Argh Duw Kemmerys

1Ger Samuel a dheuth dhe oll Ysrael.

Lemmyn Ysrael eth yn-mes dhe vetya an Filistysi rag an vatel; i a gampyas ryb Ebenezer, ha'n Filistysi a gampyas yn Afek. 2An Filistysi a arayas aga honan erbynn Ysrael, ha pan gressyas an vatel, Ysrael o fethys gans an Filistysi, neb a ladhas y'n linenn y'n gwel a-dro dhe beswar mil wour. 3Pan dheuth an bobel y'n kamp, henavogyon Ysrael a leveris, ‘Prag y'gan fethas an Arloedh hedhyw a-dherag an Filistysi? Dren ni argh kevambos an Arloedh omma a-dhiworth Shilo rag may hallo dos yn agan mysk ha'gan sawya mes a leuv agan eskerens.’ 4Ytho an bobel a dhannvonas dhe Shilo, rag may trens alena argh kevambos Arloedh an luyow neb a drig ynter an cherubim. Hag yth esa dew vab Eli, Hofni ha Finehas, ena gans argh kevambos an Arloedh.

5Pan dheuth argh kevambos an Arloedh a-bervedh y'n kamp, oll Ysrael a armas gans garm ughel, may tassonas an dor. 6Ha pan glewas an Filistysi son an arm, yn-medhons, ‘Pyth yw styr an arm vras ma yn kamp an Ebrowyon?’ Pan wodhva y tothya argh an Arloedh y'n kamp, 7an Filistysi a borthas own; rag i a leveris, ‘Re dheuva duw y'n kamp.’ Hag yn-medhons, ‘Go-ni! Rag ny hwarva hwarvos a'n par na kyns. 8Go-ni! Piw a yll agan delivra a-dhiworth dorn an duwow galloesek ma? An re ma yw an duwow neb a weskis an Ejyptianys gans plagys y'n gwylvos. 9Gwellhewgh agas cher, bedhewgh gwer, A Filistysi, ma na vowgh gwesyon dhe'n Ebrowyon kepar dell vons dhywgh hwi; bedhewgh gwer ha batalyewgh.’

10Ytho an Filistysi a vatalyas; hag Ysrael o fethys, hag i a fias pub gour dh'y dylda. Yth esa ladhva pur vras, rag y koedhas a Ysrael deg mil droesek warn ugens. 11Hag argh Duw o kemmerys; ha'n dhew vab a Eli, Hofni ha Finehas, a verwis.

Mernans Eli

12Gour a Benyamin a boenyas mes a'n linenn vatel, ha dos dhe Shilo an keth jydh, gans y dhillas skwardys ha gans dor war y benn. 13Ha pan dheuth, yth esa Eli owth esedha war gador ryb an fordh ow mires, rag y golonn a grenas rag argh Duw. Ha pan dheuth an gour a-bervedh y'n sita, ha ri an derivas, oll an sita a armas. 14Pan glewas Eli son an arm, ev a leveris, ‘Pyth yw styr an tervans ma.’ An gour a dheuth yn uskis ha derivas dhe Eli. 15Lemmyn Eli o etek bloedh ha peswar-ugens ha'y dhewlagas a fallsa, ma na ylli gweles. 16Yn-medh an gour dhe Eli, ‘Yth ov vy nebonan re dheuth dhiworth an vatel; my a fias hedhyw yn-mes a'n vatel.’ Yn-medh ev, ‘Pandr'a hwarva, ow mab?’ 17An gannas a worthybis ha leverel, ‘Ysrael re fias a-dherag an Filistysi, hag yth esa ynwedh ladhva veur yn mysk an bobel; dha dhew vab ynwedh, Hofni ha Finehas, yw marow, hag argh Duw re beu kemmerys.’ 18Pan gampoellas argh Duw, Eli a goedhas war-dhelergh a-dhiworth y gador ryb tenewen an yet; ha'y gonna a veu terrys hag ev a verwis, rag an gour o koth, ha poes. Ev re vreussa Ysrael dew-ugens blydhen.

19Lemmyn y wohydh, gwreg Finehas, o gans flogh, ogas dhe dhineythi. Pan glewas hi an nowodhow bos argh Duw kemmerys, ha bos hy hwegron ha'y gour marow, hi a omblegyas ha dineythi; rag hy gloesow dineythyans a dheuth warnedhi. 20A-dro dhe dermyn hy mernans, an venyn esa ow sevel rybdhi a leveris dhedhi, ‘Na borth own; rag ty re dhineythis maw.’ Mes ny worthybis hi, na gul fors anodho. 21Hi a henwis an maw Ikabod, ow leverel, ‘An glori re dhibarthas a-dhiworth Ysrael’, drefenn bos argh Duw kemmerys, ha dre reson a'y hwegron ha'y gour. 22Yn-medh hi, ‘An glori re dhibarthas a-dhiworth Ysrael, rag argh Duw re beu kemmerys.’