Mernans Samuel

1Samuel a verwis; hag oll Ysrael a omguntellas ha kyni ragdho, ha'y ynkleudhyas yn y ji yn Rama. Ena Davydh a sevis ha mos yn-nans dhe wylvos Paran.

Davydh ha Gwreg Nabal

2Yth esa gour yn Maon, a'n jevo y negys yn Karmel. An gour o pur wolusek; ev a'n jevo tri mil dhavas, ha mil ever. Yth esa ev ow knyvyas y dheves yn Karmel. 3Hanow an gour o Nabal, ha hanow y wreg Abigayl. An venyn o da hy honvedhes ha teg hy semlans, mes an gour o den kales ha drogoberer; ev o Kalebyas. 4Davydh a glewas y'n gwylvos bos Nabal ow knyvyas y dheves. 5Ytho Davydh a dhannvonas yn-mes deg gour yowynk; ha Davydh a leveris dhe'n wer yowynk, ‘Kewgh yn-bann dhe Karmel, ha kewgh dhe Nabal ha gwrewgh y salusi y'm hanow. 6Salusewgh ev yndella: “Kres dhis, ha kres dhe'th chi, ha kres dhe oll a bewos. 7My a glew bos dha wer ow knyvyas dha dheves; lemmyn dha vugeledh dheves re beu genen, ha ny wrussyn drog er agas pynn, ha nyns esa travyth kemmerys anedha der oll an termyn mayth esens yn Karmel 8Govynn orth dha wesyon, hag i a lever dhis. Rakhenna gas ow gwer yowynk dhe gavoes favour y'th wolok; rag ni re dheuth yn dydh feusik. Ro my a'th pys, pypynag a dheffo dhe'th leuv dhe'th wesyon ha dhe'th vab Davydh.” ’

9Pan dheuth gwer yowynk Davydh, i a gewsis orth Nabal war-lergh oll an geryow na yn hanow Davydh; hag ena i a wortas. 10Mes Nabal a worthybis dhe wesyon Davydh ha leverel, ‘Piw yw Davydh? Piw yw mab Yesse? Yma lies gwas y'n dydhyow ma a boen dhe-ves dhiworth aga mestrysi. 11A gemmerav ow bara ha'm dowr ha'n kig re beu ledhys genev rag ow knyvyoryon, ha'y ri dhe wer na wonn vy a-ble teuthons?’ 12Ytho gwer yowynk Davydh a dreylyas dhe-ves, ha mos arta, ha dehweles hag i a dherivas dhodho war-lergh oll an geryow ma. 13Yn-medh Davydh dh'y wer, ‘Kelmewgh agas kledhedhyow warnowgh, hwi oll.’ Ytho pub gour a golmas y gledha warnodho; Davydh ynwedh a golmas y gledha warnodho; hag a-dro dhe beswar kans gour eth yn-bann war-lergh Davydh, ha dew kans a wortas gans an fardellow.

14Mes onan a'n wer yowynk a dherivas dhe Abigayl, gwreg Nabal, ‘Otta, Davydh a dhannvonas kannasow mes a'n gwylvos dhe salusi agan mester; hag ev a's despityas. 15Mes an wer o pur dha troha ni, ha ny wrussons drog er agan pynn, ha nyns esa travyth kemmerys ahanan pan esen y'n prasow, oll an dydhyow mayth esen gansa; 16i o fos dhyn nos ha dydh, oll an termyn mayth esen gansa ow kwitha an deves. 17Lemmyn rakhenna godhvydh ha preder pandr'a wredh; rag drog re beu ervirys erbynn agan mester hag erbynn oll y ji; rag ev yw mab Belial ha ny yll denvyth kewsel orto.’

18Ena Abigayl a fistenas ha kemmeres dew kans torth-vara, ha diw seth a win, pymp davas pareusys, ha pymp sea25:18 sea: Ebrow sea, musur sygh a-dro dhe 7.3 liter. a ys rostys, ha kans tesenn a rappys, ha dew kans tesenn a figys. Hi a's gorras war asenes 19ha leverel dh'y gwesyon, ‘Kewgh yn-rag a-dheragov; my a vydh ow tos war agas lergh.’ Mes ny dherivas hi orth hy gour. 20Pan varghogas hi war an asen ha dos yn-nans yn-dann gudhans an menydh, otta, Davydh ha'y wer a dheuth yn-nans troha hi; ha hi a's dyerbynnas. 21Lemmyn Davydh re lavarsa, ‘Yn sur yth o yn euver my dhe witha oll a'n jeves an gwas ma y'n gwylvos, ma nag esa travyth kemmerys dhiworth oll a bewva; mes ev re dhehwelis dhymm drog yn le da. 22Re wrello Duw yndella ha moy ynwedh dhe eskerens Davydh mar kasav a oll a bew ev bys yn golow myttin kemmys hag unn gour neb a bis erbynn fos.’

