Davydh a Dhiell Distruyans Siklag

1Lemmyn pan dheuth Davydh ha'y wer dhe Siklag y'n tressa dydh, an Amalekysi a wrug omsettyans war an Negeb ha war Siklag. I a waskas Siklag, ha'y leski gans tan, 2ha kemmeres yn kethneth an benynes hag oll myns esa ynni, byghan ha bras; ny ladhsens gour vyth, mes aga doen dhe-ves, ha mos war aga fordh. 3Pan dheuth Davydh ha'y wer dhe'n sita, i a welas hy bos leskys gans tan, ha'ga benynes ha'ga mebyon ha'ga myrghes re bia kemmerys yn kethneth. 4Ena Davydh hag oll an bobel esa ganso a dhrehevis aga lev hag oela, bys ma nag esa dhedha nerth vyth dhe oela namoy. 5Ha diw wreg Davydh ynwedh re bia kemmerys yn kethneth, Ahinoam a Yezreel, hag Abigayl gwreg Nabal a Karmel. 6Ha Davydh o grevys yn feur; rag an bobel a gewsis a'y labydha, drefenn bos oll an bobel hwerow y'n enev rag aga mebyon ha myrghes. Mes Davydh a gavas nerth y'n Arloedh y Dhuw.

7Ena Davydh a leveris dhe'n oferyas Abiathar mab Ahimelek, ‘Ro dhymm an efod.’ Ytho Abiathar a ros an efod dhe Davydh. 8Ha Davydh a wovynnas orth an Arloedh, ha leverel, ‘A wrav vy helghya an bagas ma? A wrav vy aga hachya?’ Ev a worthybis dhodho, ‘Helgh, rag ty a wra yn sur aga hachya ha heb falladow sawya an brisnoryon.’ 9Ytho Davydh eth, ev ha'n hwegh kans gour esa ganso. I a dheuth dhe nans Besor, le may hwortas an re a veu gesys dhelergh. 10Mes Davydh a besyas helghya, ev ha peswar kans gour; dew kans a veu gesys, neb o re skwith dhe dreusi nans Besor.

11I a gevis gour ejyptek y'n gwel ha'y dhri dhe Davydh. I a ros bara dhodho hag ev a dhybris, hag i a ros dhodho dowr dhe eva; 12hag i a ros dhodho tamm a desenn a figys ha diw desenn a rappys. Wosa dybri, y spyrys a dheuth arta dhodho; drefenn na dhyb'sa bara vyth nag eva dowr trydydh ha teyr nos. 13Ena Davydh a leveris dhodho, ‘Dhe biw osta? A-ble os?’ Ev a worthybis, ‘Gour yowynk a Ejyp ov vy, gwas dhe wour a Amalek. Ow mester a'm gasas, drefenn my dhe vos yn klav nans yw trydydh. 14Ni a wrug omsettyans war Negeb an Kerethysi ha war an pyth a wra Yuda y bewa ha war Negeb Kaleb; ha ni a loskas Siklag gans tan.’ 15Yn-medh Davydh dhodho, ‘A vynnydh ow hemmeres yn-nans dhe'n bagas ma?’ Ev a worthybis, ‘To dhymm re Dhuw, na wre'ta ow ladha, na'm delivra a-berth yn leuv ow mester, ha my a wra dha dhri yn-nans dhe'n bagas ma.’

16Pan y'n drosa yn-nans, awotta, yth ens i lesys a-derdro war enep oll an dor, ow tybri hag owth eva, hag ow tonsya, drefenn an myns bras a breydh a gemmersens yn-mes a bow an Filistysi hag yn-mes a bow Yuda. 17Davydh a's gweskis dhiworth an bora bys gorthugher an nessa dydh. Ny dhienkas nagonan anedha, saw peswar kans gour yowynk, neb a varghogas war gowrvergh ha fia. 18Davydh a dhaskavas pup-tra re gemmersa an Amalekysi; ha Davydh a sawyas y dhiw wreg. 19Ny veu travyth kellys, naneyl byghan na bras, naneyl mebyon na myrghes, na travyth a'n preydh re bia kemmerys; Davydh a dhaskavas pup-tra. 20Ha Davydh a gemmeras oll an flokkys ha'n greow, hag i a's ledyas a-dherag an chatel erell, ow leverel, ‘Hemm yw preydh Davydh.’

21Ena Davydh a dheuth dhe'n dhew kans gour, neb o mar skwith ma na allsens holya Davydh, an re neb re bia gesys orth nans Besor. I eth yn-mes dhe vetya Davydh ha dhe vetya an bobel esa ganso. Pan dheuth Davydh nes dhe'n bobel, ev a's salusis. 22Ena oll an debeles, ha gwer Belial yn mysk an wer neb eth gans Davydh a leveris, ‘Drefenn na wrussons mones genen, ny wren ni ri dhedha travyth a'n preydh daskevys genen, saw pub gour a yll kemmeres y wreg ha'y fleghes hag omdenna.’ 23Mes Davydh a leveris, ‘Ny wrewgh yndella, ow breder, gans an pyth re ros an Arloedh dhyn; ev re'gan gwithas, hag ev re ros an bagas neb a dheuth er agan pynn a-berth yn agan leuv. 24Piw a vynn goslowes orthowgh y'n mater ma? Rag rann an gour neb a wra mos yn-nans y'n vatel a vydh kepar ha rann an gour neb a worta ryb an fardellow; i a rann kepar.’ 25Hag yth o yndella dhiworth an jydh na yn-rag, ev a'n gwrug ordenans ha breus rag Ysrael bys y'n jydh hedhyw.

26Pan dheuth Davydh dhe Siklag, ev a dhannvonas rann a'n preydh dh'y gowetha, henavogyon Yuda, ha leverel, ‘Otta ro ragowgh dhiworth preydh eskerens an Arloedh.’ 27Yth o rag an re esa yn Bethel, ha dhe'n re esa yn Ramoth an Negeb, ha dhe'n re esa yn Yattir, 28ha dhe'n re esa yn Aroer, ha dhe'n re esa yn Sifmoth, ha dhe'n re esa yn Eshtemoa, 29ha dhe'n re esa yn Rakal, ha dhe'n re esa yn sitys an Yeraghmeelysi, ha dhe'n re esa yn sitys an Kenysi, 30ha dhe'n re esa yn Horma, ha dhe'n re esa yn, ha dhe'n re esa yn Athak, 31ha dhe'n re esa yn Hebron, henn yw dhe oll an tylleryow mayth esa Davydh y honan ha'y wer ow kwandra.