1Ytho pobel Kiryath-yearim a dheuth ha kemmeres yn-bann argh an Arloedh, ha'y dri a-bervedh yn chi Abinadab war an vre. I a sakras y vab Eleazar, dhe witha argh an Arloedh.

2Lies dydh a bassyas a-dhia'n jydh may trigas an argh yn Kiryath-yearim; ugens blydhen o, hag oll chi Ysrael a yeunis war-lergh an Arloedh.

Samuel Avel Breusyas

3Ena Samuel a gewsis dhe oll chi Ysrael ow leverel, ‘Mars esowgh hwi ow tehweles dhe'n Arloedh gans oll agas kolonn, ena gorrewgh dhe-ves an duwow astranj ha'n Ashtaroth a-dhiworth agas mysk. Settyewgh agas kolonn war an Arloedh, ha servyewgh unnsel ev, hag ev a'gas delirv yn-mes a leuv an Filistysi.’ 4Ena mebyon Ysrael a removas an Baalim ha'n Ashtaroth, hag i a servyas unnsel an Arloedh.

5Ena Samuel a leveris, ‘Kuntellewgh oll Ysrael yn Mispa, ha my a bys war Dhuw ragowgh.’ 6Hag i a omguntellas war-barth yn Mispa, ha tenna dowr ha'y dhinewi yn-mes a-dherag an Arloedh. I a benysas y'n jydh na, ha leverel, ‘Ni re beghas erbynn an Arloedh.’ Ha Samuel a vreusi mebyon Ysrael yn Mispa.

7Pan glewas an Filistysi bos mebyon Ysrael kuntellys war-barth yn Mispa, gwahalyethow an Filistysi eth yn-bann erbynn Ysrael. Ha pan glewas mebyon Ysrael anodho, i a borthas own a'n Filistysi. 8Mebyon Ysrael a leveris dhe Samuel, ‘Na hedh ow karma dhe'n Arloedh agan Duw ragon, ma'gan sawyo yn-mes a leuv an Filistysi.’ 9Ha Samuel a gemmeras oen-dena ha'y offrynna rag offrynn kowlleskys dhe'n Arloedh; ha Samuel a armas dhe'n Arloedh rag Ysrael, ha'n Arloedh a worthybis dhodho. 10Pan esa Samuel owth offrynna yn-bann an offrynn leskys, an Filistysi a dheuth nes dhe vatalyas orth Ysrael; mes an Arloedh a darennas gans lev bras an jydh na war an Filistysi ha'ga thewlel yn deray; ha domhwelys ens a-dherag Ysrael. 11Ha gwer Ysrael eth yn-mes a Mispa ha helghya an Filistysi, ha'ga gweskel bys yn Beth-kar.

12Ena Samuel a gemmeras men ha'y settya yntra Mispa ha Yeshana,7:12 Yeshana: Amendys war-lergh an Syriek. Ebrow Shen. Cf. 2 Kroniklys 13:19. ha'y henwel Ebenezer; rag ev a leveris, ‘Kyns-lemmyn an Arloedh re'gan gweresas.’ 13Ytho an Filistysi o fethys ha ny dheuthons arta yn pow Ysrael; yth esa dorn an Arloedh erbynn an Filistysi oll dydhyow Samuel. 14Ha'n sitys a gemmeras an Filistysi dhiworth Ysrael a veu daskorrys dhe Ysrael, a-dhiworth Ekron bys yn Gath; hag Ysrael a dhelivras aga thir yn-mes a leuv an Filistysi. Hag yth esa kres ynter Ysrael ha'n Amorysi.

15Samuel a vreusi Ysrael oll dydhyow y vewnans. 16Hag yth e pub blydhen yn gylghenn dhe Bethel, Gilgal, ha Mispa; hag ev a vreusi Ysrael yn oll an tylleryow ma. 17Ena ev a dhehweli dhe Rama, rag yth esa y ji ena; hag ena ev a vreusi Ysrael; hag ev a dhrehevis ena alter dhe'n Arloedh.