Dyskas a-dro dhe Bysadow

1Ytho, my a bys kyns oll, may fo gwrys govynnadow, pysadow, aspysadow ha grasyans rag tus oll, 2rag myghternedh ha tus oll ughel aga roweth, may hwryllyn ledya bewnans kosel ha hebask, yn pub revrons hag onester. 3Da yw henna, ha plegadow dhe Dhuw agan Selwador, 4neb a vynn tus oll dhe vos selwys ha dhe dhos dhe aswonnvos an gwir. 5Rag yma unn Duw hag unn mayn yntra Duw ha mab-den, an den Krist Yesu, 6neb a omros yn daspren rag pub den oll, an dustuni degys y'n termyn gwiw. 7Rakhenna my a veu ordenys herot hag abostol (an gwir a gowsav,2:7 a gowsav: War-lergh re a'n dornskrifow a gowsav yn Krist. nyns esov ow gowleverel), dyskador an Jentilys yn fydh ha gwiryonedh.

8Ytho, my a vynn may hwrello pysi an wer yn pub le, ow trehevel diwla sans heb sorr na disputyans. 9Y'n keth vaner y koedh dhe venynes omwiska yn maner wiw, gans onester ha doethter, heb pletha aga gols gans owr na perlys, ha heb dillas meur y gost, 10mes gans gwriansow da, dell yw gwiw rag benynes ow professya revrons dhe Dhuw. 11Dyskes benyn yn taw, gans pub uvelder. 12Ny asav dhe venyn may hwrello dyski na kemmeres awtorita war wour, mes bedhes hi tawesek. 13Rag Adam a veu formys kyns oll, ena Eva, 14ha ny veu Adam toellys, mes an venyn a veu toellys ha hi a gammdremenas. 15Mes hi a vydh selwys dre dhineythi fleghes mar kwra hi gortos yn fydh ha kerensa ha sansoleth gans doethter.