23Pan welas Abigayl Davydh, hi a fistenas ha diyskynna dhiworth an asen, ha koedha a-rag Davydh war hy fas hag omblegya dhe'n dor. 24Hi a goedhas orth y dreys, ha leverel, ‘Warnav vy ow honan, ow arloedh, bedhes an blam, my a'th pys, gas dha vaghteth dhe gewsel y'th tiwskovarn, ha klew geryow dha vaghteth. 25Na wres ow arloedh, my a'th pys, gul vri a'n gour Belial ma, Nabal; rag kepar dell yw y hanow, yndella yw ev; Nabal yw y hanow, hag yma follneth ganso; mes my, dha vaghteth, ny welis vy gwer yowynk ow arloedh, neb a dhannvensys.

26‘Ha lemmyn, ow arloedh, dell vew an Arloedh, ha dell vewydh dha honan, drefenn an Arloedh dhe'th lettya rag kabel-goes ha diella dre dha leuv dha honan, lemmyn ytho gas dha eskerens, ha'n re neb a hwila gul drog dhe'm arloedh, bos kepar ha Nabal. 27Ha lemmyn bedhes an ro ma re dhros dha vaghteth dhe'm arloedh, res dhe'n wer yowynk neb a hol ow arloedh. 28My a'th pys, gav treuspass dha vaghteth; rag an Arloedh a wra yn sur rag ow arloedh chi sur, drefenn ow arloedh dhe vatalyas batelyow an Arloedh; ha ny vydh drog kevys ynnos oll dha dhydhyow. 29Mar sev yn-bann nebonan dhe'th helghya ha hwilas dha vewnans, bewnans ow arloedh a vydh maylys yn fardell an re vew gans an Arloedh dha Dhuw; mes bewnansow dha eskerens ev a dewl yn-mes, kepar ha dhiworth kew towlbrenn. 30Wosa an Arloedh dhe wul dhe'm arloedh war-lergh pup-tra da a gewsis ev a-dro dhis, ha'th settya avel rewler war Ysrael, 31ny vydh hemma galar vyth dhis, na offens a golonn dhe'm arloedh, rag skoellya goes heb acheson, po ow arloedh dhe sawya y honan. Ha pan dhyght an Arloedh ow arloedh yn ta, ena porth kov a'th vaghteth.’

32Yn-medh Davydh dhe Abigayl, ‘Benniges re bo an Arloedh, Duw Ysrael, neb a'th tannvonas dhe'm metya y'n jydh hedhyw. 33Benniges re bo dha furneth, ha benniges re bi, neb re'm gwithas y'n jydh hedhyw dhiworth kabel-goes ha dhiworth diella ow honan der ow leuv ow honan. 34Rag yn hwir dell vew an Arloedh, neb re'm lettyas rag gul drog dhis, mar ny fistenses ha dos dhe'm metya, yn sur ny via gesys dhe Nabal bys yn golow myttin kemmys hag unn gour neb a bis erbynn fos.’ 35Ena Davydh a dhegemmeras dhiworth hy leuv an pyth re rosa dhodho; hag ev a leveris dhedhi, ‘Ke yn-bann dhe'th chi yn kres; gwel, my re woslowas orth dha lev, ha my re wrontyas dha wovynnadow.’

36Abigayl a dheuth dhe Nabal; hag, otta, yth esa ev ow synsi kevewi yn y ji, kepar ha kevewi myghtern. Ha kolonn Nabal o lowenek a-ji dhodho, rag ev o pur vedhow; rakhenna ny dherivas hi travyth orto, byghan na bras, bys yn golow myttin. 37Mes ternos myttin, pan o an gwin gyllys mes a Nabal, y wreg a dherivas an traow ma orto, ha'y golonn a verwis a-ji dhodho; ev a dheuth ha bos avel men. 38A-dro dhe dheg dydh a-wosa, an Arloedh a weskis Nabal, hag ev a verwis.

39Ha pan glewas Davydh bos Nabal marow, yn-medh ev, ‘Benniges re bo an Arloedh neb re ventenas ow hen rag an despit dhiworth leuv Nabal, hag ev re withas y was dhiworth drog; rag an Arloedh re dreylyas drogober Nabal war y benn y honan.’ Ena Davydh a dhannvonas ha kewsel gans Abigayl, dh'y hemmeres dhodho, dh'y hemmeres avel y wreg. 40Pan dheuth gwesyon Davydh dhe Abigayl yn Karmel, i a gewsis dhedhi ha leverel, ‘Davydh re'gan dannvonas dhis, dhe'th kemmeres dhodho avel y wreg.’ 41Ha hi a sevis ha plegya dhe'n dor, gans hy fas orth an dor, ha leverel, ‘Otta, dha vaghteth yw kethes dhe wolghi treys gwesyon ow arloedh.’ 42Abigayl a sevis yn unn fistena ha marghogeth dhe-ves war an asen; gans hy fymp maghteth rybdhi. Hi eth war-lergh kannasow Davydh ha dos ha bos y wreg.

43Davydh ynwedh a gemmeras Ahinoam a Yezreel; ha'ga diw a dheuth ha bos y wragedh. 44Mes Sowl re rosa Mikal y vyrgh, gwreg Davydh, dhe Palti mab Laish, a Gallim.