Gwarnyans erbynn Fals Dhyskadoryon

1An Spyrys a lever yn tiblans re dhe asa an fydh yn termynyow diwettha ha gul vri a fals spyrysyon ha dyskasow dywolow; 2yn falsuri gowleverysi, leskys aga howses gans horn. 3I a dhifenn demmedhyans hag a worhemmynn omwitha rag boes a veu gwrys gans Duw dhe ranna gans grasyans yntra kryjygyon, ha'n re re wodhva an gwir 4Rag da yw pub kreatur a Dhuw, ha nyns yw res gorra travyth dhe-ves, mars yw degemmerys gans grasyans, 5drefenn y vos sakrys dre er Duw ha pysadow.

Menyster Da a Grist Yesu

6Mar profydh an taklow ma dhe'n vreder, gwas da dhe Grist Yesu vydhydh, megys gans geryow an fydh ha'n dyskas da re siwsys. 7Mes skon hwedhlow didhuw ha hwedhlow gwraghes, ha lavur troha sansoleth; 8rag lavur an korf yw nebes dhe les, mes sansoleth yw dhe les rag pup-tra, gans ambos bewnans y'n termyn ma hag yn termyn a dheu. 9Lel yw an ger ha gwiw dhe gemmeryans leun. 10Dhe hemma ni a lavur ha strivya,4:10 lavur ha strivya: War-lergh re a'n dornskrifow lavur ha perthi mewl. rag yma agan govenek y'n Duw bew, neb yw an Selwador a bub den, hag a gryjygyon dres oll.

11Gwra erghi ha dyski an taklow ma. 12Na dhispresys denvyth dha yowynkneth, mes deus ha bos patron dhe'n gryjygyon yn lavar, yn bewedh, yn kerensa, yn fydh, yn glander. 13Erna dhyffiv, omri dhe lenna skryptor, dhe gennerth, ha dhe dhyski. 14Na wra dispresya an ro usi ynnos a veu res dhiso dre brofoesans gans gorra diwla an henavogyon warnas. 15Gwra oberi gans an taklow ma; bydh diwysyk y'n taklow ma may fo dha avonsyans diblans dhe bub den. 16Bydh war a-dro dhiso jy dha honan, hag a-dro dhe'th tyskas; gwra pesya ynna i, rag, ow kul yndella, ty a wra omselwel, ha selwel ynwedh dha woslowysi.