Davydh a Spar Bewnans Sowl Unnweyth Arta

1Ena an Zifysi a dheuth dhe Sowl yn Gibea ha leverel, ‘A ny omgudh Davydh war venydh Hakila, usi a-dal Yeshimon?’ 2Ena Sowl a sevis ha mos yn-nans dhe wylvos Zif dhe hwilas Davydh, hag yth esa tri mil wour dhewisys a Ysrael ganso yn gwylvos Zif. 3Sowl a gampyas war venydh Hakila, usi a-dal Yeshimon ryb an fordh. Mes yth esa Davydh trigys y'n gwylvos. Pan welas ev Sowl dhe dhos war y lergh y'n gwylvos, 4Davydh a dhannvonas yn-mes aspioryon, hag ev a wodhya bos Sowl yn tevri devedhys. 5Ena Davydh a sevis ha dos dhe'n tyller may kampsa Sowl; ha Davydh a welas an tyller mayth esa Sowl ow krowedha, gans Abner mab Ner, pennhembrenkyas y lu. Yth esa Sowl ow krowedha a-ji dhe'n kamp, hag yth esa an bobel ow kampya a-dro dhodho.

6Ena Davydh a leveris dhe Ahimelek an Hittyas, ha dhe Abishay mab Seruya, broder Yoab, ‘Piw a vynn mones yn-nans genev a-ji dhe'n kamp dhe Sowl?’ Hag Abishay a worthybis, ‘My a vynn mones genes.’ 7Ytho Davydh hag Abishay eth dhe'n lu y'n nos; hag otta, yth esa Sowl ow krowedha yn kosk a-ji dhe'n kamp, gans y wuw gweskys y'n dor orth y benn; hag yth esa Abner ha'n lu ow krowedha a-dro dhodho. 8Ena Abishay a leveris dhe Davydh, ‘Duw re dhelivras dha eskar a-berth y'th leuv y'n jydh hedhyw; lemmyn rakhenna gas vy dh'y weskel dhe'n dor, my a'th pys, gans unn pych a'n guw; ny'n gwaskav diwweyth.’ 9Mes yn-medh Davydh dhe Abishay, ‘Na wra y dhistrui, rag piw a yll ystynn y leuv erbynn untys an Arloedh, ha bos heb kessydhyans?’ 10Hag yn-medh Davydh ynwedh, ‘Dell vew an Arloedh, an Arloedh a'n gwysk dhe'n dor; po y jydh a dheu dhe verwel; po ev a wra mos yn-nans yn batel ha merwel. 11An Arloedh difenn, my dhe ystynn ow leuv yn-rag erbynn untys an Arloedh; mes, my a'th pys, kemmer lemmyn an guw usi orth y benn, ha'n seth-dowr, ha deun.’ 12Ytho Davydh a gemmeras an guw ha'n seth-dowr, hag i a omdennas. Ny'n gwelas denvyth, na'y wodhvos, na ny dhifunas denvyth; rag yth esens oll yn kosk, drefenn kosk down dhe goedha dhiworth an Arloedh warnedha.

13Ena Davydh eth a-dreus dhe'n tu arall, ha sevel war benn bre yn pellder, gans spas meur yntredha. 14Davydh a elwis dhe'n bobel, ha dhe Abner mab Ner, ha leverel. ‘Abner, a ny worthybydh?’ Ena Abner a worthybis, ‘Piw osta neb a elow dhe'n myghtern?’ 15Ha Davydh a leveris dhe Abner, ‘A nyns osta gour? Piw yw kepar ha ty yn Ysrael? Prag na withsys war dha arloedh an myghtern. Rag onan a'n bobel a dheuth a-ji dhe dhistrui dha arloedh an myghtern. 16An dra ma re wrussys, nyns yw da. Dell vew an Arloedh, hwi a dhervynn an mernans, drefenn na withsowgh war agas arloedh, untys an Arloedh. Mir lemmyn, ple'ma guw an myghtern; po an seth-dowr esa orth y benn?’

17Ha Sowl a aswonnis lev Davydh, ha leverel, ‘Yw hemma dha lev, ow mab Davydh?’ Hag yn-medh Davydh, ‘Yth yw ow lev, ow arloedh, A vyghtern.’ 18Hag yn-medh ev ynwedh, ‘Prag yth helgh ow arloedh war-lergh y was? Pandr'a wrug vy? Py pegh usi y'm leuv? 19Lemmyn ytho, my a'th pys, klewes ow arloedh an myghtern geryow y was. Mars yw an Arloedh neb re ynnias warnas er ow fynn, re vlasso offrynn; mes mars yw mebyon den, bedhens milliges dherag an Arloedh, rag i re'm chasyas yn-mes y'n jydh hedhyw ma na gaffen ow rann yn eretons an Arloedh, ow leverel, “Ke, serv duwow erell.” 20Lemmyn rakhenna, na wres ow goes koedha dhe'n dor dhe-ves a lok an Arloedh; rag myghtern Ysrael re dheuth yn-mes dhe hwilas hwannenn, kepar dell helghir grugyar y'n menydhyow.’

21Ena Sowl a leveris, ‘My re beghas; dehwel, ow mab Davydh, rag ny wrav drog dhis arta, drefenn bos ow bewnans drudh y'th wolok y'n jydh hedhyw. Otta, my re beu foll, ha my re erryas dres eghenn.’ 22Ha Davydh a worthybis ha leverel, ‘Otta an guw, A vyghtern! Gas onan a'n wer yowynk dhe dreusi omma ha'y gemmeres. 23An Arloedh a attal dhe bub gour rag y ewnder ha'y lelder; rag an Arloedh a'th telivras a-berth y'm leuv hedhyw, mes ny vynnis ystynn ow leuv erbynn untys an Arloedh. 24Hag, otta, kepar dell veu dha vewnans drudh y'm golok y'n jydh hedhyw, yndella re bo ow bewnans drudh yn golok an Arloedh, ha re'm deliffro yn-mes a oll anken.’ 25Ena Sowl a leveris dhe Davydh, ‘Benniges re bi, ow mab Davydh! Ty a wra traow meur, hag ynwedh ty a sewen ynna.’ Ytho Davydh eth war y fordh, ha Sowl a dhehwelis dh'y dyller.