Davydh a Spar Bewnans Sowl

1Pan dhehwelis Sowl dhiworth helghya an Filistysi, y feu derivys dhodho, ‘Awotta, yma Davydh yn gwylvos En-gedi.’24:1 Y'n Septuagint, an Syriek ha'n Vulgat, 24:1 bys 22 yw niverys 24:2 bys 23. 2Ena Sowl a gemmeras tri mil wour dewisys mes a oll Ysrael, ha mos dhe hwilas Davydh ha'y wer war garregi an gever gwyls. 3Ev a dheuth dhe gorlannow an deves ryb an fordh, mayth esa kav; ha Sowl eth a-bervedh dhe gudha y dhewdroes. Lemmyn yth esa Davydh ha'y wer owth esedha a-ji dhe dhowna rannow an kav. 4Gwer Davydh a leveris dhodho, ‘Otta an jydh may leveris an Arloedh dhis anodho, “My a dhelirv dha eskar a-berth y'th leuv, ha ty a wra dhodho kepar dell hevel da dhis.” ’ Ena Davydh eth ha treghi dhe-ves lostenn mantell Sowl yn-dann gel. 5Wosa henna Davydh a veu gweskys dhe'n golonn, drefenn ev dhe dreghi dhe-ves lostenn mantell Sowl. 6Yn-medh ev dh'y wer, ‘An Arloedh difenn my dhe wul hemma dhe'm arloedh, untys an Arloedh, owth ystynn ow leuv er y bynn; rag ev yw untys an Arloedh.’ 7Ytho Davydh a geredhis y wer gans an geryow ma, ha ny's gasas dhe sevel erbynn Sowl. Ena Sowl a sevis ha gasa an kav, ha mos war y fordh.

8Ena Davydh a sevis ha mos yn-mes a'n kav ha gelwel war-lergh Sowl, ow leverel, ‘Ow arloedh an myghtern.’ Ha pan dreylyas Sowl war-dhelergh, Davydh a blegyas gans y fas troha'n leur, ha plegya dhe'n dor. 9Yn-medh Davydh dhe Sowl, ‘Prag y hwoslowydh orth geryow an re a lever, “Otta Davydh a hwila gul drog dhis?” 10Y'n jydh hedhyw dha dhewlagas re welas fatell y'th ros an Arloedh a-berth y'm leuv a-ji dhe'n kav; ha leverys veu dhymm dhe'th ladha; mes my a'th sparyas. Yn-medhav “Ny vynnav ystynn ow leuv erbynn ow arloedh; rag ev yw untys an Arloedh.” 11Mir, ow thas, mir orth lostenn dha vantell y'm leuv; rag drefenn my dhe dreghi dhe-ves lostenn dha vantell, ha ny'th ledhis, ty a woer ha gweles yn sur nag eus na drog na trayturi y'm leuv. Ny beghis er dha bynn, kynth esos orth ow helghya dhe gemmeres ow bewnans. 12Re vreusso an Arloedh yntra my ha ty. Re dallo an Arloedh dial ragov warnas; mes ny vydh ow leuv er dha bynn. 13Kepar dell lever henlavar an dus koth, “Dhiworth tebelwesyon a dheuth yn-rag sherewynsi”; mes ny vydh ow leuv er dha bynn. 14War-lergh piw re dheuva myghtern Ysrael yn-mes? War-lergh piw esos ow helghya? War-lergh ki marow? War-lergh hwannenn? 15Rakhenna re bo an Arloedh breusyas, ha breusi yntra my ha ty, ha gweles, ha pledya ow hen, ha'm delivra mes a'th leuv.’

16Wosa Davydh dhe worfenna kewsel an geryow ma orth Sowl, Sowl a leveris, ‘Yw hemma dha lev, ow mab Davydh?’ Ha Sowl a dhrehevis y lev hag oela. 17Yn-medh ev dhe Davydh, ‘Ty yw moy gwiryon agesov; rag ty re'm dyghtyas yn ta, mes my re'th tyghtyas yn trog. 18Y'n jydh hedhyw ty re dhiskwedhas fatell dhyghtsys genev yn ta; rag ny'm ledhsys pan y'm delivras an Arloedh a-berth y'th leuv. 19Rag piw re gavas eskar, ha dannvon an eskar dhe-ves yn saw? Ytho re'th tallo an Arloedh gans dader rag an pyth re wrussys dhymm y'n jydh hedhyw. 20Lemmyn my a woer yn ta ty dhe vos yn sur myghtern war Ysrael, hag y fydh gwlaskor Ysrael fastys y'th leuv. 21To lemmyn dhymm re'n Arloedh, na dreghydh dhe-ves ow has war ow lergh, na distrui ow hanow mes a ji ow thas.’ 22Ytho Davydh a dos dhe Sowl. Ena Sowl eth dh'y dre; mes Davydh ha'y wer eth yn-bann dhe'n skons.