Bewnans Plegadow dhe Dhuw

1Wor'tiwedh ytho, a vreder, ni a'gas pys ha keski y'n Arloedh Yesu, kepar dell dhegemmersowgh dhiworthyn ni fatell goedh dhywgh kerdhes ha plegya dhe Dhuw, kepar dell gerdhowgh dhe wir,4:1kepar dell gerdhowgh dhe wir: War-lergh re a'n dornskrifow nyns usi omma an geryow ma. may palshahowgh dhe voy. 2Rag hwi a woer an gorhemmynnow a resen dhywgh der an Arloedh Yesu. 3Rag hemm yw bodh Duw, agas sansheans, hwi dhe omwitha rag fornikasyon, 4dhe wodhvos pubonan ahanowgh fatell wittho y gorf y honan4:4 fatell wittho y gorf y honan: Po fatell gaffo y wreg y honan. yn sansoleth hag enor, 5heb passhyon drokhwans kepar ha'n Jentilys na aswonn Duw; 6heb treuspassya na gul kamm dh'y vroder na'y doella y'n dra ma, rag bos an Arloedh dialor yn oll an taklow ma, kepar dell leversyn dhywgh kyns ha desta. 7Rag ny'gan gelwis Duw dhe vostedhes, mes yn sansoleth. 8Rakhenna, neb a skon, ny wra skonya mab-den mes Duw a re y Spyrys Sans dhywgh ynwedh.

9A-dro dhe gerensa a'n vreder, ny'gas beus edhomm my dhe skrifa dhywgh, rag hwi re beu dyskys gans Duw dhe gara an eyl y gila, 10ha dhe wir, hwi a wra hemma rag an vreder oll der oll Makedonia. Mes ni a'gas pys, a vreder, may palshahowgh dhe voy, 11ha strivya yn freth dhe vos kosel, ha gul agas taklow hwi, hag oberi gans agas diwla hwi, kepar dell worhemmynnsyn dhywgh, 12may kerthowgh gans onester a-rag an re a-ves, ha ma na vo edhomm dhywgh a dravyth.4:12 ha ma na vo edhomm dhywgh a dravyth: Po ha ma na vo edhomm dhywgh a weres denvyth.

Devedhyans an Arloedh

13Ny vynnyn hwi dhe vos heb godhvos, a vreder, a-dro dhe'n re a gosk, ma na vewgh grevys kepar ha'n re erell heb govenek. 14Rag mar krysyn Yesu dhe verwel ha dasserghi, yndella ynwedh, dre Yesu, Duw a dhre ganso an re re goskas. 15Hemma a leveryn dhywgh dre er an Arloedh: ni, neb a vew ha neb yw gesys bys yn devedhyans an Arloedh, ny wren mos mann kyns an re re goskas. 16Rag an Arloedh y honan gans kri gorhemmynn, gans lev arghel, ha gans hirgorn Duw, a dhiyskynn dhiworth nev, ha'n re varow yn Krist a sev yn kynsa. 17Ena ni, neb yw yn few, neb yw gesys, a vydh kemmerys war-barth gansa yn kommol dhe vetya an Arloedh y'n ayr; hag yndella pup-prys y fydhyn gans an Arloedh. 18Ytho, kennerthewgh an eyl y gila gans an geryow ma.