An Pyth yw Gwiw yn Epskop

1Sur yw an lavar: Neb a vynn kavoes soedh epskop, a hwila obereth da. 2Y koedh dhe epskop bos divlam, gour unn wreg, sad, doeth, onest, hel dhe westoryon, dyskador da, 3heb eva re nag omdhal, mes klor, ha digavyllek, heb kara mona; 4rewler da a'y vayni ev, ow kwitha y fleghes ev gostydh ha gwiw yn tien aga fara. 5Den mar ny woer rewlya y vayni ev, fatell wra gwitha eglos Duw? 6Na vedhes ev dyskybel nowydh na goettho yn breus an jowl dre woeth. 7Res yw ynwedh dhodho kavoes dustuni da dhiworth an re usi a-ves, ma na goettho yn disenor ha maglenn an jowl.

An Pyth yw Gwiw yn Dyagon

8Yn kepar maner, res yw dhe dhyagonyon bos sad, heb taves dewblek na hwansek dhe eva re a win na kraf rag gwayn diveth, 9ow synsi mysteri an fydh, glan aga howses. 10Ha bedhens i prevys kynsa, ha mar pydhons divlam, gwrens i gonis avel dyagonyon. 11Yn kepar maner, y koedh dh'aga gwragedh bos sad; na vedhens hwedhloresow, mes klor ha lel yn pup-tra. 12Bedhes dyagonyon gwer unn wreg ha rewloryon dha aga fleghes ha'ga mayni i. 13Rag an re a wonis yn ta avel dyagonyon a gyv roweth da ragdha i ha kolonnekter meur y'n fydh yn Krist Yesu.

Kevrin agan Kryjyans

14An taklow ma a skrifav dhis ow kwaytya dos dhiso kyns nep-pell. 15Mes mar strechyav, ty a wra godhvos fatell yw res omdhegi yn mayni Duw, yw eglos an Duw bew, an pilar ha'n grond a wiryonedh. 16Res yw avowa, meur, dhe wir, yw an kevrin a sansoleth:

Diskwedhys veu3:16 Diskwedhys veu: War-lergh re a'n dornskrifow Duw a veu diskwedhys. y'n kig,

prevys ewn y'n Spyrys,

gwelys gans eledh,

pregewthys ynter an Jentilys,

krysys y'n bys,

kemmerys yn-bann yn splannder.