Davydh ha'n Bara Sans

1Davydh a dheuth dhe Nob dhe Ahimelek an oferyas. Hag Ahimelek a grenas pan vetyas gans Davydh, ha leverel dhodho, ‘Prag yth osta dha honan, ha nyns eus gour vyth genes?’ 2Yn-medh Davydh dhe Ahimelek an oferyas, ‘An myghtern re worhemmynnis dhymm mater, ha leverel dhymm, “Na as gour vyth dhe wodhvos travyth a-dro dhe'n mater ma'th tannvonav warnodho, na'n pyth re worhemmynnis dhis.” My re settyas kuntellva rag ow gwer yowynk yn neb le. 3Lemmyn ytho, pandr'eus dhis yn-dann dha leuv? Ro dhymm pymp torth-vara y'm leuv, po pynag eus omma.’ 4Ha'n oferyas a worthybis dhe Davydh, ‘Nyns eus bara kemmyn yn-dann ow leuv, mes yma bara sans, mar kwra an wer yowynk unnweyth omwitha dhiworth benynes.’ 5Davydh a worthybis dhe'n oferyas, ha leverel dhodho, ‘Yn hwir benynes re beu gwithys ahanan a-dro dhe dri dydh, dell yw usys pan dhov vy yn-mes yn kaskyrgh, ha lestri an wer yowynk yw sans kyn fo vyaj kemmyn; pygemmys moy y'n jydh ma a vydh aga lestri sanshes?’ 6Ytho an oferyas a ros dhodho bara sans; rag nyns esa bara vyth marnas bara an wolok, yw kemmerys dhe-ves dhiworth an Arloedh, dhe worra yn y le bara toemm y'n jydh mayth yw kemmerys dhe-ves.

7Lemmyn yth esa ena neb unn gour a wesyon Sowl an jydh na, gwithys a-dherag an Arloedh; Doeg o y hanow, Edomyas, an chyf a vugeledh Sowl.

8Davydh a wovynnis orth Ahimelek, ‘A nyns eus guw vyth po kledha omma genes? Rag ny dhres genev naneyl ow kledha na'm arvow, drefenn bos edhomm a fysk rag negys an myghtern.’ 9Yn-medh an oferyas, ‘Kledha Goliath an Filistyas, neb a ledhsys yn nans Ela, ottava, maylys yn kweth a-dryv an efod; mar mynnydh y gemmeres, kemmer e, rag nyns eus travyth arall y'n tyller ma saw henna.’ Yn-medh Davydh, ‘Heb parow yw; ro e dhymm.’

Davydh a Fi dhe Gath

10Davydh a sevis ha fia an jydh na a-dhiworth Sowl; ev eth dhe Akish myghtern Gath. 11Yn-medh gwesyon Akish dhodho, ‘A nyns yw hemma Davydh myghtern an wlas? A ny gansons anodho an eyl dh'y gila yn donsyow, ow leverel,

“Sowl re ladhas y vilyow,

ha Davydh y dhegow a vilyow”?’

12Davydh a gemmeras an geryow ma dh'y golonn, hag ev a borthas own meur a Akish myghtern Gath. 13Ytho ev a janjyas y fara a-dheragdha, hag ev a omwre muskok pan esa yn aga lok. Ev a gravas merkyow war dharasow an yet, ha gasa y drew dhe goedha war y varv. 14Yn-medh Akish dh'y wesyon, ‘Otta, hwi a wel an gour dhe vos muskok; ytho prag y'n dresowgh dhymm? 15Eus edhomm dhymm a vuskogyon, may tresowgh an gwas rag omdhegi avel muskok y'm lok? A wra an gwas ma dos a-ji dhe'm chi?’