Solomon a Bys Furneth dhiworth Duw

1Solomon mab Davydh a grevhas y dhalghenn yn y wlaskor; y feu an Arloedh y Dhuw ganso hag ev a'n gwrug meur dres eghenn.

2Solomon a gewsis dhe oll Ysrael, kaptenyon milyow ha kansow, an vreusysi hag oll an ledyoryon yn Ysrael, pennow an teyluyow. 3Ena Solomon, hag oll an kuntelles ganso, eth dhe'n tyller ughel yn Gibeon; rag yth esa ena tylda an kuntelles a Dhuw, re bia gwrys gans Moyses gwas Duw, y'n gwylvos. 4Mes Davydh re dhegsa argh Duw yn-bann a Kiryath-yearim dhe'n tyller a dharbarsa dhedhi; rag ev a ystynnsa tylda rygdhi yn Yerusalem. 5Ynwedh yth esa an alter a vrons, a wrussa Bezalel mab Hur, a-rag tabernakel an Arloedh; ytho Solomon ha'n kuntelles a hwilas anodho ena. 6Solomon eth yn-bann ena dhe'n alter a vrons a-rag an Arloedh yn tylda an kuntelles, hag ev a offrynnas mil offrynn leskys warnodho.

7Y'n nos na Duw a omdhiskwedhas dhe Solomon, hag a leveris dhodho, ‘Pys an dra a vynnydh my dh'y ri dhis.’ 8Solomon a leveris dhe Dhuw, ‘Ty re dhiskwedhas tregeredh veur dhe'm tas Davydh, ha ty re'm wrug myghtern yn y le. 9Lemmyn A Arloedh Duw, bedhes kewerys an ambos a wrussys dhe'm tas Davydh, rag ty re'm wrug myghtern war bobel kekemmys aga niver ha doust an dor 10Ro dhymm lemmyn furneth ha godhvos rag may hylliv mos yn-mes ha dos a-ji a-rag an bobel ma, rag piw a yll rewlya dha bobel veur ma?’ 11Duw a worthybis dhe Solomon, ‘Drefenn bos hemma y'th kolonn, ha ny byssys dhiworthiv pythow, rychys, glori, na bewnans an re a'th kas, ha pella ny byssys dhiworthiv bewnans hir, mes ty re bysis furneth ha godhvos ragos dha honan, rag may hylli rewlya ow fobel ma'th wrug vy myghtern warnedha, 12furneth ha godhvos yw res dhis. Dres henna y rov dhis rychys, pythow, ha glori, na bewo aga farow onan vytholl a'n vyghternedh esa a-ragos, ha ny bewvydh onan vytholl hag a dheu war dha lergh.’ 13Yndella Solomon a dheuth dhiworth an tyller ughel yn Gibeon, dhiworth tylda an kuntelles, dhe Yerusalem, Hag ev a reynyas war Ysrael.

Kenwerth yn Charettys ha Mergh

14Solomon a guntellas war-barth charettow ha mergh; yth esa dhodho peswardhek kans charett ha dewdhek mil vargh; ev a's gorras y'n sitys charettow, hag ynwedh gans an myghtern honan yn Yerusalem. 15An myghtern a wrug mayth o arghans hag owr mar gemmyn yn Yerusalem avel men, hag ev a wrug prenn keder mar gemmyn avel prenn sykamin y'n Shefela. 16Mergh Solomon o ynperthys dhiworth Ejyp1:16 Ejyp: Po martesen Musur yn Kilikia. ha Kue;1:16 Kue: Po martesen Kilikia. gwikoryon an myghtern a's degemmeras dhiworta a'n pris kemmyn. 17I a ynperthi charett a Ejyp a hwegh kans shekel a arghans, ha margh a gans ha hanter kans; y'n keth vaner, i a's gwertha yn-rag dhe oll myghternedh an Hyttysi ha myghternedh Aram.