Salusyans

1Powl, abostol Krist Yesu war-lergh arghadow Duw agan Selwador, ha Krist Yesu agan govenek,

2Dhe Timothi, ow gwir flogh y'n fydh:

Gras, tregeredh ha kres dhiworth Duw an Tas ha Krist Yesu agan Arloedh.

Gwarnyans erbynn Fals Dhyskas

3Dell y'th pysis ha my ow mos dhe Makedonia, gwra gortos yn Efesus mayth erghi dhe sertan re na rollons ken dyskas, 4ha na wrellons vri a hwedhlow hag aghskrifow heb worfenn, ow skila disput moy es dyskans duwel, yw dre fydh. 5Mes towl an arghadow yw kerensa yn-mes a golonn lan ha kowses da ha fydh heb gil. 6Yma tus ow mos yn sowdhan dhiworth an taklow ma, re dreylyas dhe gows euver, 7hwansek dhe vos dyskadoryon a'n lagha heb konvedhes pandr'a leverons na'n taklow hag a gewsons mar hardh a-dro dhedha.

8Ni a woer bos an lagha da, mar mynn den gul devnydh anodho yn lafyl, 9ow konvedhes hemma: nyns yw an lagha gwrys rag den gwiryon, mes rag tus dhilagha ha diwostydh, an re yw didhuw ha peghadoryon, ansans hag ongrassyes, an re a ladh tas ha mamm, ha denledhysi, 10an re a wra fornikasyon gans horys po gwer, an re a lader tus, gowygyon ha gowlioryon, ha pypynag arall yw erbynn dyskas yagh 11war-lergh aweyl splannder an Duw benniges, a veu res y'm charj.

Grasyans a Dregeredh

12My a ras dhe neb a re galloes dhymm, Krist Yesu agan Arloedh, rag ev a synsis ow bos lel, ha'm gorra yn y wonis, 13kyn hwren vy blasfemya kyns, ha helghya, hag arvedh. Mes my a gavas tregeredh, rag my a wrug hemma heb godhvos, yn diskryjyans. 14Ha gras agan Arloedh a wrug palshe gans fydh, ha'n kerensa usi yn Krist Yesu. 15Len yw an ger ha gwiw dhe bub kemmeryans, Krist Yesu dhe dhos a-bervedh y'n bys dhe selwel peghadoryon; ha'n kynsa anedha ov vy. 16Mes rakhenna my a gavas tregeredh, may tiskwettho kyns Yesu Krist pub godhevyans ynnov vy rag ensampel dhe'n re a dheu dhe grysi ynno rag bewnans heb diwedh. 17Dhe Vyghtern an oesow, anvarwel, diwel, an unn Duw, re bo enor ha gordhyans trank heb worfenn. Amen.

18An arghadow ma a rov dhis, Timothi ow flogh, war-lergh an geryow a brofoesans kewsys kyns a-dro dhis, may hwrylli omladh dredha an omladh da, 19ow synsi fydh ha kowses da. Yma tus, ow skonya hemma, re wrug gorhel terrys a'ga fydh; 20yn aga mysk yma Hymeneus hag Aleksander, neb a dhaskorris dhe Satnas, may tyskons na vlasfemyons.