Darbarow dhe Dhrehevel an Tempel

1Solomon a erviras drehevel tempel rag hanow an Arloedh, ha chi ryel ragdho y honan. 2Solomon a guntellas seytek mil deger hag eth mil vengleudhyer y'n vro venydhyek, gans tri mil ha hwegh kans rag aga gorwoelyas.

Darbar rag Drehevyans an Tempel

3Solomon a dhannvonas ger dhe Hiram myghtern Tyr: ‘Ty a dhannvonas prenn keder dhe Davydh ow thas dhe dhrehevel chi ragdho dhe driga ynno. 4Yth esov ow trehevel chi rag hanow an Arloedh ow Duw, ha'y sakra dhodho rag leski ynkys sawrek a-ragdho, ha rag offrynna bara an wolok heb hedhi, ha rag offrynnow leskys, myttin ha gorthugher, y'n sabotys ha'n loeryow nowydh ha rag goelyow apoyntys an Arloedh agan Duw; hemm yw dever bys vykken rag Ysrael. 5An chi a vynnav y dhrehevel a vydh bras, rag agan Duw yw brassa ages oll duwow erell. 6Mes piw a yll drehevel chi ragdho, a-ban na yll an ughella nev y synsi? Piw ov vy bys may trehavav chi ragdho, marnas y vos avel tyller dhe leski offrynnow a-ragdho? 7Ytho lemmyn dannvon dhymmo gour skentel rag oberi yn owr, arghans, brons ha horn, hag yn pann purpur, rudhgogh ha glasrudh, dyskys ynwedh yn gravyans, dhe oberi yn Yuda ha Yerusalem gans ow oberoryon skentel, a wrug ow thas Davydh aga provia. 8Dannvon dhymmo ynwedh prenn keder, meryw hag algum a Lebanon, rag my a woer dha wesyon dhe vos skentel ow treghi prennyer Lebanon. Ow wesyon a ober gans dha wesyon 9ow pareusi prennyer yn pals, rag an chi a vynnav y dhrehevel a vydh meur ha marthys. 10My a brovi rag dha wesyon, treghoryon an prennyer, ugens mil gor2:10 gor: Kor, musur sygh po linyel a-dro dhe 400 liter. a ys brewys, ugens mil gor a heydh, ugens mil vath2:10 vath: Bath, musur linyel, a-dro dhe 22 liter. a win, hag ugens mil vath a oyl.’

11Ena Hiram myghtern Tyr a worthybis yn lyther a dhannvonas dhe Solomon, ‘Drefenn an Arloedh dhe gara y bobel, ev re'th wrug myghtern warnedha.’ 12Hiram a leveris ynwedh, ‘Benniges re bo an Arloedh, Duw Ysrael, gwrier nev ha nor, neb re ros dhe vyghtern Davydh mab fur, a'n jeves doethter ha konvedhes, dhe dhrehevel chi rag an Arloedh, ha chi ryel ragdho y honan.

13‘Lemmyn my re dhannvonas Huram-abi, den roasek, a'n jeves konvedhes, 14may feu y vamm a Dan, ha'y das o gour a Tyr. Dyskys ywa dhe oberi yn owr, arghans, brons, horn, men, ha prenn, hag yn pann purpur, glas ha rudhgogh, ha lien fin, ha dhe wul gravyans a lies sort, ha dhe wul pub desin oll a rer dhodho, gans dha seri dha honan, ha seri ow arloedh, dha das Davydh. 15Ha lemmyn an ys, an heydh, an oyl, ha'n gwin, anedha may kewsis ow arloedh, a's dannvones dh'y wesyon. 16Ni a dregh py prennyer pynag a'th eus edhomm anedha a Lebanon, ha'ga dri dhis war skathow-kloes war an mor dhe Yoppa; ty a's deg yn-bann dhe Yerusalem.’

17Ena Solomon a niveras oll an alyons esa trigys yn pow Ysrael, haval dhe'n niveryans a wrug y das, Davydh, hag y feu kevys seyth-ugens ha tridhek kans mil, ha hwegh kans. 18Ev a settyas deg ha tri-ugens dhe vos degoryon, peswar-ugens mil dhe vos mengleudhoryon y'n vro venydhyek, y ha tri mil ha hwegh kans gorwoelyas rag gul dhe'n bobel lavurya.