Mernans Sowl ha'y Vebyon

1Lemmyn an Filistysi a vatalyas orth Ysrael; ha gwer Ysrael a fias a-dherag an Filistysi, hag i a goedhas ledhys war venydh Gilboa. 2An Filistysi a lenas harlych war-lergh Sowl ha'y vebyon; ha'n Filistysi a ladhas Yonathan hag Abinadab ha Malkishua, mebyon Sowl. 3An vatel o poes erbynn Sowl; an sethoryon a'n kavas ha'y weskel hag ev a veu goliys meur. 4Ena Sowl a leveris dhe dheger y arvow, ‘Tenn dha gledha ha'm gwana ganso ma na dheffo an wer antrodreghys ma ha'm gwana ha gul ges ahanav.’ Mes ny vynnas deger y arvow; drefenn ev dhe berthi own yn feur. Rakhenna Sowl a gemmeras y gledha y honan hag ev a goedhas warnodho. 5Pan welas deger y arvow bos Sowl marow, ev ynwedh a goedhas war y gledha, hag ev a verwis ganso. 6Ytho Sowl a verwis, ha'y dri mab, ha deger y arvow, hag oll y wer, war-barth y'n keth jydh. 7Pan welas gwer Ysrael esa a'n tenewen arall dhe'n nans ha'n re esa dres an Yordan, gwer Ysrael dhe fia, ha bos Sowl ha'y vebyon marow, i a forsakyas aga sitys, ha fia; ha'n Filistysi a dheuth ha triga ynna.

8Ternos, pan dheuth an Filistysi dhe bilya an re varow, i a gavas Sowl ha'y dri mab koedhys war venydh Gilboa. 9I a droghas dhe-ves y benn, ha pilya dhe-ves y arvow, ha dannvon kannasow a-derdro yn pow an Filistysi dhe dhri an nowodhow da dhe jiow aga idolys ha dhe'n bobel. 10I a worras y arvow yn chi Ashtaroth; hag i a fastyas y gorf orth fos Beth-shan. 11Mes pan glewas trigoryon Yabesh-gilead a-dro dhe'n dra re wrussa an Filistysi dhe Sowl, 12pub gour kolonnek a sevis, ha vyajya der an nos, ha kemmeres korf Sowl ha korfow y vebyon dhiworth fos Beth-shan. I a dheuth dhe Yabesh ha'ga leski ena. 13Hag i a gemmeras aga eskern ha'ga ynkleudhyas yn-dann an damariskenn yn Yabesh, ha penys seyth dydh.