An Arloedh a Elow Samuel

1Lemmyn yth esa an maw Samuel ow servya an Arloedh yn-dann Eli. Ger an Arloedh o tanow y'n dydhyow na; ha nyns esa lies gwelesigeth.

2Y'n termyn na, yth esa Eli, may tallathsa y dhewlagas fyllel ma na ylli gweles, ow krowedha yn y le; 3ny via lugarn Duw difeudhys na hwath, hag yth esa Samuel ow krowedha yn tempel an Arloedh, le mayth esa argh Duw. 4Ena an Arloedh a elwis dhe Samuel, hag ev a worthybis, ‘Ottavy!’ 5hag ev a boenyas dhe Eli, ha leverel, ‘Ottavy, rag ty a'm gelwis.’ Mes ev a leveris, ‘Ny elwis; growedh arta.’ Ytho ev eth ha growedha. 6Ha'n Arloedh a elwis arta, ‘Samuel!’ Ha Samuel a sevis ha mos dhe Eli ha leverel, ‘Ottavy, rag ty a'm elwis.’ Hag ev a worthybis, ‘Ny elwis, ow mab; growedh arta.’ 7Lemmyn ny aswonnis Samuel an Arloedh na hwath, ha ny via ger an Arloedh diskudhys dhodho na hwath. 8Ha'n Arloedh a elwis Samuel arta, tressa termyn. Hag ev a sevis ha mos dhe Eli, ha leverel, ‘Ottavy, rag ty a'm gelwis.’ Ena Eli a wodhva bos an Arloedh ow kelwel dhe'n maw 9Rakhenna Eli a leveris dhe Samuel, ‘Ke, growedh; mara'th helow, ty a lever, “Kows, Arloedh rag yma dha was ow koslowes.” ’ Ytho Samuel eth ha growedha yn y le.

10Ha'n Arloedh a dheuth ha sevel ena ha gelwel kepar ha kyns, ‘Samuel! Samuel!’ Ha Samuel a leveris, ‘Kows, rag yma dha was ow koslowes.’ 11Ha'n Arloedh a leveris dhe Samuel, ‘Otta, my a wra tra a verr spys yn Ysrael a wra dhe dhiwskovarn peub a'n klew kosa. 12Y'n jydh na my a gollenow erbynn Eli pup-tra re leveris vy a-dro dh'y ji, a-dhiworth an dalleth dhe'n gorfenn. 13Rag my re leveris dhodho, a verr spys my dhe vreusi y ji bys vykken, rag an kammweyth a wodhya, drefenn bos y vebyon ow molleth Duw,3:13 ow molleth Duw: Amendys war-lergh an Septuagint. Ebrow ow tri molleth dhedha aga honan. ha ny's lettyas. 14Rakhenna my a dos ti dhe ji Eli, na vydh kammweyth chi Eli dasprenys gans sakrifis na offrynn bys vykken.’

15Ha Samuel a wrowedhas ena bys y'n myttin; ena ev a igoras darasow chi an Arloedh. Ha Samuel a borthas own a leverel an welesigeth dhe Eli. 16Hag Eli a elwis Samuel ha leverel, ‘Samuel, ow mab.’ Hag ev a worthybis, ‘Ottavy.’ 17Yn-medh ev, ‘Pandr'yw an pyth a leveris an Arloedh dhis? My a'th pys na gudh ev a-dhiworthiv. Re wrello Duw yndella dhis ha moy ynwedh, mar kudhydh neppyth a-dhiworthiv a oll an taklow a leveris ev dhis.’ 18Ha Samuel a dherivas dhodho pup-tra ha ny gudhas travyth a-dhiworto. Hag ev a leveris, ‘An Arloedh yw; Gwres ev an pyth a hevel da dhodho.’

19Ha Samuel a devi yn-bann, hag yth esa an Arloedh ganso, ha ny asas nagonan a'y eryow vyth koedha dhe'n leur. 20Hag oll Ysrael dhiworth Dan bys yn Beer-sheba a wodhya bos Samuel apoyntys profoes lel a'n Arloedh. 21Ha'n Arloedh a besyas omdhiskwedhes yn Shilo, rag an Arloedh a dhiskwedhas y honan dhe Samuel yn Shilo dre er an Arloedh.