Ysrael a Vynn Kavoes Myghtern

1Pan o Samuel koth, ev a apoyntyas y vebyon avel breusysi dres Ysrael. 2Hanow y gynsa-genys o Yoel, ha hanow y nessa, Abia; breusysi ens yn Beer-sheba. 3Mes ny gerdhi y vebyon yn y fordhow, mes i a dreylya a-denewen rag gwayn disonest, ha kemmeres falswobrow ha kamma gwirvreus.

4Ena oll henavogyon Ysrael a omguntellas war-barth ha dos dhe Samuel yn Rama, 5ha leverel dhodho, ‘Otta, koth osta, ha ny gerdh dha vebyon y'th fordhow; ytho apoynt ragon, myghtern dh'agan breusi, kepar hag oll an kenedhlow erell.’ 6Mes an dra a dhisplesyas Samuel pan lavarsons, ‘Ro dhyn myghtern dh'agan breusi.’ Samuel a bysis war an Arloedh, 7ha'n Arloedh a leveris dhe Samuel, ‘Goslow orth lev an bobel yn pup-tra a leverons dhis; rag ny'th skonsons jy, mes i re'm skonyas vy a vones myghtern warnedha. 8Kepar dell wrussons dhymm a-dhia'n jydh ma's dres vy yn-bann yn-mes a Ejyp bys y'n jydh hedhyw, orth ow eskasa hag ow servya duwow erell, yndella a wrons ynwedh dhis. 9Ha lemmyn goslow orth aga lev; mes ty a's gwarn yn solem, ha diskwedhes dhedha fordhow an myghtern neb a reyn warnedha.’

10Ytho Samuel a dherivas oll geryow an Arloedh dhe'n bobel esa ow kovynn myghtern a-dhiworto. 11Ev a leveris, ‘Hemma a vydh fordhow an myghtern neb a reyn warnowgh: ev a gemmer agas mebyon ha'gas apoyntya rag y jarettow ha dhe vos y varghogyon, ha dhe boenya a-dherag y jarettow; 12hag ev a apoynt ragdho y honan kaslewydhyon a vilyow ha kaslewydhyon a hanter-kansow, hag erell dhe aras y dhor ha mysi y drevas, ha dhe wul y arvow a vresel ha daffar y jarettow. 13Ev a gemmer agas myrghes dhe vos perfumyoresow ha bos kogesow ha peboresow. 14Hag ev a gemmer agas parkow ha'gas gwinlannow ha'gas olewbrennyer, an gwella anedha, ha'ga ri dh'y wesyon. 15Ev a gemmer an degves a'gas greun, ha'gas gwinlannow ha'y ri dh'y soedhogyon ha'y wesyon. 16Ev a gemmer agas gwesyon ha'gas maghtethyon, ha'n gwella a'gas gwer yowynk8:16 gwer yowynk: Po war-lergh an Septuagint chatel. ha'gas asenes, ha'ga gorra dh'y ober. 17Ev a gemmer an degves a'gas deves, ha hwi a vydh y gethyon. 18Hag y'n jydh na hwi a arm drefenn agas myghtern re dhewissowgh ragowgh agas honan; mes ny'gas worthyp an Arloedh y'n jydh na.’

Govynnadow Ysrael Grontys

19Mes an bobel a skonyas goslowes orth lev Samuel; hag i a leveris, ‘Nansi! Mes ni a vynn kavoes myghtern warnan, 20may fydhyn ni kepar hag oll an kenedhlow erell, ha rag may hyll agan myghtern agan breusi, ha mones yn-mes a-dheragon, ha'gan ledya yn agan batelyow.’ 21Samuel a glewas oll geryow an bobel, hag ev a's dasleveris yn diwskovarn an Arloedh. 22Ha'n Arloedh a leveris dhe Samuel, ‘Goslow orth aga lev ha gwra myghtern dhe reynya warnedha.’ Ha Samuel a leveris dhe wer Ysrael, ‘Kewgh pub gour dh'y sita.’