Gonis Powl yn Thessalonika

1Hwi a woer, a vreder, nag o agan devedhyans dhywgh yn euver, 2mes wosa godhevel kyns ha bos arvedhys, dell wodhowgh, yn Filippi, yth en ni kolonnek yn agan Duw dhe gewsel orthowgh aweyl Duw, gans strivyans meur. 3Rag ny dheuth agan galow a gammdybyans na plosedhes, nag yn toell, 4mes, ha ni kommendys gans Duw may fo gorrys an aweyl yn charj dhyn ni, yndella y kewsyn: ny wren kewsel dhe blegya dhe vab-den, mes dhe Dhuw a brev agan kolonnow. 5Rag ny wrussyn bythkweth devnydh a eryow fekyl, dell wodhowgh, na kudhlenn krefni, Duw yn test. 6Ny wrussyn hwilas gordhyans dhiworth mab-den, na dhiworthowgh hwi na dhiworth tus erell, 7kyn hyllyn poesa warnowgh avel abesteli Krist. Mes klor2:7 klor: War-lergh re a'n dornskrifow fleghigyow. en ni yn agas mysk kepar ha mammeth ow chershya hy fleghes. 8Ytho, ha ni hirethek war agas lergh, pes da en ni ow profya dhywgh aweyl Duw hag ynwedh agan enevow ni rag hwi dhe vos ha bos meurgerys genen. 9Rag hwi a berth kov, a vreder, a'gan lavur ha'gan hwel. Owth oberi dydh ha nos ma na worren begh warnowgh, ni a bregowthas dhywgh aweyl Duw. 10Hwi yw testow, ha Duw ynwedh, fatell en ni sans ha gwiryon ha divlam dhywgh hwi neb a grys. 11Hwi a woer fatell wrussyn ni agas dyghtya, pubonan ahanowgh, kepar dell wra tas y fleghes ev, 12orth agas ynnia ha'gas kennertha, ha'gas konjorya may hwrellewgh kerdhes gwiw dhe Dhuw usi orth agas gelwel dh'y wlaskor ha'y splannder.

13Ha rakhemma ni ynwedh a ras dhe Dhuw heb hedhi, pan dhegemmersowgh ger Duw a glewsowgh ahanan, na wrussowgh y dhegemmeres avel ger mab-den, mes avel ger Duw, dell yw yn hwir, a wra oberi ynwedh ynnowgh hwi neb a grys. 14Rag hwi, a vreder, re holyas ensampel eglosyow Duw usi yn Yudi yn Krist Yesu, rag hwi ynwedh a wodhev an keth taklow ma dhiworth agas pobel agas honan dell wrussons godhav gans an Yedhewon, 15a wrug ladha an Arloedh Yesu Krist ha'n brofoesi,2:15 ha'n brofoesi: War-lergh re a'n dornskrifow ha'ga frofoesi aga honan. ha'gan helghya yn-mes heb plegya dhe Dhuw, hag owth arvedh pub den oll, 16orth agan lettya a gewsel orth an Jentilys may fens i selwys, may hwrellens kollenwel aga feghosow pup-prys. Mes an sorr a dheuth warnedha wortiwedh.

Hwans Powl dhe Dhasweles an Eglos

17Mes, ha ni diberthys2:17 diberthys: Po omdhivesys. dhiworthowgh, a vreder, unn pols byghan, y'n korf a-der y'n kolonn, dhe voy yth esa hwans dhyn dhe weles agas fas, meur agan yeunadow. 18Rakhenna, ni a vynna dos dhywgh hwi, my Powl unnweyth ha diwweyth, ha Satnas a'gan lettyas. 19Rag pyth yw agan govenek po agan lowena po kurun agan bost – a nyns yw hwi, a-rag agan Arloedh Yesu Krist, orth y dhevedhyans? 20Rag hwi yw agan splannder ha'gan lowena.