1Ytho, pan na yllyn perthi na fella, pes da en ni dhe vos gesys agan honan yn Athenys, 2ha ni a dhannvonas Timothi, agan broder ha kesoberer Duw yn aweyl Krist,3:2 agan broder ha kesoberer Duw yn aweyl Krist: War-lergh dornskrifow erell agan broder ha menyster Duw ha'gan kesoberer yn aweyl Krist. rag agas fastya ha'gas kennertha yn agas fydh, 3ma na vo denvyth troblys y'n galarow ma, rag hwi a woer bos hemma agan rann, 4rag ni a leveris dhywgh kyns, hwath pan esen ni genowgh hwi, y fedhen gweskys, kepar dell hwarva yn hwir, dell wodhowgh. 5Rakhenna pan na wrugavy perthi na fella, my a dhannvonas dhe wodhvos agas fydh, rag own a'n tempter dh'agas previ yn neb maner ha'gan lavur dhe bos euver.

6Mes Timothi re dheuth nammnygen dhyn ni dhiworthowgh, ha derivas dhyn nowodhow da a'gas fydh ha'gas kerensa, ha hwi dhe berthi kov da ahanan pup-prys, ha hwi hwansek dh'agan gweles, kepar dell on ni dh'agas gweles hwi; 7rakhenna kennerthys en ni, a vreder, a-dro dhywgh, yn agan galar ha'gan anken oll der agas fydh. 8Rag ni a vew lemmyn mar sevowgh hwi y'n Arloedh. 9Py gras ytho a yllyn ni daskorr dhe Dhuw ahanowgh hwi oll, hag a'n lowena may lowenhyn ragowgh a-dherag agan Duw, 10ow pysi yn tiwysyk dydh ha nos a weles agas fas ha kollenwel an pyth a fyll yn agas fydh?

11Lemmyn agan Duw ha Tas y honan, ha'gan Arloedh Yesu re'gan gittyo yn agan fordh dhywgh hwi, 12ha'n Arloedh re wrello dhywgh ynkressya ha palshe yn kerensa an eyl dh'y gila, ha dhe bub den kepar dell wren ni ynwedh dhywgh hwi, 13dhe fastya agas kolonn divlam yn sansoleth a-dherag agan Duw ha Tas orth devedhyans agan Arloedh Yesu Krist gans y syns oll.3:13 War-lergh re a'n dornskrifow yma dhe dhiwedh an wers Amen.