl, ‘Davydh a wovynnas yn tiwysyk kummyas orthiv mones dhe Bethlehem; 29ev a leveris, “Gas vy dhe vones, my a'th pys; rag yma dh'agan teylu sakrifis y'n sita, ha'm broder re worhemmynnis dhymm bos ena. Ytho lemmyn, mar kevis favour y'th lagas, gas vy dhe vos, my a'th pys, may hallav gweles ow breder.” Rakhenna ny dheuth ev dhe voes an myghtern.’

30Ena sorr Sowl a dhewis erbynn Yonathan. Ev a leveris dhodho, ‘Ty vab a venyn dreus ha gorth! A ny wonn ty dhe dhewis mab Yesse dhe'th veth dha honan, ha dhe veth noethedh dha vamm? 31Rag hedre vewo mab Yesse war an norvys, ny vydh naneyl ty na'th wlaskor fastys. Ytho dannvon ha kyrgh ev dhymm, rag ev a verow.’ 32Ha Yonathan a worthybis y das, ha leverel dhodho, ‘Prag y fydh ev gorrys dhe'n mernans? Pandr'a wrug ev?’ 33Mes Sowl a dewlis y wuw orto dh'y weskel; yndella Yonathan a wodhya bos ervirans y das ladha Davydh. 34Ytho Yonathan a sevis dhiworth an voes yn sorr fers ha ny dhybris boes vyth yn nessa dydh an mis, rag ev a veu grevys rag Davydh, ha drefenn y das dhe dhre disenor warnodho.

35Ternos myttin Yonathan eth yn-mes y'n gwel y'n termyn apoyntys gans Davydh, hag yth esa ganso maw byghan. 36Yn-medh ev dhe'n maw, ‘Poen ha hwila an sethow a dennav my a'th pys.’ Pan esa an maw ow poenya, ev a dennas seth dresto. 37Pan dheuth an maw dhe'n tyller may tennsa Yonathan an seth, Yonathan a elwis dhe'n maw ha leverel, ‘A nyns usi an seth dresto?’ 38Ha Yonathan a elwis dhe'n maw, ‘Fisten, bydh uskis, na worta.’ Ytho maw Yonathan a guntellas an sethow ha dos dh'y vester. 39Mes ny wodhya an maw travyth; saw Yonathan ha Davydh a wodhya an mater. 40Ha Yonathan a ros y arvow dhe'n maw ha leverel dhodho, ‘Ke ha'ga doen dhe'n sita.’ 41Ha kettell veu an maw gyllys, Davydh a sevis yn-bann dhiworth tenewen an krug a veyn, ha koedha war y fas dhe'n leur. Ev a blegyas dhe'n dor teyrgweyth, hag i a ammas an eyl dh'y gila, hag i a oelas an eyl gans y gila; mes Davydh a oelas moy. 42Ena yn-medh Yonathan dhe Davydh, ‘Ke yn kres, a-ban wrussyn ti an eyl gans y gila yn hanow an Arloedh, ow leverel, “An Arloedh a vydh yntra my ha ty, hag ynter ow henedh vy ha dha henedh ji, bys vykken.” ’ Ev a sevis yn-bann hag omdenna; ha Yonathan eth y'n sita.