Davydh a Saw Sita Keila

1Lemmyn i a dherivas dhe Davydh, ow leverel, ‘Otta, yma an Filistysi ow patalyas orth Keila, hag yth esons ow pylla an leuryow-drushya.’ 2Davydh a wovynnas orth an Arloedh, ‘A wrav vy mos ha gweskel an Filistysi ma?’ Ha'n Arloedh a leveris dhe Davydh, ‘Ke ha gwask an Filistysi, ha saw Keila.’ 3Mes gwer Davydh a leveris dhodho, ‘Otta, ni a berth own omma yn Yuda; pygemmys moy ytho mars ellen dhe Keila erbynn luyow an Filistysi?’ 4Ena Davydh a wovynnas orth an Arloedh arta. Ha'n Arloedh a worthybis dhodho ha leverel, ‘Sav, Ke yn-nans dhe Keila; rag my a re an Filistysi a-berth y'th leuv.’ 5Yndella Davydh ha'y wer eth dhe Keila, hag omladh erbynn an Filistysi, ha ledya dhe-ves aga chatel. Ev as gweskis gans ladhva veur. Ha Davydh a sawyas trigoryon Keila.

6Pan fias Abiathar mab Ahimelek dhe Davydh yn Keila, ev a dheuth yn-nans gans Efod yn y dhorn. 7Y feu derivys dhe Sowl Davydh dhe dhos dhe Keila. Yn-medh Sowl, ‘Duw re'n delivras a-berth y'm leuv; rag ev re dhegeas y honan a-bervedh, owth entra yn sita a's teves porthow ha barrys.’ 8Ha Sowl a elwis oll an wer war-barth rag bresel, dhe vones yn-nans dhe Keila, dhe omsettya a-dro dhe Davydh ha'y wer. 9Davydh a wodhya Sowl dhe vrasa drog er y bynn, hag ev a leveris dhe Abiathar an oferyas, ‘Dro omma an Efod.’ 10Ena yn-medh Davydh, ‘A Arloedh, Duw Ysrael, dha was re glewas Sowl dhe hwilas dos dhe Keila, dhe dhistrui an sita a'm govis. 11A wra Sowl dos yn-nans, dell glewas dha was? A Arloedh, Duw Ysrael, my a'th pys lavar dhe'th was.’ An Arloedh a leveris, ‘Ev a wra dos yn-nans.’ 12Ena yn-medh Davydh, ‘A wra trigoryon Keila ow delivra my ha'm gwer yn-bann a-berth yn leuv Sowl?’ Hag yn-medh an Arloedh, ‘I a'th telirv yn-bann.’ 13Ena Davydh ha'y wer, neb o a-dro dhe hwegh kans, a sevis ha diberth dhiworth Keila; i eth plepynag y hallens dos. Pan veu derivys dhe Sowl Davydh dhe dhiank dhiworth Keila, ev a astelas mos yn-rag. 14Yth esa Davydh trigys y'n gwylvos yn skonsow, yn bro venydhyek gwylvos Zif. Ha Sowl a'n hwilas pub dydh, mes ny wrug an Arloedh y dhelivra a-berth yn y leuv.

Sowl a Helgh Davydh y'n Gwylvos

15Yth esa Davydh yn gwylvos Zif yn Horesh pan glewas ev Sowl dhe dhos yn-rag dhe hwilas y vewnans. 16Yonathan mab Sowl a sevis, ha mos dhe Davydh yn Horesh, hag ev a grevhas y leuv yn Duw. 17Yn-medh ev dhodho, ‘Na borth own; rag ny wra leuv ow thas Sowl dha gavoes; ha ty a vydh myghtern war Ysrael, ha my a vydh nessa dhis; ow thas Sowl ynwedh a woer y fydh yndella.’ 18Ena aga dew a wrug ambos a-dherag an Arloedh; hag yth esa Davydh trigys yn Horesh, ha Yonathan eth dh'y dre.

19Ena an Zifysi a dheuth yn-bann dhe Sowl yn Gibea ow leverel, ‘A nyns usi Davydh owth omgudha genes yn skonsow Horesh, war venydh Hakila, usi a'n dhyghowbarth dhe Yeshimon? 20Lemmyn, A vyghtern, peskweyth may fynni dos yn-nans, gwra yndella; hag y fydh ragon ni dh'y dhelivra a-berth yn leuv an myghtern.’ 21Hag yn-medh Sowl, ‘Bennigys re bowgh gans an Arloedh; rag hwi re dhiskwedhas truedh troha my. 22Kewgh, my a'gas pys, ombareusewgh hwath moy; godhvydhewgh ha gwelewgh an tyller mayth yma ev ow taromres, ha piw re'n gwelas ena; rag derivys yw dhymm ev dhe vos pur fel. 23Gwelewgh ha godhvydhewgh oll an kudhvaow mayth usi owth omgudha, ha dehwelewgh arta dhymm gans derivadow sur. Ena yth av genowgh; ha mars usi ev y'n vro, my a'n hwila yn-mes yn oll an kordhow a Yuda.’ 24Ytho i a sevis, ha mos dhe Zif kyns Sowl. Mes yth esa Davydh ha'y wer yn gwylvos Maon, y'n Araba a'n dhyghowbarth dhe Yeshimon.

25Sowl ha'y wer eth dh'y hwilas. Pan veu derivys dhe Davydh, ev eth yn-nans dhe'n garrek ha triga yn gwylvos Maon. Ha pan glewas Sowl anodho, ev a helghyas Davydh a-ji dhe wylvos Maon 26Sowl eth an tu ma a'n menydh, ha Davydh ha'y wer a'n tu arall a'n menydh. Yth esa Davydh ow fistena dhe vos dhe-ves dhiworth Sowl, ha Sowl ha'y wer a omsettyas a-dro dhe Davydh ha'y wer dh'aga hemmeres. 27Ena kannas a dheuth dhe Sowl, ow leverel, ‘Fisten ha deus; rag an Filistysi re wrug omsettyans erbynn an tir.’ 28Ytho Sowl a dreylyas dhe-ves dhiworth helghya Davydh, ha mos erbynn an Filistysi; rakhenna an bobel a elwis an tyller Sela-hammahlekoth.23:28 Sela-hammahlekoth: Yw dhe styrya Karrek an Rannow. 29Ena Davydh eth yn-bann alena, hag yth esa trigys yn skonsow En-gedi.23:29 Y'n Ebrow, an Septuagint ha'n Vulgat 23:29 yw niverys 24:1.