Abia a Reyn war Yuda

1Y'n etegves blydhen a vyghtern Yeroboam, Abia a dhallathas reynya war Yuda 2Ev a reynyas teyr blydhen yn Yerusalem. Hanow y vamm o Mikaya myrgh Uriel a Gibea.

Yth esa bresel ynter Abia ha Yeroboam. 3Abia a dhallathas an batel gans lu a gasoryon alloesek, peswar kans mil wour dewisys; ha Yeroboam a arayas y linenn a vatel er y bynn gans eth kans mil gasor alloesek. 4Abia a sevis war venydh Semaraym usi yn bro venydhyek Efraym, hag a leveris, ‘Goslowewgh orthiv, Yeroboam hag oll Ysrael! 5A ny wodhowgh hwi y ros an Arloedh, Duw Ysrael, an myghternsys war Ysrael dhe Davydh ha'y vebyon bys vykken dre gevambos a hoelan? 6Byttegyns Yeroboam mab Nebat, gwas Solomon mab Davydh a sevis yn-bann hag a rebellyas erbynn y arloedh; 7ha bagas a goeg vilens a omguntellas a-dro dhodho hag a dhefias Rehoboam mab Solomon, pan o Rehoboam yowynk ha heb prevyans, ha ny veu krev lowr dhe sevel orta.

8‘Lemmyn hwi a dyb y hyllowgh sevel orth gwlaskor an Arloedh yn leuv mebyon Davydh, drefenn agas bos gyllys ha bos routh vras ha bos genowgh hwi an leughi a owr a wrug Yeroboam dhe vos duwow ragowgh. 9A ny bellhasowgh oferysi an Arloedh, mebyon Aron, ha'n Levysi, ha gul oferysi ragowgh agas honan avel poblow a diryow erell? Piw pynag a dheffo dhe omsakra gans tarow yowynk po seyth hordh a yll dos ha bos oferyas a neppyth nag yw duw. 10Mes ni, an Arloedh yw agan Duw, ha ny'n gessyn. Ni a'gan beus oferysi a venyster dhe'n Arloedh, mebyon Aron, ha Levysi rag aga servya. 11I a lesk dhe'n Arloedh pub myttin ha pub gorthugher offrynnow leskys hag ynkys hweg, hag araya bara an wolok war an voes lan, hag i a enow an lugern war an kantolbrenn a owr pub gorthugher. Yndella ni a with charj an Arloedh agan Duw, mes hwi re'n gasas. 12Yma Duw genen orth agan penn, ha'y oferysi a's teves aga hirgern rag seni an galow dhe'n vatel er agas pynn. A vebyon Ysrael, na vatelewgh orth an Arloedh, Duw agas tasow, rag ny yllowgh seweni.’

13Yeroboam a dhannvonas kontrewaytyans a-dro dhe dhos warnedha a-dhelergh; yndella yth esa y lu a-rag Yuda, hag yth esa an kontrewaytyans a-dryv dhedha. 14Pan dreylyas Yuda yth esa an vatel a-ragdha hag a-dryv dhedha. I a grias dhe'n Arloedh ha'n oferysi a hwythas an hirgern. 15Ena tus Yuda a grias garm an vatel. Pan armas gwer Yuda, Duw a fethas Yeroboam hag oll Ysrael a-rag Abia ha Yuda. 16Mebyon Ysrael a fias dhe'n fo a-rag Yuda, ha Duw a's ros yn aga diwleuv. 17Abia ha'y lu a's fethas gans ladhva veur; pymp kans mil wour dhewisys a Ysrael a goedhas ledhys. 18Yndella mebyon Ysrael o iselhes y'n termyn na, ha mebyon Yuda a dryghis, drefenn i dhe drestya y'n Arloedh, Duw aga thasow. 19Abia a helghyas Yeroboam, hag a gemmeras sitys dhiworto; Bethel ha'y threvow, Yeshana ha'y threvow, hag Efron ha'y threvow. 20Ny dhaskavas Yeroboam y nell yn dydhyow Abia; an Arloedh a'n gweskis dhe'n dor hag ev a verwis. 21Mes Abia eth ha bos krev. Ev a gemmeras peswardhek gwreg, ha dineythi dew vab warn ugens ha hwetek myrgh. 22Gweythresow erell Abia, y fara ha'y wriansow yw skrifys yn lyver-styryans13:22 lyver-styryans: Ebrow midrash. an profoes Iddo.