Davydh a Serv Akish Myghtern Gath

1Davydh a brederis yn y golonn, ‘Lemmyn, my a verow unn jydh dre leuv Sowl; nyns eus travyth gwell ragov marnas diank hware dhe bow an Filistysi; ena Sowl a hedh dhe'm hwilas pella a-ji dhe oryon Ysrael, ha my a dhienk mes a'y leuv.’ 2Ytho Davydh a sevis ha treusi gans hwegh kans gour esa ganso, dhe vyghtern Akish mab Maok a Gath. 3Yth esa Davydh trigys gans Akish yn Gath, ev ha'y wer, pub gour gans y deylu, ha Davydh gans y dhiw wreg, Ahinoam a Yezreel, hag Abigayl an Karmelyades, gwreg Nabal. 4Ha pan veu derivys orth Sowl Davydh dhe fia dhe Gath, ny'n hwilas na fella.

5Ena Davydh a leveris dhe Akish, ‘Mar kevis favour y'th wolok, bedhes tyller res dhymm yn neb sita y'n pow, may hallav triga ena; rag prag y tegoedh dhe'th was triga y'n sita ryel genes?’ 6Ena Akish a ros dhodho Siklag y'n jydh na; rakhenna myghternedh Yuda re bewva Siklag bys y'n jydh hedhyw. 7Niver an dydhyow mayth esa Davydh trigys yn pow an Filistysi o blydhen ha peswar mis.

8Lemmyn Davydh ha'y wer eth yn-bann, hag i a wrug omsettyansow erbynn an Geshurysi, ha'n Girzysi, ha'n Amalekysi; rag yth o an re ma an trevesigethow dhiworth Telam war an fordh dhe Shur ha bys yn pow Ejyp. 9Davydh a weskis an tir, ha ny asas yn few naneyl gour na benyn, hag ev a gemmeras dhe-ves an deves, an oghen, an asenes, an kowrvergh, ha'n dillas, ha dehweles dhe Akish. 10Pan wovynni Akish, ‘Piw re wrussys omsettyans er y bynn hedhyw?’ Davydh a leveri, ‘Erbynn Negeb Yuda’, po ‘Erbynn Negeb an Yeraghmeelysi’, po, ‘Erbynn Negeb an Kenysi.’ 11Ha ny asa Davydh yn few naneyl gour na benyn, dhe dri ger dhe Gath, ow leverel, ‘Ma na dheriffons a-dro dhyn, ha leverel, “Davydh re wrug yndella.” ’ Hemm o y vaner dres oll an termyn mayth esa ev trigys yn pow an Filistysi. 12Hag Akish a grysi yn Davydh, ha tybi, ‘Ev re wrug y honan kasadow glan yn mysk y bobel Ysrael; rakhenna ev a vydh ow gwas bys vykken.’