An Filistysi ha'n Argh

1Wosa an Filistysi dhe gemmeres argh Duw, i a's dros dhiworth Ebenezer dhe Ashdod. 2Pan gemmeras an Filistysi argh Duw, i a's dros a-bervedh yn chi Dagon ha'y settya ryb Dagon. 3Ha pan sevis tus Ashdod ternos a-varr, yth esa Dagon koedhys war y fas dhe'n dor a-dherag argh an Arloedh. Ytho i a gemmeras Dagon ha'y settya yn y le arta. 4Ha pan sevis tus Ashdod ternos a-varr, otta Dagon re goedhsa war y fas dhe'n dor a-dherag argh an Arloedh, hag yth esa penn Dagon ha palvow y dhiwla ow krowedha treghys dhe-ves war an treudhow; nyns esa marnas stokk Dagon gesys dhodho. 5Rakhenna ny wra oferysi Dagon, na denvyth a enter a-bervedh yn chi Dagon, trettya war treudhow Dagon bys y'n jydh hedhyw.

6Mes dorn an Arloedh o poes war dus Ashdod, hag ev a's ravnas ha'ga flagya gans hwedhow, yn Ashdod hag yn y diredh. 7Pan welas gwer Ashdod fatell o traow, yn-medhons, ‘Na wres argh Duw Ysrael triga genen; rag poes yw y dhorn warnan ha war agan duw Dagon.’ 8Rakhenna i a dhannvonas ha kuntell war-barth oll gwahalyethow an Filistysi dhedha, ha leverel, ‘Pandr'a wren ni gans argh Duw Ysrael?’ I a worthybis, ‘Bedhes argh Duw Ysrael degys a-dro dhe Gath.’ Ytho i a dhug argh Duw di. 9Y hwarva, wosa i dh'y dri di, bos leuv an Arloedh erbynn an sita, gans skruth pur vras; ev a blagyas gwer an sita, yowynk ha hen, may tardhas yn-mes hwedhow warnedha. 10Rakhenna i a dhannvonas argh Duw dhe Ekron. Mes pan dheuth argh Duw dhe Ekron, an Ekronysi a armas ow leverel, ‘Prag y trosons omma dhyn argh Duw Ysrael dh'agan ladha ni ha'gan tus?’ 11Ytho i a dhannvonas ha kuntell war-barth oll gwahalyethow an Filistysi, ha leverel, ‘Dannvenewgh dhe-ves argh Duw Ysrael ha gas hi dhe dhehweles dh'y le hy honan, ma na wrello agan ladha ni, na'gan pobel.’ Rag yth esa skruth marwel y'n sita oll. Ha leuv Duw o fest poes ena; 12an wer na verwis a veu plagys gans hwedhow, ha kri an sita eth yn-bann dhe nev.