1Mes nyns yw res skrifa dhywgh a vreder, a-dro dhe'n termynyow ha'n sesonyow; 2rag hwi agas honan a woer yn kewar dydh an Arloedh dhe vos kepar ha lader yn nos. 3Tus pan leverons, ‘Yma kres ha diogeledh’, ena diswrians tromm a dheu warnedha kepar ha gloes dineythyans dhe venyn gans flogh, ha ny wrons diank mann. 4Mes nyns esowgh hwi, a vreder, yn tewlder, may hwrello an jydh agas kavoes kepar ha lader. 5Rag hwi oll yw mebyon golow ha mebyon an jydh. Nyns on ni a'n nos nag a'n tewlder. 6Ytho, na goskyn kepar ha'n re erell, mes gwren goelyas ha bedhen divedhow. 7Rag an re a gosk, yn nos y koskons, ha'n re a yv, yn nos yth yns medhow. 8Mes, ha ni mebyon an jydh, bedhen divedhow, ow kwiska lurik fydh ha kerensa, hag avel basnett, govenek selwyans. 9Rag ny wrug Duw agan destna dhe sorr mes dhe gavoes selwyans der agan Arloedh Yesu Krist, 10neb a verwis ragon, may fewen war-barth ganso, ha ni difun po yn kosk. 11Rakhenna, kennerthewgh an eyl y gila, ha drehevel an eyl y gila, dell wrewgh yn hwir.

Arghadowyow Diwettha ha Salusyans

12Lemmyn, ni a'gas pys a vreder, a aswonn an re a lavur yn agas mysk ha neb a'gas hembronk y'n Arloedh ha'gas keski, 13ha'ga synsi yn ughel dres eghenn yn kerensa drefenn aga gonis. Bedhewgh yn kres an eyl gans y gila. 14Ha ni a'gas pys, a vreder, a geski an re yw diek, a hebaskhe an re yw digolonnek, a skoedhya an re yw gwann, hir agas godhevyans troha pub den oll. 15Gwaytyewgh nag attallo denvyth drog rag drog, mes pup-prys siwyewgh an pyth yw da, an eyl rag y gila, ha rag pub den oll. 16Lowenhewgh pup-prys. 17Gwrewgh pysi heb hedhi. 18Yn pup-tra, rewgh grasyans, rag hemm yw bolonjedh Duw ragowgh yn Krist Yesu. 19Na wrewgh difeudhi an Spyrys. 20Na wrewgh dispresya profoesans. 21Prevewgh pup-tra, synsewgh an pyth yw da. 22Omwithewgh rag drog a bub eghenn.

23Ha'n Dew a gres y honan re'gas sakkro yn tien; ha'gas spyrys ha'gas enev ha'gas korf kowal re bo gwithys divlam orth devedhyans agan Arloedh Yesu Krist. 24Lel yw neb a'gas gelow, hag ynwedh ev a wra y gollenwel.

25A vreder, gwrewgh pysi ragon.

26Salusewgh an vreder oll gans bay sans. 27My a'gas charj may fo an lyther ma redys dhe'n vreder oll.5:27 dhe'n vreder ollWar-lergh re a'n dornskrifow dhe oll an vreder sans

28Gras agan Arloedh Yesu Krist re bo genowgh hwi.5:28 War-lergh re a'n dornskrifow yma dhe dhiwedh an wers Amen