1Y'n dydhyow na, an Filistysi a guntellas aga luyow war-barth rag bresel, dhe vatalyas orth Ysrael. Akish a leveris dhe Davydh, ‘Ty a woer heb mar, ty dhe vones yn-mes genev y'n lu, ty ha'th wer.’ 2Ha Davydh a worthybis dhe Akish, ‘Yn sur, ena ty a woer pandr'a yll dha was y wul.’ Yn-medh Akish dhe Davydh, ‘Pur dha, my a'th wra gwithyas ow fenn bys vykken.’

Sowl a Hwila Kusul Dhiworth Koelyoges

3Lemmyn Samuel o marow, hag oll Ysrael a gynis ragdho, ha'y ynkleudhyas yn Rama, y sita y honan. Sowl re bellhasa an nygromonsoryon ha'n goelyogyon mes a'n pow. 4An Filistysi a omguntellas war-barth, ha dos ha kampya yn Shunem. Sowl a guntellas oll Ysrael hag i a gampyas yn Gilboa. 5Pan welas Sowl lu an Filistysi, ev a borthas own, ha'y golonn a grenas yn feur. 6Ha pan wovynnas Sowl orth an Arloedh, ny worthybis an Arloedh dhodho, na der hunrosow, na der Urim, na dre brofoesi. 7Ena yn-medh Sowl dh'y wesyon, ‘Hwilewgh ragov nygromonsores, may hallav mos dhedhi, ha govynn orti.’ Y wesyon a leveris dhodho, ‘Otta, yma nygromonsores yn Endor.’

8Ytho Sowl a dhivelebis y semlans hag omwiska yn dillas arall ha mos di, ev ha dew wour ganso. I a dheuth dhe'n venyn y'n nos. Hag yn-medh ev, ‘Gwra dewinieth ragov dre nygromons, ha dri yn-bann ragov ev neb a hanwav dhis.’ 9Hag yn-medh an venyn dhodho, ‘Otta, ty a woer an pyth re wrug Sowl. Ev re droghas dhe-ves an nygromonsoryon ha'n goelyogyon mes a'n pow. Rakhenna prag yth esos ow settya antell rag ow bewnans dhe wul ow mernans?’ 10Mes Sowl a dos dhedhi re an Arloedh, ha leverel, ‘Dell vew an Arloedh, ny dheu kessydhyans vyth warnas rag an dra ma.’ 11Ena yn-medh an venyn, ‘Piw a dhrov yn-bann ragos?’ Hag ev a worthybis, ‘Dro yn-bann Samuel ragov.’ 12Pan welas an venyn Samuel, hi a armas gans lev ughel; ha'n venyn a leveris dhe Sowl, ‘Prag y'm toellsys? Rag ty yw Sowl!’ 13Yn-medh an myghtern dhedhi, ‘Na borth own; pandr'a welsys?’ Yn-medh an venyn dhe Sowl, ‘My re welas duw ow tos yn-bann mes a'n dor.’ 14Yn-medh ev dhedhi, ‘Pyth yw y semlans?’ Hi a worthybis, ‘Yma gour koth ow tos yn-bann; ev yw maylys yn mantell.’ Yndella Sowl a wodhya y vos Samuel, hag ev a goedhas dhe'n dor gans y fas dhe'n leur, hag omblegya.

15Ena yn-medh Samuel dhe Sowl, ‘Prag y'm ankresys dhe'm dri yn-bann?’ Sowl a worthybis, ‘Yth esov yn ankres meur, rag yma an Filistysi ow patalyas orthiv, ha Duw re dreylyas dhe-ves ahanav ha ny worthyp dhymm namoy, na dre brofoesi na dre hunrosow; rakhenna my re'th helwis, may hyllydh leverel dhymm pandr'a wrav.’ 16Ena yn-medh Samuel, ‘Prag y hwovynnsys orthiv, a-ban wrug an Arloedh treylya ahanas, hag ev re dheuth ha bos dha eskar? 17Ha'n Arloedh re wrug kepar dell gewsis der ow leuv; rag an Arloedh re skwardyas an wlaskor mes a'th leuv, ha'y ri dhe'th kentrevek, Davydh. 18Drefenn na woslewsys orth lev an Arloedh, na kollenwel y sorr fell war Amalek, rakhenna an Arloedh re wrug hemma dhis hedhyw. 19Ynwedh an Arloedh a re Ysrael war-barth genes a-berth yn leuv an Filistysi; hag a-vorow ty ha'th vebyon a vydh genev; an Arloedh a re lu Ysrael ynwedh a-berth yn leuv an Filistysi.’

20Ena hware Sowl a goedhas sket war an dor a-hys, hag ev a borthas own meur, drefenn geryow Samuel; ha nyns esa nerth vyth ynno; rag ny dhyb'sa boes vyth oll an jydh, nag oll an nos. 21An venyn a dheuth dhe Sowl, ha gweles y vos dyegrys, hag yn-medh hi dhodho, ‘Otta, dha vaghteth re woslowas orth dha lev; my re worras ow bewnans a-berth y'm leuv, ha goslowes orth dha eryow re gewssys dhymm. 22Lemmyn rakhenna, my a'th pys, goslow ynwedh orth lev dha vaghteth; ha gas vy dhe settya tamm a vara a-dheragos. Deber, may kevydh nerth, pan edh war dha fordh.’ 23Mes ev a skonyas, ha leverel, ‘Ny vynnav dybri.’ Mes y wesyon, war-barth gans an venyn, a ynnias warnodho; hag ev a woslowas orth aga lev. Ytho ev a sevis a-dhiwar an dor hag esedha war an gweli. 24Lemmyn an venyn a's tevo leugh peskys a-ji dhe'n chi. Hi a fistenas ha'y ladha, ha kemmeres bleus, ha'y doesa, ha pobas bara heb goell. 25Hi a's settyas dherag Sowl ha'y wesyon, hag i a dhybris. Ena i a sevis ha mos dhe-ves an nos na.