An Rebellyans erbynn Rehoboam

1Rehoboam eth dhe Shekem, rag oll Ysrael re dhothya dhe Shekem ma'n gwrellens myghtern. 2Pan glewas Yeroboam mab Nebat a-dro dhe henna, (rag yth esa ev yn Ejyp, may fisa a vyghtern Solomon), ev a dhehwelis dhiworth Ejyp. 3I a dhannvonas ha'y elwel, ha Yeroboam hag oll Ysrael a dheuth hag a leveris dhe Rehoboam, 4‘Dha das a wre agan yew poes. Lemmyn ytho skavha an lavur kales ha'n yew boes a worras warnan, ha ni a'th serv.’ 5Ev a leveris dhedha, ‘Deus dhymmo vy wosa tri dydh.’ Yndella an bobel eth dhe-ves.

6Ena myghtern Rehoboam a omgusulyas gans an henavogyon a sevi a-rag y das Solomon hag ev hwath yn few, ow leverel, ‘Fatell y'm kusulyowgh a worthybi dhe'n bobel ma?’ 7I a worthybis dhodho, ‘Mara pydhydh hegar orth an dus ma ha'ga flesya ha kewsel geryow da dhedha, ena i a vydh dha wesyon bys vykken.’ 8Mes ev a skonyas an gusul a ros an henavogyon dhodho hag ev a omgusulyas gans an yonkoryon re devsa ganso, esens ow sevel a-ragdho lemmyn. 9Ev a leveris dhedha, ‘Pana gusul a'gas beus rag may hworthyppiv dhe'n bobel ma, re leveris dhymm, “Skavha an yew a worras dha das warnan”?’ 10An yonkoryon re devsa ganso a leveris dhodho, ‘Yndellma y tegoedh dhis kewsel dhe'n bobel a leveris dhis, “Dha das a wrug poes agan yew, mes res yw dhis hy skavhe ragon”; lavar dhedha, “Ow bys byghan yw tewa agas diwglun ow thas. 11Ow thas a worras warnowgh yew boes; my a geworr dh'agas yew. Ow thas a'gas skorjyas gans hwyppys, mes my a'gas skorj gans skorpyones.” ’

12Yeroboam hag oll an bobel a dheuth dhe Rehoboam wosa tri dydh, dell lavarsa an myghtern, ‘Deus dhymmo arta wosa tri dydh.’ 13An myghtern a worthybis dhedha yn harow. Myghtern Rehoboam a skonyas kusul an henavogyon; 14ev a leveris dhedha herwydh kusul an yonkoryon, ‘Ow thas a wre poes aga yew, mes my a geworr dhedhi. Ow thas a'gas skorjyas gans hwyppys, mes my a'gas skorj gans skorpyones.’ 15Yndella ny woslowas an myghtern orth an bobel, drefenn bos hemma destnys gans Duw, dhe gewera an ger kewsys gans an Arloedh dre Ahiya an Shilonyas dhe Yeroboam mab Nebat.

16Pan gonvedhas oll Ysrael na vynna an myghtern goslowes orta, an bobel a worthybis dhe'n myghtern,

‘Pana rann a'gan beus yn Davydh?

Ny'gan beus eretons yn mab Yesse.

Dh'agas tyldow, A Ysrael!

Mir lemmyn dhe'th chi dha honan, Davydh.’

Yndella oll Ysrael eth dhe-ves dh'aga thyldow. 17Mes Rehoboam a reynyas war an Ysraelysi esa trigys yn sitys Yuda. 18Myghtern Rehoboam a dhannvonas Hadoram, a'n jevo charj a'n lavur konstrynys, mes an Ysraelysi a'n labydhas dhe'n mernans. Myghtern Rehoboam a spedyas dhe yskynna yn y jarett ha fia dhe Yerusalem. 19Yndella Ysrael re beu yn rebellyans erbynn chi Davydh bys y'n jydh hedhyw.